Ke Jehovah ama akanyan̄a nditọ Israel osio ke ubọk Pharaoh ye udịmekọn̄ esie ke Ididuot Inyan̄, nditọ Israel ẹma ẹnen̄ede ẹkọm enye. Nnyịn n̄ko imọkọm Jehovah ke se enye anamde ọnọ nnyịn. Imọfiọk ke idem ekeme ndisọp mmem nnyịn ke ini isobode idomo. Edi edieke itiede ikere kpukpru se Jehovah anamde ọnọ nnyịn, emi ekeme ndisọn̄ọ nnyịn idem ke mme utọ ini oro.

 N̄kpọ kiet emi Jehovah anamde ọnọ nnyịn edi ndin̄wọn̄ọ ke n̄kpọ ekededi oro anamde esịt ọduọ nnyịn onyụn̄ anamde ikop ubiak eyetre. Imọdiọn̄ọ ke Jehovah idikpọn̄ke nnyịn ọkpọkọm nso iwọrọ nnyịn. Edima Ete nnyịn ọnọ nnyịn se ededi oro edin̄wamde nnyịn inam n̄kpọ esie. Enye iditreke ndidi “ebiet ubọhọ nnyịn ye odudu nnyịn, un̄wam emi ikemede ndisọp n̄kụt ke mme ini nnanenyịn.” (Ps. 46:1) Nditie n̄kere se enye anamde ọnọ nnyịn ayan̄wam nnyịn iyọ se iwọrọde nnyịn, ọkpọkọm n̄kpọ enye oro ọdiọk didie. Ke ofụri isua 2015, ẹyak inen̄ede ikere iban̄a kpukpru se Jehovah anamde ọnọ nnyịn inyụn̄ ‘ikọm enye, koro enye ọfọnde, koro ima-mfọnido esie odude ke nsinsi.’—Ps. 106:1.