Paul: Hɛn enyi gyee dɛm da no paa! Nna ɔyɛ November 1985 mu, na nna yɛtse wimhɛn mu rokɔ Liberia a ɔwɔ Africa n’anee mantɔw mu. Nna yɛrekɛhyɛ hɛn asɛmpatserɛw edwuma no ase. Yedur Senegal no, hɛn wimhɛn no gyinae. Anne kaa dɛ: “Aka bɛyɛ dɔnhwer kor ara na yeedu Liberia!” Hɔ ara na yɛtsee dɛ wɔdze amandzɛɛbɔ bi roto gua. Wɔkaa dɛ: “Hɔn a wɔrokɔ Liberia no nyina nsian wɔ ha. Nyimpakuw bi yɛɛ dɛ nkyɛ worutu aban a ɔwɔ Liberia no efi do ma kurow no mu ayɛ begyabegya ntsi yerunntum nnkegyina wɔ hɔ.” Dɛm ntsi yɛkɛtsenaa asɛmpatserɛwfo bi a nna wɔwɔ Senegal no nkyɛn nda du, na yɛwɔ hɔ nyina nna yɛtse dza ɔrokɔ wɔ Liberia no wɔ kaseebɔ ahorow mu. Nna yɛtse dɛ worukunkum nyimpa pii, na aban no so hyɛɛ mbra dɛ mma obiara mmpue ewimbir. Sɛ yɛfo yɛ wo ma ipue ewimbir a, wɔbɔbɔ wo itur.

Anne: Yɛmmpɛ hɛnho asɛm, ntsi yɛhwɛ hɛnho yie paa. Musuar nyina nna dzin a wɔdze frɛ me nye Ohufo Annie, osiandɛ nna musuro adze paa. Sɛ nna murutwa kaar kwan mu mpo a, nna me yamu hyehye me! Naaso nna yeesi hɛn bo dɛ yɛbɔkɔ Liberia ɔmmfa ho dza nna ɔrokɔ do wɔ ɔman no mu no.

Paul: Menye Anne nyinii wɔ fakor. Nna hɛn nyina tse England n’anee afamu, na ofi me fie kɔ ne fie yɛ bɛyɛ kilomita 8 (akwansin 5). M’awofo nye Anne ne maame hyɛɛ hɛn nkuran dɛ yɛnyɛ akwampaafo, ntsi yewiee high skuul no ara na yɛhyɛɛ akwampaa edwuma no ase. Nna ɔyɛ hɔn dɛw paa dɛ yɛpɛ dɛ yɛyɛ ber nyina som edwuma no bi. Ntsi wɔyɛɛ dza wobotum biara dze boaa hɛn ma yetumii yɛe. Midzii mfe 19 no, minyaa hokwan kɛyɛɛ edwuma wɔ Bethel. Na aber a menye Anne waree wɔ 1982 mu no, ɔno so bɛkaa moho wɔ hɔ.

Anne: Nna Bethel yɛ hɛn dɛw paa, naaso nna hɛn adaaso ara nye dɛ da kor bi yebenya hokwan akɔsom wɔ beebi a wohia mboa. Yɛnye enuanom binom a nna wɔayɛ asɛmpatserɛw edwuma no bi pɛn bɔɔ mu yɛɛ edwuma wɔ Bethel. Hɛn enyi gyee mbrɛ nna wosi yɛ hɔn adze nye hɔn suahu ahorow no ho, ntsi nna hɛn so yɛpɛ dɛ yɛkɛyɛ asɛmpatserɛwfo. Ewimbir biara nna yɛbɔ dɛm asɛm yi ho mpaa. Yɛyɛɛ dɛm mfe pɔrpɔr ebiasa. Ntsi aber a wɔtoo nsa frɛɛ hɛn dɛ yɛnkɔ Gilead wɔ afe 1985 mu no, hɛn enyi gyee araa ma nna yennhu dza yɛnyɛ hɛnho! Nna yɛka adzesuakuw a otsia 79 no ho. Yewiee skuul no, wɔdze hɛn kɔr Liberia a ɔwɔ Africa n’anee afamu.

