Ke usen duop ama ekebe tọn̄ọ nte Jesus ọkọnyọn̄ heaven, ẹma ẹnọ mme mbet edisana spirit ke usen Pentecost. Emi ama owụt ke Jesus esịm heaven. N̄kpọ en̄wen ama etịbe emi okowụtde ke enye esịm heaven. Mbemiso ẹtọn̄ọde Stephen ẹwot ke ntak emi enye ọkọkwọrọde ikọ, enye ama ọdọhọ ete: “Sese! Mmokụt enyọn̄ nte ebererede ye Eyen owo nte adade ke ubọk nnasia Abasi.”—Utom 7:56.

Ke ini Jesus ọnyọn̄de ekesịm Ete esie ke heaven, enye ekenyene ndibet tutu ekem ini emi anade enye anam se ẹkewetde ke N̄wed Abasi. Spirit Abasi ama anam David ewet ete: “Jehovah ọdọhọ Ọbọn̄ mi [Jesus] ete: ‘Tie mi ke ubọk nnasia tutu nda mme asua fo nnịm nte udoriukot fo.’” Ke Abasi ama akanam mme asua Jesus ẹdi udoriukot, Jesus ayaka ‘akakan mme asua esie.’ (Psalm 110:1, 2) Edi nso ke Jesus edinam ke heaven ke ini enye mîkanke kan̄a mme asua esie?

Ẹma ẹtọn̄ọ esop Christian ke Pentecost eke isua 33. Jesus ama etie ke heaven akara mme mbet esie emi ẹkedade edisana spirit ẹyet aran. (Colossae 1:13) Enye ama an̄wam mmọ ke utom ukwọrọikọ mmọ onyụn̄ etịm mmọ idem ọnọ utom emi mmọ ẹdinamde ke ini iso. Nso utọ utom edidi oro? Mbon emi ẹnamde akpanikọ tutu esịm n̄kpa ẹyeset ẹketiene Jesus ẹkara ke Obio Ubọn̄ oro ke heaven.

Owo kiet emi inen̄erede idiọn̄ọ, emi editienede Christ ikara edi Saul. Ẹkenen̄ede ẹdiọn̄ọ enye nte Paul; enyịn̄ Rome esie ekedi emi. Enye ekedi eyen Jew, ama esinyụn̄ esịn idem enịm Ibet Abasi, edi mme adaiso ido ukpono mme Jew ẹma ẹtụn enye usụn̄ tutu enye enyịme ẹwot Stephen. Enye ama “esịn mbet Ọbọn̄ ndịk ke idem onyụn̄ oyom ndiwot mmọ,” ekem aka Damascus ndikomụm mmọ. Caiaphas emi ekedide Akwa Oku ọkọnọ enye odudu ete aka do okomụm mbet Jesus emen edi Jerusalem. (Utom 7:58; 9:1) Nte Saul osụk akade ke usụn̄, un̄wana ama akan enye okụk, enye onyụn̄ ọduọ ke isọn̄.

Enye ama okop uyo ọdọhọde enye ete: “Saul, Saul, ntak emi afo ọkọbọde mi?” Saul ama obụp ete: “Afo edi anie, Ọbọn̄?” Uyo oro afiak  ọdọhọ enye ete: “Ami ndi Jesus, emi afo ọkọbọde.”—Utom 9:4, 5.

Jesus ama ọdọhọ Saul aka Damascus ekebet tutu imọ itịn̄ se enye edinamde. Edi ẹkemomụm Saul ẹka do sia un̄wana oro ama anam enye oforo nnan. Mbet Jesus emi ekerede Ananias ke Damascus ama okụt n̄kukụt. Ke n̄kukụt oro, Jesus ama eteme enye ebiet emi enye edikade ikokụt Saul. Ndịk ama anam Ananias ndika, edi Jesus ama ọdọhọ enye ete: “Owo emi edi owo eke mmekde nte ada enyịn̄ mi aka iso mme idụt ye ndidem ye nditọ Israel.” Ẹma ẹnam Saul afiak okụt usụn̄, enye ama onyụn̄ “ọtọn̄ọ ndikwọrọ Jesus . . . ete ke Enye edi Eyen Abasi.”—Utom 9:15, 20.

Jesus ama an̄wam Paul ye mbon eken ndisịn ifịk nnam utom ukwọrọikọ emi enye ọkọtọn̄ọde. Abasi ama ọdiọn̄ onyụn̄ anam mmọ ẹkụt unen. Ke n̄kpọ nte isua 25 ẹma ẹkebe tọn̄ọ ke ini emi Jesus owụtde Paul idem ke usụn̄ emi enye asan̄ade aka Damascus, Paul ama ewet ete ke ẹkwọrọ eti mbụk “ẹnọ kpukpru edibotn̄kpọ ke idak ikpaenyọn̄.”—Colossae 1:23.

Ke ediwak isua ama ekebe, Jesus ama anam apostle John emi enye akamade etieti okụt nsio nsio n̄kukụt. Mme n̄kukụt emi ẹdu ke n̄wed Ediyarade ke Bible. Mme n̄kukụt emi ke John akada okụt nte Jesus ọtọn̄ọde ukara ke Obio Ubọn̄ heaven. (John 21:22) “[John okodu] ke usen Ọbọn̄ ke odudu spirit.” (Ediyarade 1:10) Ini ewe ke se enye okokụtde emi eketịbe?

Imetịm idụn̄ọde prọfesi Bible inyụn̄ ikụt ke “usen Ọbọn̄” ọkọtọn̄ọ ke eyo nnyịn. Akpa ekọn̄ ererimbot ama ọtọn̄ọ ke isua 1914. Tọn̄ọ oro, imokụt ekọn̄, ndiọi udọn̄ọ, akan̄, unyekisọn̄, ye mme n̄kpọ en̄wen emi Jesus ọkọdọhọde mme apostle esie ke ẹdidi “idiọn̄ọ edidu” imọ ye eke “akpatre ini.” (Matthew 24:3, 7, 8, 14) Owo ikwọrọke ikọ ke mme obio emi mbon Rome ẹkekarade kpọt, edi ẹkwọrọ ke ofụri ererimbot.

Abasi ama ọnọ John spirit esie ewet se mme n̄kpọ emi ẹdade ẹban̄a. Enye ọkọdọhọ ete: “Ke emi edinyan̄a ye odudu ye obio ubọn̄ Abasi nnyịn ye odudu Christ esie ẹmedi.” (Ediyarade 12:10) Emi ọwọrọ ke Obio Ubọn̄ Abasi emi Jesus ekesikwọrọde aban̄a ọtọn̄ọ ndikara ke heaven!

Kpukpru mbon emi ẹdide ata mbet Jesus ẹda emi nte eti mbụk. Mmọ ẹda ikọ John emi ẹdọn̄ idem mmọ esịt, oro edi: “Ntre ẹdara, mbufo mme heaven ye mbufo emi ẹdụn̄de ke esịt! Mbọm isọn̄ ye inyan̄, koro Devil omosụhọde etiene mbufo, enye asan̄a ye akwa iyatesịt, sia enye ọfiọkde ete ini imọ edi ibio.”—Ediyarade 12:12.

Jesus ibetke aba ke ubọk nnasia ete esie. Enye ke akara idahaemi, ndien enye ọmọn̄ osobo kpukpru mme asua esie ke mîbịghike. (Mme Hebrew 10:12, 13) Nso nti n̄kpọ ke idikụt ke ini iso?