Nsio nsio vidio emi ẹsibrede ke ikpọ mbono nnyịn esinem nnyịn tutu onyụn̄ anam Ikọ Abasi etịm an̄wan̄a nnyịn. Ndi ọmọdiọn̄ọ m̀mê vidio ifan̄ ke ẹkebre ke Akamba Mbono 2020 emi ibuotikọ edide ‘Ẹdat Esịt Kpukpru Ini’!? Ẹkebre vidio 114, aba ye ita ke otu oro ẹkedi ikọ Abasi emi Otu Emi Ẹsede Ẹban̄a Utom Mme Ntiense Jehovah ye mbon emi ẹsin̄wamde mmọ ẹkekwọrọde. Ndi akanam emekere nte ẹsisan̄ade ẹnam kpukpru vidio emi ye se emi esikpade nnyịn?

 N̄kpọ nte nditọete nnyịn iren ye iban 900 ke nsio nsio itie ke ofụri ererimbot ẹken̄wam nnyịn ikeme ndinam ofụri vidio emi ẹkebrede ke akamba mbono oro. Ama ada ebe isua iba ndinam kpukpru emi mma. N̄ko ofụri ini emi ẹkebiatde ẹnam emi ama ekpere ndisịm hour 100,000. Se itịn̄de emi esịne hour 70,000, emi ẹkedade ẹnam drama Nehemiah emi edide hour kiet ye minit 16. Drama oro ekere, Nehemiah: ‘Idatesịt Jehovah Edi Odudu Mbufo.’

 Kpukpru nnyịn imọfọfiọk ke idịghe ekpri okụk ke ẹkeda ẹse ẹban̄a itie emi mbon emi ẹken̄wamde nnyịn ẹnam drama oro ye nsio nsio vidio eken ẹkedụn̄de ẹnam utom mmọ, ye se mmọ ẹkediade. Owo itịn̄ke-tịn̄ iban̄a kpukpru n̄kpọutom emi ẹkedepde ye okụk emi ẹkebiatde ke nsio nsio ebiet emi ẹketiede ẹnam utom emi.

 Jared Gossman, emi anamde utom ke itieutom emi ẹsede ẹban̄a vidio nnyịn ọdọhọ ete: “Kọmiti Unọ Ukpep Otu Emi Ẹsede Ẹban̄a Utom Nnyịn ẹnen̄ede ẹyom vidio nnyịn owụt nsio nsio usụn̄ emi mme owo ke nsio nsio ebiet ke ererimbot ẹsinamde n̄kpọ, utu ke ndiwụt ido obio ifan̄ kpọt. Emi enen̄ede owụt ke kpukpru nnyịn ke ofụri ererimbot idi nditọeka. Ntak edi oro ẹkemekde otu mme anam vidio 24 ke nsio nsio idụt 11 ndinam nsio nsio vidio emi ẹkebrede ke akamba mbono oro. Idịghe ekpri utom ekedi oro, nditie ndiomi se ẹdinamde, nse mban̄a kpukpru se ẹkenamde, nnyụn̄ ndep se ẹkedade ẹnam utom emi.”

 Akana ida san̄asan̄a n̄kpọutom inam ediwak ke otu vidio emi. Ke uwụtn̄kpọ, akana ibọp se ikadade inam drama Nehemiah: ‘Idatesịt Jehovah Edi Odudu Mbufo’ ke esịt studio nnyịn ke Mt. Ebo, emi odude ekpere ọfis Patterson nnyịn ke New York ke U.S.A. Ima ida mfefere obukpọk ibọp n̄kpọ emi etiede nte ibibene Jerusalem eyo eset man otodo drama oro okponyụn̄ etie nte n̄kpọ eyo Bible. Ibibene kiet kiet emi ikadade mfefere obukpọk ibọp ọkọniọn̄ n̄kpọ nte ikpat 20. Ekem ima ida fom ifụk, inyụn̄ ida n̄kpọ emi etiede nte block idian ke ofụri ibibene oro. Ntre, ekesidi ima isio vidio ke n̄kan̄ kiet ima, nnyịn imenede ibibene n̄kan̄ oro ika ebiet en̄wen emi iyomde ndisio vidio. Emi ikayakke ibiat okụk emi mbufo ẹnọde ẹte ẹda utom Abasi ida inam ediwak ibibene. Kpa ye oro, ikabiat n̄kpọ nte milion naira edịp ye efịteta ye udori (₦38,100,000.00) ida ibọp se ikadade inam drama emi kpọt. a

 Ndifiọk kpukpru emi anam inen̄ede ikọm Abasi ke mbono isua emi. Imenịm ke ofụri se inamde man ẹkeme ndisio kpukpru se ẹkenamde ke mbono isua emi ayanam mme owo ke ofụri ererimbot ẹtoro Jehovah. Mbọk ẹsọsọn̄ọ etieti ke ndida donate.pr2711.com ye mme usụn̄ en̄wen ntiene ntịp okụk ke ofụri esịt nnọ ẹda ẹnam utom Abasi ke ofụri ererimbot.