DOMINICAN REPUBLIC
Ẹkọbi Mmọ Ẹnyụn̄ Ẹtre Utom Mmọ
Ẹkọbi Mmọ Sia Mîmaha Ndidụk Ekọn̄
Enrique Glass ye n̄kịmn̄kịm ufọk-n̄kpọkọbi idakisọn̄ emi enye ekesịnede urua iba
Ke June 19, 1949, ndusụk mbon Dominican Republic emi ẹkefen̄ede ẹka idụt en̄wen ẹma ẹdụk ubomofụm ẹdi idụt oro man ẹdibọ Rafael Trujillo ukara. Kpa ye oro owo mîkayakke emi etịbe, Trujillo ama anam ẹkọbi mbon emi mîmaha ndidụk ekọn̄ ye owo ekededi emi ukara adade nte asua. León, Enrique, ye Rafael Glass ẹkesịne ke otu Mme Ntiense emi ẹkebemde iso ẹkọbi ke ntak emi mîmaha ndidụk ekọn̄; ẹma ẹnyụn̄ ẹkọbi mbon itieutom mme León emi ẹkedide Mme Ntiense.
León ọdọhọ ete: “Mbonekọn̄ emi ẹsimụmde owo ẹkedụn̄ọde ke ndịbe ẹma ẹmụm [mi ye mbon itieutom nnyịn] ẹkebụp mbụme. Ke ẹma ẹkesịn nnyịn ndịk ke idem, mmọ ẹma ẹsana nnyịn ẹyak, edi ke usen ifan̄ ẹbede ẹkot nnyịn ẹte ididụk ekọn̄ kpa ye emi owo mîsinamke ntem. Sia nnyịn mîkamaha ndidụk, ẹma ẹtan̄ nnyịn ẹkekọbi. Ima ikụt Ntiense inan̄ en̄wen ke ufọk-n̄kpọkọbi oro, iba ẹkedi ata nditọeka mi. Nte ini akade ẹma ẹsana nnyịn ẹyak, edi ẹfiak ẹmụm nnyịn ẹkekọbi. Ẹma ẹnam nnyịn ntem utịm ikata. Usen ifan̄ kpọt ẹkesibe mbemiso ẹfiakde ẹdimụm nnyịn. Ofụri ini emi ẹkekọbide nnyịn ama ekpere isua itiaba, eke akpatre ini ekedi n̄kpọkọbi isua ition.”
‘Idem ke ini ẹkekamade eto, ikpa, ye etak ikan̄ ẹtịm nnyịn, ima isiyọ sia Jehovah akan̄wamde nnyịn’
Uwem ikememke inọ nditọete ke ufọk-n̄kpọkọbi. Mbon n̄kpọkọbi ye mme ekpeme ufọk-n̄kpọkọbi ẹma ẹsisụn̄i mmọ okoneyo ye uwemeyo. Ẹkebem iso ẹkọbi mmọ ke Fort Ozama. Akwaowo emi ekesede aban̄a ufọk-n̄kpọkọbi oro ọkọdọhọ ete: “Mbufo ẹdi Mme Ntiense Jehovah, ẹma ẹkabade ẹdi mme ntiense Devil, mbufo ẹdọhọ mi man nsana mbufo nyak.” Utọ mme owo emi ikekemeke ndinam nditọete ẹbiat ibet Abasi. León ọdọhọ ete: ‘Kpukpru ini Jehovah ama esin̄wam nnyịn iyọ. Ima isikụt nte enye an̄wamde nnyịn idem ke n̄kpri n̄kpri n̄kpọ. Idem ke ini ẹkekamade eto, ikpa, ye etak ikan̄ ẹtịm nnyịn, ima isiyọ sia Jehovah akan̄wamde nnyịn.’
Ẹtre Utom Mme Ntiense Jehovah
Mbon emi ẹsuade ikọt Jehovah ke ẹkesịn idem ẹkọbọ mmọ ke nsio nsio ebiet ke idụt oro. Kpa ye emi, ke May 1950, mme asuanetop 238 ẹkedu ke Dominican Republic, owo ibatke mme isụn̄utom isịn. Mme asuanetop 21 ke otu emi ẹkedi mme asiakusụn̄ ofụri ini.
N̄wedmbụk n̄kpọntịbe emi ọdọhọde ke ẹkọbi nditọete nnyịn emi mîmaha ndidụk ekọn̄
Kpa ke ukem ini oro, owo n̄ka emi ẹsimụmde mme owo ẹkedụn̄ọde ke ndịbe ama ewet akwaowo emi esede aban̄a mbubehe Dominican Republic ete: “Mbon ufọkabasi Mme Ntiense Jehovah ke ẹsịn idem ẹkwọrọ ikọ mmọ ke kpukpru ebiet ke obio emi [Ciudad Trujillo].” Enye ama adian do ete: “Mfafiak ndọhọ fi nte etịm ese Mme Ntiense Jehovah emi sia mmọ ke ẹda ukwọrọikọ mmọ ye mme n̄kpọ mmọ eken ẹbian̄a mme owo, akpan akpan mbon emi enyịn mînen̄ekede itara.”
Akwaowo en̄wen emi ekekerede J. Antonio Hungría ama ọdọhọ Brọda Brandt ewet leta etịn̄ nte Mme Ntiense ẹdade utom ekọn̄, ndikọm ọfọn̄ etakubom, ye ukpe tax. Brọda Brandt okosio n̄kpọ ke n̄wed “Yak Abasi Edi Akpanikö” ewet leta emi. Kpa ye se enye ekewetde, ke June 21, 1950, Hungría ama okot ewụhọ emi ọdọhọde ke ẹtre utom Mme Ntiense Jehovah ke Dominican Republic. Ẹma ẹdọhọ Brọda Brandt edi ọfis Hungría edikop nte ẹdikotde ewụhọ emi. Brọda Brandt ama obụp m̀mê ẹyedọhọ mme isụn̄utom ẹkpọn̄ idụt oro. Hungría ama ọbọrọ enye ete ke mme isụn̄utom ẹkeme ndisụk ndu edieke mmọ ẹnịmde ibet ukara mînyụn̄ ikwọrọke ikọ ido ukpono mmọ inọ mbon en̄wen. *
^ ikp. 10 Urua ifan̄ mbemiso ẹkotde ewụhọ oro, mme oku Catholic ẹma ẹwet ediwak ndiọi n̄kpọ ẹban̄a Mme Ntiense Jehovah ke n̄wedmbụk n̄kpọntịbe ẹnyụn̄ ẹdọhọ ke mmọ ẹdi mbon n̄ka Communist.