Paul: Yɛfoow wimhɛn a odzi kan a wɔmaa kwan dɛ obotum akɔ Liberia no. Mbra a aban no ahyɛ dɛ mma obiara mmpue ewimbir no, nna ɔda ho ara yɛ edwuma. Ntsi nna obiara suro na beebiara so ayɛ dzinn. Sɛ kaar bi a ɔnam beebi a wodzi gua no yɛ dede awerɛfirmu a, ebɔhwɛ no nna nkorɔfo dze ntseatseamu rekɛpɛ beebi ekosuma. Nna anafua biara yɛbɔ mu kenkan Ndwom nwoma no n’afa ahorow bi. Na sɛ yɛyɛ dɛm a, nna ɔmma hɛn yamu nnhyehye  hɛn pii. Ɔmmfa ho dza nna ɔrokɔ do yi nyina ekyir no, nna edwuma a yɛreyɛ no da hɛn akoma do paa. Nna Anne yɛ asɛmpatserɛwnyi ntsi nna ɔkɔ asɛnka da biara, na mo so, nna menye Onua John Charuk bɔ mu yɛ edwuma wɔ Bethel. a Musuaa pii fii no hɔ. Nna ɔatsena Liberia akyɛr paa, ntsi nna onyim ɔhaw nye nsɛndzendzen a enuanom no afa mu, na nna muhu dɛ ɔtse enuanom no ase paa.

Anne: Bi a ibebisa me dɛ, ‘Ebɛnadze na ɔmaa hɛn enyi kaa Liberia ntsɛntsɛm dɛm?’ Mese, hɛn nuanom yi ara o. Nna wɔpɛ hɛn asɛm paa, wɔtsew hɔn enyim, na wɔdze nokwardzi so som Jehovah. Ntsi hɛn so, yɛbɛpɛɛ hɔn asɛm, na yɛnye hɔn bɔɔ mu tsenae dɛ hɛn ebusuafo. Nna ɔyɛ a wotu hɛn fo so, na iyi hyɛɛ hɛn nkuran ma yɛkɔr do soom Jehovah. Asɛnka edwuma no so dze, ɔsɛ w’enyi. Nna sɛ yɛkɔ efiewuranom no nkyɛn na yɛannye hɔn ammbɔ nkɔmbɔ annkyɛr a, ɔhaw hɔn paa! Beebiara a ebɛfa biara no, ibohu dɛ nkorɔfo reka Bible mu asɛm bi. Ntsi sɛ ihu hɔn dɛm a, dza ɔwɔ dɛ eyɛ ara nye dɛ ebɛbɛn hɔn na edze w’ano ato nkɔmbɔ no mu. Yenyaa Bible esuafo beberee ma ɔno ntsi nna ɔyɛ dzen ma hɛn dɛ yɛnye hɔn nyina mpo bosua adze. Naaso nna hɛn enyi gye wɔ asaasesin no mu paa!

Paul: Sɛ yɛbɛka a, bɛyɛ mfe anan ntamu dze, ndzɛmba mu dwee kakra wɔ ɔman no mu. Naaso 1989 mu no, amamfo no nye hɔnho koe, na iyi maa ndzɛmba sesaa prɛko pɛr. July 2, 1990 no, etuatsewfo no bɛgyee mbea a ɔbembɛn Bethel no bɔɔ do. Abosoom ebiasa dze, nna yenntum nye hɛn ebusuafo a wɔwɔ aborɔkyir nye wiadze nyina edwumayɛbea tsir no nndzi nkitaho biara. Nna ewudzisɛm na basabasayɛ ebu do wɔ ɔman no mu. Nna ɔyɛ dzen dɛ ibenya edziban, na wɔtoo mbaa pii so mbɔndar. Awerɛhosɛm nye dɛ, nna dɛm ndzɛmba yi rokɔ do wɔ ɔman no mu beebiara, na ɔkɔr do ara mfe 14.

Anne: Mbusuakuw bi mufo too hyɛɛ mbusuakuw afofor bi do, na wokunkum hɔn. Ebɔhwɛ no, nna etuatsewfo no hyehyɛ ntar huhuuhu nenam mbɔntsen do kitsakitsa akodze ahorow. Nna wɔbɔ wura fie biara mu na wɔfa dza wɔpɛ biara. Hɔn mu binom wɔ hɔ a, nna nyimpakum nnyɛ hɔn dzen koraa, na nna wohu no tse dɛ mbrɛ “worukunkum nkokɔ.” Etuatsewfo no sisiiw kaar akwan pii, na mpɛn pii no, nna wokunkum hɔn a wɔbɛfa dɛm mbea ahorow no. Wokunkum hɔn wie a, nna wɔahyehyɛ hɔn egu hɔ. Nna wɔyɛ dɛm adze yi bi wɔ mbea ahorow a ɔbembɛn Bethel no mpo. Adasefo a nna wɔdze nokwardzi rosom Jehovah no, wokunkum hɔn mu pii. Nna asɛmpatserɛwfo beenu bi a yɛpɛ hɔn asɛm so ka ho.

