INDONESIA
Ọfis ke Ikpaenyọn̄
Nsio nsio ọfis ẹdu ke ọyọhọ enyọn̄ 31
Ke 2008, mme asuanetop ke Indonesia ẹma ẹsịm 21,699. Ima iyom akamba ọfis sia akani ọfis nnyịn ikekemke aba utom emi akanade ẹnam. N̄ko, ikoyom obufa ọfis emi ekperede Jakarta sia akani oro ekededịbe ke ntak emi ẹkebọpde enye ke ini ẹketrede utom nnyịn.
Ke n̄kpọ nte isua iba ama ekebe, nditọete ẹma ẹdep ọyọhọ enyọn̄ 31 ke akamba ufọkenyọn̄ emi enyenede enyọn̄ 42; ufọk oro odu ke esịt Jakarta. Ẹma ẹdep enyọn̄ 12 ke ufọkenyọn̄ en̄wen ke mbọhọ oro man owo 80 m̀mê akande oro ke Bethel ẹdụn̄. Ẹma ẹnyụn̄ ẹdep ufọkenyọn̄ emi enyenede enyọn̄ ition ẹda ẹnam ndusụk ọfis.
Mbon Bethel ẹdụn̄ ke nsio nsio enyọn̄ 12 ke ufọkenyọn̄ emi
Nditọete emi ẹsibọpde n̄kpọ ẹnọ esop Abasi ẹma ẹto nsio nsio idụt ẹdidiana ye mme ọbọpufọk do ẹkpụhọ ndusụk n̄kpọ ke mme ufọk oro. Darren Berg, emi ekesede aban̄a utom oro ọdọhọ ete: “Jehovah ama an̄wam nnyịn inam mme n̄kpọ emi ẹketiede nte ke owo idikemeke ndinam. Ke uwụtn̄kpọ, ima iyom ndisịn n̄kpọ emi ẹdidade inam mbat mmọn̄ afiak asana, edi ukara ikenyịmeke sia mmọ ikekwe utọ n̄kpọ oro akpa. Edi eyenete emi otode Indonesia onyụn̄ ọdiọn̄ọde n̄kpọ aban̄a n̄kpọ oro ama ekenyene nneme ye akamba owo ukara kiet. Enye ama enyịme inam onyụn̄ ọdọhọ ke imenịm ke nnyịn idinam nnennen n̄kpọ.”
“Nnyịn idịbeke aba. Mme owo ẹdiọn̄ọ Mme Ntiense Jehovah idahaemi. Mmọ ẹkụt ke nnyịn imomụm isọn̄ ke Indonesia”
Ẹma ẹyak mbufa ufọk oro ẹnọ Abasi ke February 14, 2015. Owo Otu Emi Ẹsede Ẹban̄a Utom Mme Ntiense Jehovah, emi ekerede Anthony Morris III, ọkọnọ utịn̄ikọ ediyak nnọ. Owo Kọmiti N̄kọk Itieutom emi ekerede Vincent Witanto Ipikkusuma ọdọhọ ete: “Nnyịn idu idahaemi ke akwa obio emi ikpọ mbubehe ọyọhọde ke Indonesia. Nnyịn idịbeke aba. Mme owo ẹdiọn̄ọ Mme Ntiense Jehovah idahaemi. Mmọ ẹkụt ke nnyịn imomụm isọn̄ ke Indonesia.”
Kọmiti N̄kọk Itieutom, to ke ufien ka nnasia: Budi Sentosa Lim, Vincent Witanto Ipikkusuma, Lothar Mihank, Hideyuki Motoi
“Ukwọrọikọ Enem ke Obio Emi Utọ Oro Idụhe!”
Ke isua ifan̄ emi osụk ebede, ediwak Mme Ntiense ẹto nsio nsio idụt ẹka Indonesia. Lothar Mihank ọdọhọ ete: “Nditọete emi ẹtode idụt en̄wen ẹn̄wam ediwak idụt utọ nte eke nnyịn. Mmọ ẹnam esop emi mmọ ẹdude enem, ẹnam nditọete ẹsọn̄ idem, ẹkpep mmọ ediwak n̄kpọ, ẹnyụn̄ ẹnam mmọ ẹkụt ke idi kiet ke ofụri ererimbot.” Ntak emi nditọete oro ẹkekade Indonesia? N̄kpọ etie didie ye mmọ do? Yak ndusụk mmọ ẹda inua mmọ ẹtịn̄.
Mbon Emi Ẹdide Ẹdin̄wam
1. Janine ye Dan Moore
2. Mandy ye Stuart Williams
3. Casey ye Jason Gibbs
4. Mari ye Takahiro Akiyama (Mari ada ke iso ke ubọk nnasia, Takahiro ada enye ke edem)
Jason ye Casey Gibbs emi ẹketode United States ẹka ẹdọhọ ete: “Ima ise idụt kiet kiet ye ibat owo emi anade Ntiense kiet do ọkwọrọ ikọ ọnọ. Ikese ke N̄wedisua, ndien ima ikụt ke Indonesia esịne ke otu idụt emi anade Ntiense kiet ọkwọrọ ikọ ọnọ ata ediwak owo. Ekem mme ufan nnyịn emi ẹkekade idụt en̄wen ẹken̄wam ẹma ẹdọhọ nnyịn ke ẹnen̄ede ẹyom un̄wam ke Indonesia. Ntre ima ikot ọfis ke Indonesia, mmọ ẹdọhọ ika Bali. Ikọsọn̄ke nnyịn ndin̄wam mme owo do sia ini oro ke ẹketọn̄ọ ndiyom mbon emi ẹsemde Ikọmbakara n̄kwọrọ ikọ nnọ ke Indonesia. Ikọdọhọ ke ididu isua kiet, edi imodu isua ita idahaemi. Akpa ini emi ediwak mmọ ẹkopde n̄kpọ ẹban̄a Mme Ntiense Jehovah esidi ke ini ikwọrọde ikọ inọ mmọ. Ukwọrọikọ ọfọn tutu!”
