Mme Ntiense Jehovah ẹdu ke Dominican Republic ke n̄kpọ nte isua 70 idahaemi, ẹnyụn̄ ẹnyene eti enyịn̄ ke ofụri isua emi. Ke ini nditọete ẹkwọrọde ikọ, mme owo ẹsika ẹbịne mmọ ẹkedọhọ mmọ ẹnọ mmimọ n̄wed. Ẹsiwak ndikop nte mme owo ke efakutom ẹdọhọde: “Mmesima ufọkabasi mbufo,” mîdịghe ẹdọhọ “Mbufo ẹsinam se Bible etịn̄de.”

Da se iketịbede ke ini ẹkeyomde ndibọp Ufọkmbono Obio Ubọn̄ kiet ke uwụtn̄kpọ. Eyenete kiet ama ọnọ isọn̄. Ke ini enye akakade ndinam ukara ẹdiọn̄ọ ke imọ iyom ndiyak isọn̄ oro nnọ Mme Ntiense, enye ama okụt ke owo en̄wen ama ọdọdọhọ ukara ke imọ inyene. Owo emi ama ọdọhọ ke eyenete emi ọkọnọde nnyịn isọn̄ oro oyom ndibọ imọ isọn̄ imọ. Ẹma ẹsịn ikpe ke esop. Ikpe ama ọsọn̄ etieti sia owo enye eken ama enyene n̄wed emi owụtde ke enye enyene isọn̄ oro.

Ke ini ẹkesụk ẹkpede ikpe emi, ayaraiwat ama obụp ekpeibet eyenete oro m̀mê enye ada ọnọ anie. Ke ini enye ọkọdọhọde ke imọ ida inọ Mme Ntiense Jehovah, ayaraiwat oro ama ọdọhọ ete: “Ekpedi ntre, mmenịm se etịn̄de. Mmọdiọn̄ọ Mme Ntiense Jehovah, mmonyụn̄ ndiọn̄ọ ke mmọ idịghe mbon n̄kari. Mmọ ididomoke-domo ndimen n̄kpọ owo nda.”

Ke ini ẹkemende n̄wedisọn̄ ete enye eken ẹkewụt esop, ẹma ẹkụt ke idịghe ata n̄wedisọn̄ oro ke ekedi, ke enye akaka akanam enye oro ke idemesie. Ayaraiwat ama ọdọhọ ẹyak isọn̄ oro ẹnọ Mme Ntiense. Ntiense emi ekedide ekpeibet ama ọdọhọ ete: “Idịghe akpa edi emi. Esopikpe ekededi emi owo akade ke idụt emi ọkọdọhọ ke imọ idi Ntiense Jehovah, ẹsikpono se enye etịn̄de.”

Nte ini akade ke ididiọn̄ọ m̀mê owo ifan̄ ke otu mbon emi ẹmade Ikọ Abasi ẹdidụk esop. Edi nditọete ke ẹsịn idem idahaemi ẹkpep mmọ n̄kpọ. Ke uwụtn̄kpọ, hour emi Mme Ntiense Jehovah ke Dominican Republic ẹkekwọrọde ikọ ke 2013 ama ebe miliọn 11, ẹma ẹnyụn̄ ẹkpep Bible ye owo 71,922. Ama enem etieti ndidiọn̄ọ ke owo 9,776 ẹma ẹtiene ẹnam utom usiakusụn̄ unọ un̄wam, eke ofụri ini, mîdịghe ẹdi mme akpan asiakusụn̄. Ke August isua oro, mme asuanetop 35,331 ẹkewọrọ an̄wautom. Imenịm n̄ko ke ediwak owo ẹyedụk esop nte ini akade sia owo 127,716 ẹkedụk Editi.

Ọtọn̄ọde ke Sunday oro ke April 1945, emi Lennart Johnson ye Virginia an̄wan esie ẹkesịmde Dominican Republic ẹketọn̄ọ ukwọrọikọ, ẹkwọrọ eti mbụk Obio Ubọn̄ Abasi ẹnọ ata ediwak owo do ẹnyụn̄ ẹkpep mmọ Bible. Mme Ntiense Jehovah ke Dominican Republic ẹnen̄ede ẹma nte ẹsụk ẹnamde n̄kpọ Abasi ke idụt mmọ. Mmọ ẹnyụn̄ ẹma nte mbon emi ẹkebemde iso ẹdiọn̄ọ Ikọ Abasi ẹkenyịmede ndiyak n̄kpọ atak mmọ man ẹnam mme owo ẹkop Ikọ Abasi. Edi se mmọ ẹmade ẹkan akam edi nte ke mmimọ ke isụk isịn idem ‘inọ ọyọhọ ikọ ntiense iban̄a Obio Ubọn̄ Abasi.’ (Utom 28:23) Mmọ ke ẹtie ẹbet ini emi kpukpru owo ke idụt emi ẹditienede nditọete mmọ ke ofụri ererimbot ikwọ: “Jehovah amakabade edi edidem! Yak isọn̄ adara. Yak ediwak isuo ẹdat esịt.”—Psalm 97:1.