Matthew Asɛmpa 14:1-36
14 Dɛm aber no, Herod a ɔyɛ ɔmantɔw no do hen* no tsee Jesus no ho asɛm,
2 na ɔkaa kyerɛɛ no nkowaa no dɛ: “Ɔyɛ John Onumanyi no. Woenyan no efi ewufo mu, ntsi na otum yɛ dɛm anwanwadze ahorow yi.”
3 Nna Herod* edzi kan akyer John dze nkɔnsɔnkɔnsɔn egu no, na ɔdze no akɔto efiadze osian no nua Philip ne yer Herodias ntsi.
4 Siantsir a ɔyɛɛ dɛm nye dɛ nna John taa ka kyerɛ no dɛ: “Mbra mma kwan dɛ ewar no.”
5 Nna ɔpɛ dɛ oku no, naaso nna osuro nyimpadɔm no, osiandɛ nna wobu John dɛ ɔyɛ nkɔnhyɛnyi.
6 Na aber a woridzi Herod n’awoda no, Herodias ne babaa bɛsawee wɔ ase ma Herod n’enyi gyee ho papaapa.
7 Ntsi ɔhyɛɛ no bɔ na ɔkaa ntam dɛ adze biara a obebisa no, ɔdze bɛma no.
8 Nna akataasia no ne maame tutui guu n’asowa mu ma ɔkaa dɛ: “Fa John Onumanyi no ne tsir to apampa do ma me wɔ ha.”
9 Asɛm yi maa ɔhen no yɛɛ basaa, naaso osian ntam a ɔkae nye hɔn a ɔnye hɔn tsena hɔ ridzidzi* no ntsi, ɔhyɛɛ dɛ wɔmfa mma no.
10 Ntsi ɔsomae ma wokotwaa John ne tsir wɔ efiadze.
11 Na wɔdze ne tsir no too apampa do brɛɛ akataasia no, na ɔdze kɛmaa ne maame.
12 Ekyir yi, n’esuafo no bae bɛfaa no fun no kesiee no; na wɔkɔree kɛkaa dza woesi no kyerɛɛ Jesus.
13 Aber a Jesus tsee iyi no, ɔfaa hɛmba fii hɔ dɛ nankotsee rekɛhyɛ beebi a wɔatsew no ho. Naaso nyimpadɔm no tsee no, wofifi nkurow no mu faa famu dzii n’ekyir.
14 Aber a odur mpoano hɔ no, ohun nyimpadɔm kɛse bi, na hɔnho yɛɛ no mbɔbɔr, na ɔsaa hɔn a wɔyar wɔ hɔn mu no yarba.
15 Na odur ewimbir no, n’esuafo no baa ne nkyɛn bɛkaa kyerɛɛ no dɛ: “Ha mmbɛn kurow mu na adze so resa; gya nyimpadɔm yi kwan ma wɔnkɔ nkuraase nkɔtɔ edziban ndzi.”
16 Naaso Jesus kaa kyerɛɛ hɔn dɛ: “Ɔnnsɛ dɛ wɔkɔ; homara hom mma hɔn biribi ma wondzi.”
17 Wɔkaa kyerɛɛ no dɛ: “Yennyi hwee wɔ ha gyedɛ paanoo enum na nam ebien pɛ.”
18 Ɔkaa dɛ: “Hom mfa mbrɛ me.”
19 Nna ɔkaa kyerɛɛ nyimpadɔm no dɛ wɔntsenatsena sar no do. Afei ɔfaa paanoo enum nye nam ebien no, na ɔhwɛɛ sor na ohyiraa do. Afei obubuu paanoo no mu na ɔdze maa n’esuafo no, na n’esuafo no so kyekyɛe maa nyimpadɔm no.
