Jehovah Adasefo bu Bible no dɛ ɔyɛ buukuu a ɔsom bo kyɛn buukuu biara. Wosũa Bible no dabaa na wɔdze kyerɛkyerɛ nkorɔfo asɛmpa a ɔfa Nyankopɔn N’ahendzi no ho. (Matthew 24:14) Kwan ahorow yi a wɔfa do dze Bible no dzi dwuma no ma ɔyɛ dadaw ntsɛntsɛm, na ɔtsetsew. Dɛm ntsi, Adasefo no yɛɛ dza wobotum biara dze tsintsiim New World Translation of the Holy Scriptures, mfe 2013 dze no ma ɔyɛɛ dza obotum akyɛr yie, na ɔyɛ fɛw so.

Nna wɔpɛ dɛ wɔyɛ Bible fofor yi ma ɔkyɛr yie. Enuanom binom a wɔyɛ edwuma wɔ bea a Adasefo no tsintsim mbuukuu wɔ Wallkill, New York, U.S.A. no nye panyin a ɔda edwumakuw bi a wotsintsim mbuukuu ano no susuu dza wɔpɛ dɛ wɔyɛ ho. Owura no kãa kyerɛɛ Adasefo no dɛ, “Hom nnkotum ayɛ Bible a odzi mu na obotum akyɛr yie dɛm.” Ɔdze kãa ho dɛ, “Awerɛhosɛm nye dɛ, nkorɔfo yɛ Bible ahorow ma ɔyɛ fɛw ber a ɔda pon do, naaso nnyɛ dza obotum akyɛr yie.”

New World Translation Bible no bi a ahyɛse no wɔyɛe no annkyɛr koraa, ɔtɔfabi a, ɔtsetsew ber a wimu ayɛ hyew papaapa no. Enuanom a wɔyɛ edwuma wɔ bea a yetsintsim mbuukuu no bɔɔ mbɔdzen yɛɛ nhwehwɛmu wɔ ndzɛmba ahorow a wobotum dze edura ho, ihua, nye akwan a wɔfa do dze mbuukuu femfam ho mu mbrɛ ɔbɛyɛ a wɔbɛyɛ Bible a obotum akyɛr yie ɔmmfa ho wimu tsebea biara no. Wogyinaa dza wonyae fii hɔn nhwehwɛmu ahorow no mu no do yɛɛ Bible ahorow a wobotum asɔ ahwɛ. Wɔdze maa Adasefo a wɔwɔ aman a hɔ wimu tsebea gu ahorow mu dɛ wɔmfa nkɔ asɛnka. Wimu tsebea wɔ aman ahorow yi mu no tse dɛ dza ofi Tropics dze kesi Alaska.

Abosoom esia ekyir no, wɔsanee dze Bible ahorow no bae ma wɔhwɛɛ mbrɛ wɔayɛ. Enuanom a wɔyɛ edwuma wɔ bea a yetsintsim mbuukuu no yɛɛ nsesã ahorow bi, na wɔsanee yɛɛ fofor. Wowiei no, wɔdze mae dɛ wɔmfa nkɔ asɛnka bio. Sɛ wɔka ne nyina bɔ mu a, Bible 1,697 na wɔsɔe hwɛe. No mu kakraabi na ɔtɔɔ kyima a nnyɛ dɛ Adasefo no na wɔhyɛɛ da yɛɛ dɛm. Dɛ nhwɛdo no, wogyaa Bible kor wɔ abowano ma adze kyee ber a nna nsu rotɔ. Kor so kɛhyɛɛ nsu a hurricane ama abɔ apee do mu. Dza ofiir ma wɔdze kɔr asɛnka nye dza enuanom annhyɛ da dɛ wɔresɛɛ no no mu bae no maa wohun mbrɛ Bible no dzi mu fa.