Stuart ye Mandy Williams, emi ẹtode Australia ẹnyụn̄ ẹdide n̄kpọ nte isua 50 idahaemi ẹdọhọ ẹte: “Ikedi Indonesia sia ikoyom mbon emi ẹyomde-yom akpanikọ. Imesikụt ata ediwak nditọ ufọkn̄wed ntaifiọk emi ẹsemde Ikọmbakara ke Malang ke East Java. Mmọ ẹsima ukwọrọikọ nnyịn etieti ẹnyụn̄ ẹma jw.org! Ukwọrọikọ enem ke n̄kan̄ emi tutu.”
Takahiro ye Mari Akiyama, emi ẹdide mme asiakusụn̄ ke Yogyakarta ke Java, ẹdọhọ ẹte: “Imenyene emem mi ikan ini ikodude ke Japan. Mme owo ẹfọn ido ẹnyụn̄ ẹtie ufan ufan. Ediwak owo, akpan akpan n̄kparawa, ẹma ndidiọn̄ọ n̄kpọ mban̄a nsio nsio ido ukpono. Imesinịm okpokoro ke ebiet emi mme owo ẹsiwakde ida ikwọrọ ikọ. Ndien usen kiet mme owo ẹma ẹbọ n̄kpọ nte magazine 2,600 ke hour ition kpọt.”
Dan ye Janine Moore, ebe ye n̄wan emi ẹdide n̄kpọ nte isua 60 ẹdọhọ ẹte: “Mme owo ẹsidi ẹdiyọhọ nnyịn idem ke ini ikade ukwọrọikọ. Imesisak ekpri ke ini ikụtde mmọ, ndien mmọ ẹsitiene nnyịn ẹsak. Mmọ ẹsiyom ndidiọn̄ọ se inamde, ndien ke ini itịn̄de inọ mmọ, mmọ ẹsima ẹnyụn̄ ẹdọhọ ke ikpama ndidiọn̄ọ mme n̄kpọ en̄wen. Ke ini iwụtde mmọ se Bible etịn̄de, ndusụk mmọ ẹsidọhọ, ‘Ndi mmekeme ndiwet nnịm?’ Esikpa mmọ idem ndikụt nti item emi odude ke Bible. Imodu mi iyọhọ isua kiet, abiak nnyịn nte nnyịn mîkabakke idi. Ikoyom itie emi owo mîkwọrọke ikọ kan̄a, ndien enye ke idu emi!”
Misja Beerens ye Kristina an̄wan esie ẹkeka do nte mme isụn̄utom ke 2009, edi enye edi esenyịn circuit idahaemi. Mmọ ẹdọhọ ẹte: “Idem ke Madura Island ke East Java, emi ata mbon Muslim ẹwakde ẹkan, mme owo ẹma ukwọrọikọ nnyịn. Mme owo ẹsiwat moto ẹdituak ẹda ẹdọhọ inọ mmimọ magazine. Mmọ ẹsidọhọ ẹte: ‘Ami ndi Muslim, edi mmesima ndikot magazine emi. Ndi ẹmekeme ndinọ mi awak man nda nsọk mme ufan mi?’ Ukwọrọikọ enem ke obio emi utọ oro idụhe!”
N̄kpọ Adat Se Ẹkpen̄ede
Ke ini Frank Rice ekesịmde Jakarta ke 1931, n̄kpọ nte owo 60,000,000 ẹkedu ke ofụri Indonesia. Edi mfịn mme owo ẹkpere ndisịm 260,000,000 ke idụt oro; enye edi ọyọhọ idụt inan̄ emi mme owo ẹwakde ẹkan ke ofụri ererimbot.
Mme Ntiense Jehovah ke ẹwak n̄ko ke Indonesia. Owo duop kpọt ẹkedi Mme Ntiense do ke 1946, ke ọyọhọ ekọn̄ ererimbot iba ama okokụre. Edi mmọ ẹbe 26,000 mfịn, ndien emi owụt ke Jehovah ke ọdiọn̄ mmọ! Mmọ ẹyewawak ẹkan oro sia owo 55,864 ẹkedụk Editi ke 2015.
Jesus ọkọdọhọ ete: “Ke akpanikọ, idọk okpon, edi mme anamutom iwakke. Mmọdo, ẹben̄e Enyene-idọk ẹte enye osio mme anamutom ọnọ ẹdi ke idọk esie.” (Matt. 9:37, 38) Mme Ntiense ke Indonesia ẹnịm se Jesus eketịn̄de oro. Mmọ ẹbiere ndika iso nsịn idem nnam ẹnọ enyịn̄ Jehovah ubọn̄ ke ofụri idụt oro.—Isa. 24:15.
