Ke Sunday, April 1, 1945, Lennart ye Virginia Johnson emi ẹma ẹkeka Ufọkn̄wed Gilead ẹma ẹdisịm ibuot obio Dominican Republic. Ẹkesikot ibuot obio emi Ciudad Trujillo, edi ẹkot Santo Domingo idahaemi. Mmọ ẹkedi akpa Ntiense ke idụt emi ẹken̄wanade nsio nsio en̄wan mbemiso ẹnyenede ukara-idem mi. * N̄wedisua 1946 ọkọdọhọ ete: “Efakutom emi ọfọn ye mme asiakusụn̄ etieti, ndien mbon Gilead emi ẹkebem iso ẹtọn̄ọ utom mi.” Kere nte n̄kpọ eketiede ye mme isụn̄utom oro: N̄kọk itieutom ikodụhe, Ufọkmbono Obio Ubọn̄ idụhe, esop ndomokiet idụhe, mmọ idiọn̄ọke owo ndomokiet do, inen̄ekede idiọn̄ọ Spanish, inyeneke ufọk, inyụn̄ inyeneke n̄kpọ ndụn̄ ufọk. Mmọ ẹditọtọn̄ọ ke m̀mọ̀n̄?

Lennart ọdọhọ ete: “Ima ikọbọ ufọk ke Victoria Hotel. Ẹkebọ nnyịn mbiba dollar ition ke usen ke udia ye ubet emi ikanade. Ima itọn̄ọ akpa ukpepn̄kpọ Bible nnyịn uwemeyo usen oro. Eketịbe ntem: Iban Dominican Republic iba emi ikesikpepde Bible ke Brooklyn ẹma ẹnọ nnyịn enyịn̄ iman ye mme ufan mmọ. Kiet ke otu mmọ ekedi Dr. Green. Ke ini ikakade ibịne ete emi, ima ikụt mbọhọidụn̄ esie emi ekekerede Moses Rollins. Ke ima iketịn̄ inọ mmọ nte ikasan̄ade inyene enyịn̄ ye adres mmọ, mmọ ẹma ẹnen̄ede ẹkpan̄ utọn̄ ẹkop etop Obio Ubọn̄ ẹnyụn̄ ẹnyịme ndikpep Bible. Ibịghike-bịghi Moses ama akabade edi akpa eyen idụt oro, emi ekedide asuanetop.”

 Isụn̄utom inan̄ en̄wen ẹma ẹdisịm ke June 1945. Ibịghike-bịghi mmọ ẹma ẹnọ mme owo ediwak n̄wed ẹnyụn̄ ẹtọn̄ọ ndikpep ediwak owo Bible. Etisịm October isua oro, mmọ ẹma ẹdikụt ke oyom mmimọ inyene itie emi idinịmde mbono esop. Ntre, mmọ ẹma ẹsion̄o ndusụk n̄kpọ ke ufọtufọk ye ke itie udia mmọ man ẹnyene ekpri itie ẹnịm mbono esop. Owo 40 ẹma ẹsidụk mbono esop.

Pablo Bruzaud ekesịne ke otu owo ifan̄ emi ẹkebemde iso ẹdụk esop. Kpukpru owo ẹkesikot enye Palé. Enye ekesiwat bọs emen owo ke Santiago aka Ciudad Trujillo onyụn̄ emen ọnyọn̄. Enye ama esika Ciudad Trujillo ke ubọk ke ubọk. Usen kiet ke ini enye okodude do, enye ama enyene nneme ye Ntiense iba onyụn̄ ọbọ mmọ n̄wed “The Truth Shall Make You Free” (Akpanikọ Ayanam Mbufo Ẹwọrọ Ufụn). Mmọ ẹma ẹtọn̄ọ ndikpep enye Bible kpukpru usen. Ibịghike-bịghi, Palé ama ọtọn̄ọ ndisan̄a ye mme isụn̄utom emi n̄kwọrọ ikọ esinyụn̄ emen mmọ aka ebiet emi mmọ ẹyomde ndika n̄kọkwọrọ ikọ. Nte ini akade, enye ama okụt Lennart Johnson onyụn̄ asan̄a ye enye oto Ciudad Trujillo aka Santiago, ekem ẹbe ẹka Puerto Plata emi okodude ekpere mmọn̄, man ẹkese mbon emi ẹkemade Ikọ Abasi do, emi ẹkesiwetde leta ẹnọ ibuot itieutom Mme Ntiense Jehovah ke Brooklyn ke New York.

Ke March 1946, Brọda Nathan Knorr ye Brọda Frederick Franz ẹma ẹto ibuot itieutom ẹdi Dominican Republic. Mme owo ẹketetie ẹbet mmọ ẹdi, ndien owo 75 ẹketiene nditọete ẹka ẹkekop utịn̄ikọ Brọda Knorr. Ke ini Brọda Knorr okodude do, enye ama ọdọhọ ẹtọn̄ọ n̄kọk itieutom ke Dominican Republic.

Ẹma ẹfiak ẹnọ mme isụn̄utom ẹdi, ndien etisịm utịt isua utom 1946, mme asuanetop 28 ẹma ẹdu ke idụt oro.  Sia edide ẹketọtọn̄ọ ukwọrọikọ do ini oro, mme isụn̄utom ẹma ẹsitie ke mbubreyo ẹkama n̄wed ndise obio ẹwet map efakutom man ẹkụt ẹte ke ẹkwọrọ ikọ ke kpukpru ebiet ke idụt oro.

Ke 1947, n̄kpọ nte mme asuanetop 60 ẹma ẹsikwọrọ ikọ kpukpru ọfiọn̄. Kpa isua oro n̄ko, ẹma ẹnọ ndusụk isụn̄utom emi ẹkedude ke Cuba ẹka Dominican Republic ẹkekwọrọ ikọ. Roy ye Juanita Brandt ẹkesịne ke otu emi. Brọda Brandt ke ẹkedọhọ ese aban̄a n̄kọk itieutom, enye ama onyụn̄ anam oro ke isua duop.

Ke utịt isua utom 1948, n̄kpọ nte mme asuanetop 110 ẹma ẹsitiene mme isụn̄utom ẹkwọrọ ikọ. Edi nditọete emi ẹkesịnde idem ẹkwọrọ ikọ mi ikọdiọn̄ọke ke ọkpọsọn̄ idomo ke edi.