SE BIBLE ETỊN̄DE ABAN̄A
Asari
Nsio nsio orụk ke ererimbot ẹketo m̀mọ̀n̄?
“Adam osio n̄wan esie enyịn̄ Eve, sia enye edidide eka kpukpru mme andidu uwem.”—Genesis 3:20.
SE NTAIFIỌK ẸTỊN̄DE
Esop kiet emi ekerede UNESCO ọdọhọ ke “owo kiet okobon kpukpru owo emi ẹdude ke ererimbot.”—Declaration on Race and Racial Prejudice, 1978.
SE BIBLE ỌDỌHỌDE
Ke Abasi ama okobot Adam ye Eve, enye ama ọdọhọ mmọ ete: “Mbufo ẹtọt ẹnyụn̄ ẹwak ẹnyụn̄ ẹyọhọ ke isọn̄ ẹnyụn̄ ẹkan enye.” (Genesis 1:28) Adam edi ete kpukpru owo, Eve onyụn̄ edi eka kpukpru owo. Ke ini ukwọ okosobode mme owo ke isọn̄, irenowo inan̄ ye iban mmọ ẹkebọhọ, oro edi, Noah ye n̄wan esie, nditọ esie ita ye iban mmọ. Bible ọdọhọ ke kpukpru nnyịn ikoto ubon nditọ Noah.—Genesis 9:18, 19.
Ndi enyene orụk emi ọfọnde akan?
“[Abasi] ama anam kpukpru idụt ubonowo ẹwọn̄ọ ẹto owo kiet, ẹdidụn̄ ke ofụri iso isọn̄.”—Utom 17:26.
SE NDUSỤK OWO ẸTỊN̄DE
Ke n̄kpọ nte isua 100 emi ẹkebede, ndusụk owo ẹma ẹtọn̄ọ ndikere ke orụk mmimọ ọfọn akan. Ke uwụtn̄kpọ, mbon Nazi ẹkedọhọ ke se ntaifiọk ẹkụtde ke idem mmimọ owụt ke orụk mmimọ ọfọn akan. Edi n̄wed UNESCO emi iketịn̄de iban̄a ke ntọn̄ọ ntọn̄ọ ọdọhọ ke “ọfọn kpukpru owo ẹdiana kiet onyụn̄ ọfọn ẹda kpukpru owo ukem ukem.”
SE BIBLE ỌDỌHỌDE
Utom 10:34, 35 ọdọhọ ete: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.” Ke ntak emi, owo ndomokiet ikemeke ndidọhọ ke orụk mmimọ ọfọn akan.
Ke ini Jesus ọkọdọhọde mbet esie ete: “Kpukpru mbufo ẹdi nditọete,” enye okowụt nte mme Christian ẹkpedade kiet eken. (Matthew 23:8) Enye ama ọbọn̄ akam ete mme mbet imọ ‘ẹkabade ẹdi kiet,’ ubahade okûdu.—John 17:20-23; 1 Corinth 1:10.
Ndi asari eyetre tutu amama?
“Ke mme akpatre usen, obot ufọk Jehovah ọyọsọn̄ọ owụhọ . . . ; ndien kpukpru mme idụt ẹyebụn̄ọ ẹka do.”—Isaiah 2:2.
SE NDUSỤK OWO ẸKEREDE
Nte ẹsụk ẹsuade mbon orụk efen anam mme owo ke nsio nsio idụt ẹdọhọ ke mmimọ ikereke ke mbon emi ẹdomode nditre asari ẹyekeme. Ndusụk owo ẹdọhọ ke asari iditreke tutu amama.
SE BIBLE ỌDỌHỌDE
Abasi idiyakke ẹsari mme owo ke nsinsi. Ke Obio Ubọn̄ esie, irenowo ye iban emi “ẹtode kpukpru idụt ye esien ye obio ye usem” ẹyediana kiet ẹnam n̄kpọ Abasi ẹnyụn̄ ẹwụt ke imenen̄ede ima kiet eken. (Ediyarade 7:9) Obio Ubọn̄ Abasi idụhe owo ke esịt. Utu ke oro, enye edi ukara emi edinamde isọn̄ emi etie nte Abasi okoyomde, edinyụn̄ anamde kpukpru orụk asari etre. *
^ ikp. eki. 15 Edieke oyomde ndifiọk n̄kpọ efen mban̄a emi, mbọk kot ibuot 3 ke n̄wed Mme Ntiense Jehovah emi, Nso ke Bible Enen̄ede Ekpep?
Ekeme Ndidi Ayama Mmọ Emi N̄ko
ENYỌN̄-UKPEME
Ini Ewe ke Asari Editre ke Ererimbot?
Se itịbede inọ ndusụk owo owụt ke Bible ekeme ndin̄wam mme owo ẹtre asari. Ini ewe ke asari editre ofụri ofụri ke ererimbot emi?
BIBLE EKEME NDIBỌRỌ MBỤME FO
Nso ke Bible Etịn̄ Aban̄a Owo Ndidọ Owo Emi Otode Ebiet En̄wen?
Kot mme edumbet Bible emi ẹwụtde ke Abasi ada kpukpru owo ukem ukem, ye mbon emi ẹban̄ade ndọ ye asari.
