Kpa ye emi Intanet mîdụhe ke kpukpru itie ke Cuba, Intanet odu ke ikpọ itie emi ẹsinamde fon. Edi okụk emi ẹdade ẹdụk Intanet idịghe ekpri. Man ẹn̄wam nditọete ẹtiene ẹdiọn̄ọ se idude ke jw.org, n̄kọk itieutom ẹma ẹdọhọ yak mme esop ẹnam asuanetop kiet esidụk Intanet okosion̄o se ẹdọn̄de onyụn̄ ọnọ Mme Ntiense eken ke esop mmọ. Se ẹnamde emi an̄wam nditọete etieti.

Teona emi edide isua 10 ye Tamuna eyeneka esie emi edide isua itiaita ẹdụn̄ ke Republic of Georgia. Nditọiban iba emi ẹma ẹyom ndinyene fon. Eka ete mmọ ama ọdọhọ ke iyesisio ekpri okụk ke okụk ukpọn̄ utom imọ inọ mmọ kpukpru ọfiọn̄ man ẹkpeda ẹdep fon. Edi mma emi ama akpa ke ini owo mîkodorike enyịn. Mbonubon mmọ ẹma ẹmen akpatre okụk ukpọn̄ utom esie ẹnọ nditọ emi ẹte ẹda ẹdep fon. Ke mmọ ẹma ẹkefiak ẹtie ẹkere n̄kpọ emi, mmọ ẹma ẹwet leta ẹnọ esop mmọ ẹte: “Imọdiọn̄ọ ke urua iba kpọt ayak mbemiso ẹtọn̄ọde ndibọp obufa Ufọkmbono Obio Ubọn̄ nnọ nnyịn ke T’erjola. Eka ete nnyịn ama enen̄ede oyom nditiene n̄n̄wam ke utom emi. Nnyịn mbiba imebiere ndimen akpatre okụk ukpọn̄ utom emi ẹkekpede eka ete nnyịn nnọ esop utu ke ndimen ndep fon. Mbọk ẹbọp ediye Ufọkmbono Obio Ubọn̄ ẹnọ nnyịn!”

Ke January 17, 2014, Geoffrey Jackson emi esịnede ke Otu Emi Ẹsede Ẹban̄a Utom Mme Ntiense Jehovah ama aka Dili ke Timor-Leste okosio N̄wed Abasi Christian Usem Greek—Edikabade eke Obufa Ererimbot ke usem Tetum. Mme andisem usem emi ẹwak ẹkan ke idụt oro. Mbon idụt emi ẹma ẹnyenyene N̄wed Abasi Usem Greek ke usem Tetum, edi Ufọkabasi Catholic ẹkesio Bible emi, mmọ ẹkesinyụn̄ ẹnyam ẹnọ mme owo. Mmọ ikesimaha ndinyam nnọ Mme Ntiense Jehovah m̀mê mbon emi mmọ ẹkerede ke ke ekpep n̄kpọ ye Mme Ntiense. Ediwak n̄kpọ emi ẹkekabarede ke Bible mbon Catholic emi ikenenke. Ẹma ẹsisio ndusụk ikọ ẹfep, ẹnam ndudue,  ndusụk ikọ do ikan̄wan̄ake mme owo aba. Edi isụn̄utom emi ekerede Darren, emi onyụn̄ odude ke Timor-Leste ama etịn̄ ikọ emi owụtde ke Edikabade Eke Obufa Ererimbot itiehe ntre. Enye ọkọdọhọ ete: “Ediwak mbon Timor-Leste emi ẹkotde Edikabade Eke Obufa Ererimbot ẹdọhọ ke ẹkabade Bible emi enen, mmọ ẹsinyụn̄ ẹdọhọ ẹnọ mmimọ Bible emi. Bible enye emi isọn̄ke mmọ ndikot, mmọ ẹnyụn̄ ẹma nte abisi ẹkponide sia ikan̄ isinen̄ekede iyama ke ediwak ufọk. Imọtọn̄ọ ndikpep n̄kpọ ye ediwak mbon emi inọde Bible emi.”

Ke January 2014, ẹma ẹnam se owo mînamke kan̄a ke usem Romany emi ẹsemde ke Macedonia. Ẹma ẹnyene mme akabade n̄wed emi ẹdisikabarede n̄wed ke usem emi kpukpru ini ẹnyụn̄ ẹdọhọ mmọ ẹda abisi Ikọmbakara ye abisi Cyril ẹkabade n̄wed ke usem emi. Emi ayan̄wam mbon emi ẹsemde usem Romany etieti, sia emehe  mmọ ndikot n̄kpọ emi ẹwetde ke abisi Cyril. Abisi emi ke ẹsida ẹwet ediwak n̄kpọ ke Macedonia.

Esịt enem ediwak mbon emi ẹsemde Romany nte esop Jehovah osiode n̄wed ke usem mmọ. Eyenete an̄wan kiet ọkọdọhọ ete: “Nsisem Romany ndien mbon idụt en̄wen isidaha mi ke n̄kpọ. Mmọkọm Jehovah nte enye adade mi ke n̄kpọ onyụn̄ anamde mi nnyene n̄wed ke usem emana mi. N̄kpọ emi anam mi nnen̄ede n̄kpere enye.”

Ọtọn̄ọde ke February 1, 2014, n̄kọk itieutom United States edise aban̄a mme efakutom ye mme esop ke Jamaica ye Cayman Islands. Emi ọwọrọ ke n̄kọk itieutom United States ese aban̄a mme asuanetop emi ẹwakde ẹbe miliọn kiet ye tọsịn ikie iba! Mme asuanetop emi ẹdu ke stet 50 ke U.S., ke Bahamas, Bermuda, Virgin Islands ke Britain, Virgin Islands ke U.S., Puerto Rico, ye Turks and Caicos Islands.

Nditọete ke Japan idaha utom usiakusụn̄ inam mbubru. Idụt emi edi ọyọhọ idụt inan̄ emi mme asiakusụn̄ ofụri ini ẹwakde etieti ke ofụri ererimbot. Ke ntọn̄ọ ntọn̄ọ isua utom 2014, owo 2,646 ẹma ẹtọn̄ọ ndinam utom usiakusụn̄ ofụri ini, ndien emi anam ibat mme asiakusụn̄ do esịm 65,668. Ke March 2014, ibat mme owo emi ẹkenamde utom akpan asiakusụn̄, usiakusụn̄ ofụri ini, m̀mê eke unọ un̄wam, ama ebe ibat mme asuanetop ke idụt oro ke ẹbaharede iba.