Aber biara a etuatsewfo no bohu obi a ɔnnka hɔn ebusuakuw no ho no, nna woku no. Ntsi enuanom dze hɔn nkwa too esian mu dze mbusuakuw a nna wɔrohwehwɛ hɔn ekunkum hɔn no siee. Na dɛmara so na asɛmpatserɛwfo nye Bethelfo so yɛe. Nna Bethel dan no yɛ aborɔsan, ntsi wɔmaa enuanom binom daa ase, nna wɔmaa binom so bɛdaa hɛn dan mu wɔ sor. Yɛmaa ebusua bi a no mufo yɛ beesuon bɛhyɛɛ hɛn dan no mu.

Paul: Etuatsewfo no bɔɔ mbɔdzen mpɛn pii dɛ wɔbɛba Bethel hɔ abɔhwɛ dɛ yɛdze nkorɔfo esuma wɔ hɔ anaa.  Dɛm ntsi yɛmaa enuanom baanan bi weɔnee. Nna beenu gyina ntokura bi mu, nna beenu so gyina Bethel abow no ano. Sɛ beenu no a wogyina abow no ano no dze hɔn nsa gu hɔn enyim a, nna ɔkyerɛ dɛ biribiara da dzinn. Naaso sɛ wɔdze gu hɔn ekyir a, nna ɔkyerɛ dɛ etuatsewfo no enyi aber dɛ wobowura mu. Ntsi sɛ ɔba no dɛm a, nna hɔn a wogyina ntokura mu no yɛ ntsɛm dze enuanom no kosuma.

Anne: Da kor bi dze, enuanom no enntum ennsiw etuatsewfo no kwan ntsi wɔbɔe wuraa mu. Nna hɔn bo efuw paa. Ntsi menye akyerɛbaa bi kɛhyɛɛ eguaree hɔ na motoow abow no mu. Nna cupboard bi si hɔ a akyerɛbaa no botum ekosuma mu. Ntsi akyerɛbaa no miaa noho kɛhyɛɛ mu. Saana morofow sor no, nna etuatsewfo no kitsakitsa hɔn etur dzi m’ekyir. Wɔdze ebufuw bɔɔ hɛn abow no mu. Aber a mo kun Paul buee hɔn ma wɔbaa dan no mu no, ɔkaa kyerɛɛ hɔn dɛ: “Meserɛ hom, me yer reyɛ no ho yie wɔ eguaree hɔ.” Morotow adaka no mu no, ɔyɛɛ dede kakra. Afei so, nna ɔsɛ dɛ mesan hyehyɛ ndzɛmba a ɔwɔ mu bio amma woeennhu dɛ obi hyɛ mu, na ɔno so maa mekyɛree kakra wɔ eguaree hɔ. Ntsi megye dzi paa dɛ, nna etuatsewfo no pɛ dɛ wohu dza mereyɛ wɔ hɔ, na iyi maa m’akoma tui na moho hyɛɛ ase popoe. Nna mibesi dɛn ebue abow yi? Sɛ mubue abow no na sɛ wohu dɛ m’akoma etu a, bi a wobenya adwen dɛ medze biribi risie hɔn. Ntsi mobɔɔ mpaa wɔ me tsirmu, na meserɛɛ Jehovah dɛ ɔmboa me. Afei, mubuee abow no, na mikyiaa hɔn bɔkɔɔ. Hɔ ara na hɔn mu kor piaa me sii nkyɛn na ɔkɛhyɛɛ eguaree hɔ, na obuee cupboard no mu, na ɔkekaa ndzɛmba a nna osisi mu no bobɔɔ mu, na ɔdaan noho. Ɔyɛɛ no huu paa dɛ oennhu obiara wɔ hɔ. Afei, ɔnye no nkorɔfo no kɔhwehwɛɛ adan nkaa no mu, na wɔfoow dan no sor kɔhwehwɛɛ hɔ nyina. Naaso woennhu obiara wɔ hɔ.

