Ebe ye n̄wan kiet emi ẹdide mme akpan asiakusụn̄ ke ata esịt esịt obio kiet ke Brazil ẹma ẹkop ke n̄kaiferi emi ekerede Valdira ama esikpep Bible ye Mme Ntiense ke isua 13 emi ekebede. Mmọ ẹma ẹdaha ẹka ndiyom enye, ẹsan̄a ke ntọn̄ ntọn̄ usụn̄ ẹnyụn̄ ẹbe nsio nsio inyan̄ emi ẹkemede ndimen owo tutu mmọ ẹkekụt enye ke akpatre. Ama ọdọn̄ Valdira ndifiak  n̄kpep Bible. Edi sia enye okodụn̄de ke obio emi odude ata nsannsan, akana ẹyom usụn̄ nte ẹdisan̄ade ikpep enye n̄kpọ. Valdira ama enyene fon, edi akana enye aka esịt ikọt kiet emi mîkpereke ufọk esie mbemiso enye ekemede ndikop se ẹtịn̄de ọfọn. Enye ekesinyene ini okoneyo kpọt, ke n̄kpọ nte n̄kanika usụkkiet. Kere nte ekpetiede fi ke idem ndikụt n̄kaiferi etiede ikpọn̄ ke esịt ikọt okoneyo, odomo kandle enịm, adian fon ke utọn̄ ekpep Bible.

Valdira esitie ke esịt ikọt oro n̄ko ada fon esie okop se ẹnamde ke mbono esop Sunday. Enye esisan̄a ye Bible, Enyọn̄-Ukpeme, ye n̄wedikwọ esie aka. Ke ini edịm, enye esikama ufụkeyo n̄ko.

Ke March, Valdira ama aka Ufọkmbono Obio Ubọn̄ emi ekekperede enye okodụk san̄asan̄a mbono emi ẹkefiakde ẹsio Edikabade Eke Obufa Ererimbot ke usem Portuguese. To ke ufọk esie sịm do edi itiat 60. Esịt ama enem enye nditiene mbọ obufa Bible oro. Ke ini ẹketorode enye ke kpukpru se enye esinamde man ekeme ndikpep Bible, enye ama ọdọhọ ete: “Oh, isọn̄ke nte mbufo ẹkerede oro!”

Mbon Yukpa ẹdi ata mme amanaisọn̄ America ke Colombia. Frank emi edide akpan asiakusụn̄ ama aduak ndika do n̄kọkwọrọ ikọ, edi ẹma ẹdọhọ enye ke John Jairo emi edide ọbọn̄ obio do ama ebịn mbon ufọkabasi en̄wen emi ẹkekade do ndikwọrọ ikọ. Usen kiet, ke ini John okokopde ke etubom ufọkabasi kiet ke ọbọ mme owo tithe, enye ama aka okotop ikan̄ ke enyọn̄ ndien etubom oro ama asiak itọk.

Frank ọdọhọ ete: “Ke ini isịmde obio oro, akpa owo emi ikọkwọrọde ikọ inọ ekedi kiet ke otu nditọiban John Jairo.  Ke ima ikọnọ eyen oro n̄wed Nso ke Bible Enen̄ede Ekpep? enye ama ọdọhọ ete, ‘Utọ ufọkabasi emi ke nyom ndika!’ onyụn̄ efehe ọkọdọhọ ete esie ke nnyịn imedi. Ete esie ama ọdọhọ yak isọsọp idikụt imọ. Idem ama enyek nnyịn, edi ima ika. Mbemiso itịn̄de n̄kpọ ndomokiet, enye ama ọdọhọ ete: ‘Mmọdiọn̄ọ ke mbufo ẹkpep ata ikọ Abasi. Isua itiaita ko ke edem, mma n̄kụt utọ n̄wed emi ẹnọde eyen mi do ke itie mbio ke Becerril, nnyụn̄ n̄kot enye. Tọn̄ọ oro, ke n̄ketie mbet mbufo ẹdi. Mma ndiọn̄ọ ke usen kiet mbufo ẹyedi mi. Nyom mbufo ẹkpep mi ye ikọtufọk mi ye mbon obio mi Bible. Kpukpru nnyịn iyakpan̄ utọn̄ inọ mbufo.’

“Se ikokopde oro ama anam mmọn̄eyet asiaha nnyịn ke enyịn. Ofụri obio oro ẹma ẹwọrọ ẹdikop ukwọrọikọ  nnyịn; John Jairo akakabade ikọ nnyịn ọnọ mmọ. Ke ini ikoyomde ndinyọn̄, enye ama ọnọ nnyịn ekpri enan̄-mbiomo ida imen mbiomo nnyịn. Idahaemi nnyịn ke inịm ukpepn̄kpọ Bible 47 ye owo 120 ke nsio nsio obio mbon Yukpa, esịnede John Jairo ye eyen esie an̄wan.”

