Ndɛ yi Jehovah Adasefo ahyehyɛdze no hyɛɛ ase bɛyɛ 1870 mfe no mu. Dɛm aber no, Bible esuafo kuw kumaabi a nna wɔtse bɛn Pittsburgh, Pennsylvania, wɔ United States no hyɛɛ ase pɛnsapɛnsaa Bible no mu nkakrankakra. Wɔdze asɔrasɔr ahorow no nkyerɛkyerɛ no totoo dza Bible no kyerɛkyerɛ ankasa no ho. Wɔhyɛɛ ase tsintsiim dza woesũa no wɔ mbuukuu, dawurbɔ nkrataa nye dza ndɛ wɔfrɛ no Ɔweɔn-Aban​—Ɔkã Jehovah N’ahendzi Ho Asɛm no mu.

Nyia nna ɔkã dɛm Bible esuafo akomapafo yi ho nye ɔbarimba bi a nna wɔfrɛ no Charles Taze Russell. Ɔwɔ mu dɛ Russell na odzii Bible nkyerɛkyerɛ edwuma no enyim dɛm aber no, na ɔno na odzii kan kyerɛɛw Ɔweɔn-Aban no dze, naaso nnyɛ dɛ nna ɔretsew ɔsom fofor. Nna ɔyɛ Russell nye dɛm Bible Esuafo yi hɔn botae dɛ wɔbɛhyɛ Jesus Christ ne nkyerɛkyerɛ ho nkuran, na woeedzi Christianfo asafo a odzi kan no ndzeyɛɛ ekyir. Osiandɛ Jesus na ɔtseew Christiansom ntsi, yebu no dɛ ɔno nye hɛn ahyehyɛdze no Ɔfabafo, asafo no ne Tsir.​—Colossaefo 1:18-20.