Paul: Edziban ho yɛɛ dzen abosoom pii. Naaso ndzɛmba a nna ɔma yɛnye Jehovah ntamu yɛ papa no na ɔboaa hɛn. Mpɛn pii no, nna yenndzidzi anapa. Naaso nna yehu daa asɛm a yɛyɛ wɔ Bethel no dɛ hɛn “anapa edziban.” Iyi hyɛɛ hɛn dzen ma yetumii gyinaa ɔhaw a nna yɛrefa mu no ano.

Nna yenyim dɛ sɛ hɛn edziban na nsu sa a, ɔbɛma yɛnye enuanom a woebosuma wɔ hɔ no nyina epue. Sɛ ɔba no dɛm so a, wobotum ekuku enuanom a nna yɛnye hɔn esie no. Naaso ɔtɔ da a, nna kwan a Jehovah fa do ma hɛn nsa ka ndzɛmba a yehia wɔ ne ber mu no, nna ɔyɛ hɛnara mpo nwanwa. Jehovah maa hɛn nsa kaa dza yehia no, na ɔkaa hɛn akoma so too hɛn yamu.

Aber a ndzɛmba regye nsamu wɔ ɔman no mu no, nna hyerɛn ara na nokwar no so rehyerɛn. Mpɛn pii no, nna ɔsɛ dɛ enuanom guan dze per hɔn nkwa, naaso wɔamma ɔhaw ahorow a wohyiae no annsɛɛ hɔn gyedzi, na wɔammper hɔnho annyɛ biribiara a ɔbɛhaw hɔn tsibowa. Enuanom binom kaa dɛ dza wɔrefa mu no “risiesie hɔn ama ahohiahia kɛse no.” Asafo mu mpanyimfo nye enuanom mberantsɛ dze akokodur dzii ndzɛmba enyim boaa hɔn nuanom Christianfo. Enuanom a woguanee fii hɔn efie mu no boaboaa hɔnho hɔnho, na wɔhyɛɛ ase kaa asɛmpa no kyerɛɛ afofor a nna wɔwɔ hɔ no. Wɔdze ndua a nna ɔwɔ kwaa mu no bi nye biribiara a wonyae no sii Ahendzi Asa bi wɔ kwaa no mu, na wɔyɛɛ asafo nhyiamu wɔ hɔ. Nna ndzɛmba mu yɛ dzen ma enuanom no. Naaso, nna sɛ wonya kwan nye hɔn nuanom kehyia mu anaa sɛ wɔka asɛmpa no bi kyerɛ nkorɔfo a, wonya awerɛkyekyer na ɔboa hɔn ma wonya awerɛhyɛmu dɛ ‘wɔakyea naaso ommbui.’ Sɛ nna yɛrekyekyɛ ndzɛmba bi a enuanom no hia tse dɛ edziban na ntar a, nna hɔn mu pii ka dɛ wɔpɛ asɛnka baag. Iyi kaa hɛn akoma paa! Ewudzisɛm a ɔkɔr do wɔ ɔko no  mu no haaw nkorɔfo beberee na ɔmaa wodzii awerɛhow, ntsi nna ohia dɛ wɔtse asɛmpa no. Ntsi sɛ nna wohu mbrɛ Adasefo no si dodɔ hɔnho na hɔn enyi agye no a, nna ɔyɛ hɔn nwanwa paa. Enuanom no hyerɛnee dɛ kan wɔ sum mu! (Matt. 5:​14-16) Nsi nye ahokeka a enuanom no dze yɛɛ hɔn adze no maa etuatsewfo no mu bi mpo bɛyɛɛ Adasefo.

Paul: Ɔtɔ da a, nna ɔsɛ dɛ yeguan fi ɔman no mu. Mprɛnsa dze, yɛkɔree no wɔannkyɛr na yɛsanee bae. Na mprenu so dze, yɛkɔree no yedzii afe. Akyerɛbaa asɛmpatserɛwnyi bi kaa asɛm bi, na yɛnye no yɛ adwen paa. Ɔkaa dɛ: “Yɛkɔr Gilead no, wɔkyerɛɛ hɛn dɛ yɛndɔ hɛn nuanom no wɔ beebiara a yɛbɔkɔ no na yɛmfa hɛn akoma nhyɛ biribiara a yɛyɛ no mu, na dɛmara na yɛyɛe. Ntsi aber a nna yerigya enuanom no hɔ no, ɔyɛɛ hɛn yaw paa na hɛn werɛ howee!” Yɛkɔr aman ahorow bi a nna ɔbembɛn Liberia no do. Naaso, enyigyesɛm nye dɛ yenyaa hokwan boaa enuanom a nna wɔwɔ Liberia no.