20 Ntsi hɔn nyinara dzidzii mee, na wɔboaboaa dza ɔkae no ano no, ɔyɛɛ nkɛntsɛn 12 amaama.
21 Mbarimba bɛyɛ 5,000 na wodzii edziban no. Wɔannkan mbaa na mbofraba annka ho.
22 Afei ntsɛmara, ɔmaa n’esuafo no foow hɛmba no, dɛ wondzi n’enyim kan ntwa nkɔ nsu no ekyir, na ogyaa nyimpadɔm no kwan ma wɔkɔree.
23 Aber a ogyaa nyimpadɔm no kwan ma wɔkɔree no, nankotsee kɛhyɛɛ bepɔw no do kɔbɔɔ mpaa. Na odur ewimbir no, nna nanko na ɔwɔ hɔ.
24 Dɛm aber yi, nna ofi beebi a hɛmba no da dze kɔ mpoano no mu war yie paa.* Na asorɛkye no ntsi, nna wɔayɛ dzen ama hɔn dɛ wɔbɔkwan hɛmba no, osiandɛ nna mframa no robɔ hyia hɔn.
25 Na odur ahanamakye* no ɔnantseew po no do baa hɔn nkyɛn.
26 Aber a esuafo no hun dɛ ɔnam po no do no, hɔn akoma tui, na wɔkaa dɛ: “Yɛroso daa anaa?” Na hu kaa hɔn ma wɔtseatseaa mu.
27 Hɔ no ara na Jesus kaa kyerɛɛ hɔn dɛ: “Hom nka hom akoma nto hom yamu! Ɔyɛ mara a; mma hom nnsuro.”
28 Na Peter kaa kyerɛɛ no dɛ: “Ewuradze, sɛ ɔyɛ ɔwo ampa a, ka ma mennantsew nsu yi do mbra wo nkyɛn.”
29 Ɔkaa dɛ: “Bra!” Ntsi Peter sianee fii hɛmba no mu na ɔnantseew nsu no do dɛ ɔrokɔ Jesus ne nkyɛn.
30 Naaso aber a ɔhwɛɛ mframa dzendzen a ɔrobɔ no, n’akoma tui. Na aber a ɔhyɛɛ ase dɛ ɔremem no, ɔtseaa mu dɛ: “Ewuradze, gye me!”
31 Ntsɛmara na Jesus tseen ne nsa suoo no mu, na ɔkaa kyerɛɛ no dɛ: “Ɔwo a wo gyedzi suar, ebɛnadze ntsi na emaa w’adwen hihimii?”
32 Na aber a wodur hɛmba no mu no, mframa no gyaae.
33 Na hɔn a wɔwɔ hɛmba no mu no kotoow no, na wɔkaa dɛ: “Ampa, eyɛ Nyankopɔn ne Ba.”
34 Na wotwaa po no baa Gennesaret asaase do.
35 Aber a mbarimba a wɔwɔ hɔ no hun no no, wɔsomae ma wɔkɛkaa kyerɛɛ hɔn a wɔwɔ nkurow a woetwa hɔnho ehyia no nyinara mu, na wɔdze hɔn a wɔyaryar nyinara brɛɛ no.
36 Na wɔserɛɛ no dɛ ɔmma wɔmfa hɔn nsa nka n’atar ngugudo no n’ano ndwow kɛkɛ, na hɔn a wɔdze hɔn nsa kae no nyinara nyaa ayarsa na hɔnho tɔɔ hɔn koraa.
Ase Hɔ Nsɛm
^ Greek, “odzi Rome Ahenman no ne fa bi do”; anaaso dɛ “nna ɔyɛ Rome ɔhempɔn no n’ananmusinyi.”
^ Kyerɛ dɛ, Herod Antipas.
^ Anaa “tsena pon ho ridzidzi.”
^ Greek, “agoprama beberee.” Nna agoprama kor ne tsentsen yɛ mita 185 (anamɔn 606.95).
^ Kyerɛ dɛ, bɛyɛ ahanamakye 3:00 kesi anapa 6:00 aber a ewia rupue.
