“Se mme owo ẹnamde ke isọn̄ ayabiat isọn̄ emi ama ukọm ibietke ke ikan̄. Mmọn̄ eyemen ikpọ obio. Isọn̄ oyofiop nte ikan̄ oyom ndibụbede. Ata idiọk oyobio emi anamde owo ndịk ọyọwọrọ. Mme owo ẹdifọfiọn̄ọ ubọk iyom mmọn̄ ke ediwak ebiet. Idisikokop ke utọn̄ ke ndusụk unam ye eto ẹma ẹsidu ke isọn̄ emi. Se itịn̄de emi idịghe ekọn̄ n̄ke m̀mê n̄kpon-inua. Ntaifiọk ẹdọhọ ke nte ẹbiatde ofụm idahaemi owụt ke kpukpru se ibatde emi iditreke-tre nditịbe.”​—António Guterres, emi edide etieibuot ke esop edidiana mme idụt, eketịn̄ ikọ emi ke mbono emi ikpọ owo ukara ẹkedụkde ke April 4, 2022.

 “Ntaifiọk ẹdọhọ ke isua ifan̄ ke iso, ke nte mme owo ẹbiatde isọn̄ eyekpere ndisobo kpukpru unam ke national park 423 [emi ẹdude ke United States] sia isọn̄ enen̄ede ofiop idahaemi akan nte ekedide. Nsobo emi ekemede ndisịm isọn̄ emi onyụn̄ etie nte se isikotde ke Bible iban̄a ikan̄ ye ukwọ, ikpọ ice ndisuana ndụk inyan̄-ibom nnam mmọn̄ ọtọ ọdọk obot, ye ọkpọsọn̄ ufiop.”​—Se n̄wed-mbụk n̄kpọntịbe emi ẹkotde The New York Times eke June 15, 2022, etịn̄de edi oro ke ibuotikọ emi, “Flooding Chaos in Yellowstone, a Sign of Crises to Come,” oro edi, ndutịme emi ukwọ esịnde ke obio Yellowstone owụt ke akwa n̄kpọ ọmọn̄ etịbe.

 Ndi odu owo emi ekemede ndinyan̄a isọn̄ nsio ke ubọk mbon emi ẹyomde ndisobo enye? Edieke edide odu, mbọk m̀mê anie ke enye edi? Se se Bible etịn̄de mi.

 Bible ọdọhọ ke Abasi oyosobo “mbon oro ẹbiatde isọn̄.” (Ediyarade 11:18) Itie Bible emi ekpep nnyịn n̄kpọ ita:

1.  1. Mme owo ẹyebiat isọn̄ emi.

2.  2. Abasi idiyakke ẹbiat isọn̄ emi ke nsinsi.

3.  3. Abasi kpọt ekeme ndinam isọn̄ emi afiak ọfọn, idịghe owo ndomokiet.

 Bible ọdọhọ ke “isọn̄ ada ke nsinsi.” (Ecclesiastes 1:4) Mme owo ẹyeka iso ẹdụn̄ ke isọn̄ emi ke nsinsi.

•   Psalm 37:29 ọdọhọ ete: “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”

 Abasi ọyọdiọn̄ isọn̄ emi anam enye afiak eye nte In̄wan̄ Eden.

•   Isaiah 35:1 ọdọhọ ete: “Wilderness ye edisat ebiet ẹyedara, ndien unaisọn̄ desat ayadara onyụn̄ asiaha ikọn̄ nte saffron.”