Utịt utịt isua 32 eyo Christ edi emi, n̄kpọ nte isua ita ẹdi emi n̄ko tọn̄ọ Jesus akana baptism. Ibịghike enye ye mme mbet esie ẹkenyọn̄ Usọrọ Mme Ataya ke Jerusalem. Etie nte mmọ ẹsụk ẹdodu ke mbọhọ Jerusalem. (Luke 10:38; John 11:1) Ke ọfiọn̄ itiokiet emi Jesus enyenede ndikwọrọ ikọ, enye ọkwọrọ ikọ ke Judea m̀mê ke Akpa Jordan ke n̄kan̄ Perea. Edi se ẹkwọrọde ikọ ke n̄kan̄ emi n̄ko.

Mbemiso emi, Jesus ama adada ọfiọn̄ ifan̄ ọkwọrọ ikọ ke Judea ke ẹma ẹkekụre Passover isua 30 onyụn̄ asan̄a ke Samaria ebe aka Galilee. Ekem ke Passover eke isua 31, mme Jew ẹma ẹdomo ndiwot enye ke Jerusalem. Ke isua kiet ye ubak emi ẹketienede, Jesus ekenen̄ede ọkwọrọ ikọ ke Galilee ke enyọn̄-enyọn̄. Ini oro, ediwak owo ẹma ẹkabade ẹdi mbet esie. Ke Galilee ke Jesus ọkọnọ mme apostle esie ukpep, ọdọn̄ mmọ ẹkekwọrọ ikọ, onyụn̄ ọdọhọ mmọ ete: “Ẹkwọrọ ẹte, ‘Obio ubọn̄ heaven ke asan̄a ekpere.’” (Matthew 10:5-7) Idahaemi enye oyom ndinam ẹkwọrọ ikọ ke Judea.

Jesus ebem iso kan̄a emek mbet 70 onyụn̄ ọdọn̄ mmọ ẹsan̄a iba iba ẹkekwọrọ ikọ. Oro ọwọrọ ke otu 35 ẹkwọrọ ikọ ke ebiet emi. “Idọk okpon [do], edi mme anamutom iwakke.” (Luke 10:2) Jesus ọdọhọ mmọ ẹbem imọ iso ẹka mme ebiet emi imọ idikade. Ẹdọhọ mbet 70 oro ẹkọk mme owo udọn̄ọ ẹnyụn̄ ẹkwọrọ ukem n̄kpọ emi Jesus esikwọrọde.

Owo idọhọke mbet emi ẹka ẹkekwọrọ ikọ ke mme synagogue. Jesus ọdọhọ mmọ ẹka ufọk mme owo ẹkekwọrọ ikọ. Enye ọnọ mmọ item ete: “Ufọk ekededi eke mbufo ẹdụkde, ẹbem iso ẹdọhọ ẹte, ‘Emem akpakam odu ke ufọk emi.’ Ndien edieke eyen emem odude do, emem mbufo oyodoro enye ke idem.” Edi nso ke mmọ ẹdikwọrọ? Jesus ọdọhọ ete: “Ẹdọhọ mmọ ẹte, ‘Obio ubọn̄ Abasi amasan̄a ekpere mbufo.’”—Luke 10:5-9.

Item emi Jesus ọnọde owo 70 emi ebiet enye emi enye ọkọnọde apostle 12 ke ini enye ọkọdọn̄de mmọ ẹkekwọrọ ikọ n̄kpọ nte isua kiet emi ekebede. Enye ọdọhọ mmọ ke idịghe kpukpru owo emi mmọ ẹkade ẹbịne ẹdima mmọ. Edi akana mmọ ẹkenyene nneme ye mbon emi ẹmade Ikọ Abasi, man ke ini Jesus Eteufọk mmọ edidide, ediwak owo emi ẹmade Ikọ Abasi do ẹtetie ẹbet ndikụt enye nnyụn̄ n̄kpep n̄kpọ nto enye.

Ibịghike-bịghi, owo 70 emi ẹma ẹkwọrọ ikọ ẹma ẹnyụn̄ ẹfiak ẹbịne Jesus. Mmọ ẹtịn̄ ye idatesịt ẹnọ Jesus ẹte: “Ọbọn̄, kpa mme demon ẹsụk ibuot ẹnọ nnyịn ke enyịn̄ fo.” Se Jesus etịn̄de ye mmọ owụt ke esịt enem enye. Enye ọdọhọ mmọ ete: “Mma n̄kụt Satan otode ke heaven ọduọ nte emịnen̄mịnen̄. Sese! Mmọnọ mbufo odudu ndidịghi urụkikọt ye ikpeyen ke ikpat.”—Luke 10:17-19.

 Jesus ndidọhọ ke mbet imọ ẹyedịghi urụkikọt ye ikpeyen ke ikpat ọwọrọ ke mbet imọ ẹyekan mfịna ekededi emi ekemede ndinam mmọ n̄kpọ. Efen edi ke nte ini akade, ẹyesio Satan ke heaven ẹduọk. Jesus anam mbet 70 oro ẹdiọn̄ọ se ikam inen̄erede idi akpan n̄kpọ ikan kpukpru se itịbede emi. Enye ete mmọ: “Ẹkûdara ẹban̄a emi, ẹte mme spirit ẹsụk ibuot ẹnọ mbufo, edi ẹdara koro ẹma ẹwet enyịn̄ mbufo ke heaven.”—Luke 10:20.

Esịt enem Jesus tutu, enye onyụn̄ ada do ke iso mmọ ọkọm Ete esie nte enye adade mbet imọ emi ẹsụhọrede idem mi anam utọ ikpọ n̄kpọ oro. Ekem enye ọdọhọ mbet esie ete: “Mbon emi enyịn mmọ okụtde mme n̄kpọ eke mbufo ẹkụtde ẹkop inemesịt. Koro ndọhọ mbufo nte, Ama ọdọn̄ ediwak mme prọfet ye ndidem ndikụt mme n̄kpọ emi mbufo ẹkụtde mi edi mmọ ikekwe, ndinyụn̄ n̄kop mme n̄kpọ emi mbufo ẹkopde mi edi mmọ ikokopke.”—Luke 10:23, 24.