Aber a nna wɔrosɔ Bible no ahwɛ wɔ mfe 2011 mu no, Adasefo no tɔɔ efir fofor a no ho yɛ har yie a wɔdze bekeka mbuukuu afemfam ho wɔ bea a wotsintsim mbuukuu wɔ Wallkill nye Ebina, Japan. Botae ntsi a wɔtɔɔ efir fofor yi nye dɛ, wobetsintsim Bible pii wɔ Borɔfo kasa mu, na wɔaada no edzi wɔ afrenhyia nhyiamu no ase. Bio so, nna wɔpɛ dɛ Bible a wobetsintsim wɔ mbea ebien yi nyina bɛyɛ dza odzi nsɛ.

Mfe 2012 ahyɛse no, mbuukuu tsintsimbea ebien yi hyɛɛ ase tsintsiim New World Translation, afe 1984 dze no. Wɔdze rɔba fofor a wɔfrɛ no polyurethane yɛɛ no nduraho no bi tuntum nye memen. Naaso, efir fofor yi dze ihua nye tam yɛɛ nduraho no mu a nna wɔnnsɔe nnhwɛe. Ntsi nduraho a wɔyɛe no kyeakyeae koraa ber a wɔdze duraa Bible no ho no. Mbɔdzen a wɔbɔe ahyɛse no dɛ wobesiesie dɛm ɔhaw yi ennkesi hwee, ntsi wogyaa Bible no tsintsim.

Hɔn a wɔyɛɛ nduraho no bohun dɛ, ɔhaw a ɔwɔ nduraho a ɔyɛ mberɛw ho nye dɛ ɔkyeakyea, na ɔbɛyɛ dzen dɛ wobotum edzi ho dwuma. Dɛ nkyɛ Adasefo no dze nduraho a ɔyɛ dzen bɛyɛ Bible no, mbom no nna woesi nketse dɛ wɔbɛyɛ Bible a no nduraho no yɛ mberɛw, na ɔyɛ ahomka yie so. Wɔdze abosoom anan sɔɔ ihua na tam a wɔdze yɛ nduraho ahorow hwɛe. Iyi ekyir no, wohun dza ɔyɛ papa wɔ mu, na wɔhyɛɛ ase tsintsiim Bible no bio. Afei, nna wɔbɛyɛ Bible a no nduraho yɛ mberɛw a ɔrennkyeakyea.

September 2012 mu no, wɔkãa kyerɛɛ mbuukuu tsintsimbea ahorow no dɛ wongyaa New World Translation, afe 1984 dze no tsintsim, na wɔnkyekyɛ dza ɔwɔ hɔ no. Iyi ekyir no, wɔnyɛ ahoboa dɛ wobetsintsim New World Translation fofor a wɔayɛ no. Nna wobeyi Bible yi edzi wɔ afrenhyia nhyiamu a Watch Tower Bible and Tract Society of Pennsylvania bɛyɛ wɔ October 5, 2013 mu.

Mbuukuu tsintsimbea ahorow no nsa kãa Bible fofor yi no mu nsɛm no wɔ Fida, August 9, 2013, na adze kyee no, wɔhyɛɛ ne tsintsim no ase. Wotsintsiim dza odzi kan no wiei wɔ August 15. Adapɛn esuon a odzi hɔ mu no, edwumayɛfo a wɔwɔ Wallkill nye Ebina no yɛɛ edwuma adzekyee na adzesaa dze tsintsiim Bible a no dodow bɔbor 1,600,000, na wɔdze kɔr mbea a wɔbɛyɛ afrenhyia nhyiamu no. Nna obiara a ɔbɔkɔ nhyiamu yi bi no botum enya Bible fofor yi bi.

Ɔwɔ mu dɛ Bible fofor yi yɛ fɛw, na wɔyɛe mbrɛ ɔbɛyɛ a ɔbɛkyɛr dze, naaso nsɛm a ɔwɔ mu a ɔma nkwa no na ɔyɛ dza ɔsom bo yie. Ɔbaa bi a ɔwɔ United States ne nsa kãa Bible fofor yi bi, da a odzi hɔ no asɛm a ɔkãe nye dɛ, “Bible fofor yi ma mutum tse Bible no ase yie.”