José emi odụn̄de ke Ecuador ekesidi ata owo Catholic. Enye ekewet ete: “Mma nsisua Mme Ntiense Jehovah n̄kpa n̄kpa nnyụn̄ n̄kọbọ mmọ ofụri isua duop. Mma nsitan̄ mme owo ẹkesịn ntịme ye mmọ, ntịm mmọ, nnyụn̄ ndọhọ ke mmọ ẹsan̄a ẹyịp n̄kpọ owo. Ke ini ẹmende mmọ ẹdi itieutom mme bodisi, mma nsidọhọ ẹyak nda ubọk mi n̄kọbi usụn̄ ufọk-n̄kpọkọbi emi ẹsịnde mmọ. Isan̄ kiet,  ima ibiat moto owo mmọ kiet. Ima ikam inụk masịn Ntiense en̄wen isịn ke edịk.

“Ke 2010, mma ndọn̄ọ efiomnsa. Dọkta mi ama ọdọhọ n̄kpọn̄ n̄kan̄ obot obot Andes emi ekebịtde etieti n̄ka usụk usụk emi ofiopde n̄kodu tutu idem ọsọn̄ mi. Mma n̄kodu ke in̄wan̄ iman mi kiet nnyụn̄ nse mban̄a in̄wan̄ oro ikpọn̄. Sia n̄kodude ikpọn̄, ama ọdọn̄ mi ndikụt owo nda nneme nneme. Ndi ọmọdiọn̄ọ mbon emi ẹkedide? Mme Ntiense Jehovah! Mma nneme nneme ye mmọ sia n̄koyomde-yom owo se ision̄o mi ndobo, edi nte mmọ ẹkedade Bible ẹbọrọ kpukpru mbụme mi ama akpa mi idem. Mma nnyịme mmọ ẹkpep mi Bible man ntiene ndiọn̄ọ Bible. Ke mma n̄kekpep ke ọfiọn̄ itiokiet, mma n̄ka ikọ Abasi mmọ. Nte ẹkefọnde ido ye ami ẹnyụn̄ ẹdarade mi ama anam mbụp idem mi nte: ‘Okûdi idụt emi ẹdi ata ikọt Abasi?’ Mma nsịn idem n̄kpep n̄kpọ nnyụn̄ nna baptism ke April 2014.

“Esibiak mi mma nti nte n̄kesikọbọde Mme Ntiense Jehovah. Edi Jehovah ama an̄wam mi n̄kpe ubọk, kpa ye oro mîdịghe kpukpru mmọ ke n̄kekpe. Ke mbono circuit ke October 4, 2014, ẹma ẹnam ndụn̄ọde ye ami ẹban̄a nte n̄kesikọbọde mmọ ẹnyụn̄ ẹbụp mi m̀mê anie ke otu mmọ ke n̄kpenen̄ede nyom ndikpe ubọk. Mma nsọsọp ndọhọ ke n̄kpekpe Brọda Edmundo, edi ke ndiọn̄ọke nte ndisan̄ade n̄kụt enye. N̄kọdiọn̄ọke ke esenyịn circuit ama okot enye edi edem mbot utịn̄ikọ. Ke ini enye ọkọdọkde edi mbot utịn̄ikọ, ima iwan̄a kiet eken ke itọn̄ itua eyet, ndien oro ama anam otuowo ẹtiene ẹtua.”

Usen kiet iban ifan̄ emi ẹdide Mme Ntiense Jehovah ke Asunción ke Paraguay, ẹma ẹkwọrọ ikọ ẹma ke ẹfak emi ẹkedọhọde mmọ ẹkwọrọ. Edi mmọ ẹma ẹdọhọ yak isụk  ika ikọkwọrọ n̄ko ke ufọk ifan̄ emi ekperede do kpa ye oro eyo akasiahade idat idat. Owo mmọ kiet ama ọdọhọ ete: “Udiọn̄ọke m̀mê owo ke ọbọn̄ akam oyom un̄wam.” Ke ufọk kiet, n̄wan kiet ama ọkọm mmọ ye inemesịt onyụn̄ ọdọhọ m̀mê mmọ ẹdi Mme Ntiense Jehovah. Enye ama ọdọhọ ke ọfiọn̄ kiet edi emi ikoto Bolivia idi Paraguay ke ntak utom imọ, ke ẹma ẹsikpep imọ Bible do. Owo ikekemeke nditeme enye nte akpanamde okụt Mme Ntiense. Ntre enye ama ọbọn̄ akam ete: “Jehovah mbọk nam mme ntiense fo ẹkụt mi.” Kpa usen oro ke Mme Ntiense oro ẹkeka ufọk esie, ndien mmọ ẹma ẹdiomi ndikpep enye Bible.