Anne: May 1996 no, asɛmpatserɛwfo baanan a yɛwɔ ɔman no mu faa Bethel kaar na yɛfaa Liberia Bethel no ne nkrataa ahorow bi a no ho hia, na yesii kwan do. Nna yɛpɛ dɛ yɛkɛhyɛ beebi a hɔ nnyɛ hu. Nna yebotwa kilomita 16 (akwansin 10) kwan. Hɔ ara na etuatsewfo bi yii hɔn enyim. Nna hɔn bo efuw paa. Wɔtotoow hɔn etur kyerɛɛ wimu. Wogyinaa hɛn, na wɔtwee hɛn mu baasa fii kaar no mu ma ɔkaa mo kun Paul nankotsee wɔ kaar no mu. Afei, wotuu kaar no nye no kɔree. Asɛm no tɔɔ hɛn do. Yɛwɔ hɔ ara na yehun dɛ Paul nam nyimpadɔm no mu reba, na bɔgya rosɔn no. Nna hɔ ayɛ begyabegya. Ntsi ahyɛse no, nna ɔyɛ hɛn dɛ gyama wɔatow no itur, naaso yɛkaa dɛ sɛ wɔtoow no itur a nkyɛ orunntum nnantsew! Dza osii nye dɛ aber a etuatsewfo no mu kor ripia no efi kaar no mu no, ɔbɔɔ no. Naaso enyigyesɛm nye dɛ, oemmpira kɛse.

Yehun asogyafo kaar bi dɛ osi hɔ a ɔreyɛ etu akɔ. Nna nyimpa ayɛ mu ma, na nna hɔn nyina akoma etu paa. Yɛkɔfoow bi, naaso osiandɛ nna kaar no mu ayɛ ma ntsi yɛtaar ho dɛmara. Driver no tsiaa do, na ɔkaa ketseketse bi nkyɛ yɛpanee. Yɛtseatseaa mu dɛ ongyina ma yensian, naaso nna noara so mpo suro dɛ obegyina. Ntsi yɛtaar kaar no ho dɛmara dze kodurii, na iyi maa yɛberɛe paa. Yesianee no, nna hɛnho da ho ara rowosow gidzigidzi.

Paul: Nna yennkitsa biribiara, na nna hɛn ntar nyina so ayɛ fi pɔtɔɔ. Sɛ oyi hwɛ ne nyɛnko n’enyim a, nna oyi so ahwɛ ne nyɛnko n’enyim. Nna ɔyɛ hɛn nwanwa dɛ yɛda ho ara tse ase. Yɛdaa paado, na beebi a yɛdae no, nna helicopter bi si hɔ. Nna ehwɛ mbrɛ wɔatotow etur abobɔ mu no a, ɔbɛyɛ wo dɛ gyama ɔasɛɛ. Naaso adze kyee no, ɔno ara na yɛfowee kɔr Sierra Leone. Hɛn enyi gyee paa dɛ yetumii kodur Sierra Leone, naaso nna yɛda ho ara rodwen hɛn nuanom Christianfo a yeegyaa hɔn ekyir no ho.

Anne: Yekodur Sierra Leone Bethel a ɔwɔ Freetown no, enuanom no gyee hɛn fɛw do, na wɔmaa hɛn nsa kaa dza yehia biara. Naaso biribi fofor bi sii a nna monnhwɛ kwan koraa. Nna mowɔ hɔ ara, ebɔhwɛ no, nna etsirmɔdzensɛm a medze m’enyi hunii wɔ Liberia no ebesi me tsirmu. Adze kye a, nna ɔyɛ me dɛ annhwɛ a biribi bɔn bi besi. Da biara nna m’akoma etu. Sɛ nna yɛkɛda anafua so a, nna metaa bɔ piriw, na mobɔsoɛr no, nna moho ayɛ nwinwinnwin na mfifir so retsew me. Sɛ ɔba no dɛm a, munntum nngye ahom. Dza nna Paul yɛ nye dɛ ɔka me fua na ɔnye mo bɔ mpaa. Sɛ owie a, yɛtow asafo ndwom dɛmara kesi dɛ ahopopo no begyaa. Nna ɔyɛ me dɛ gyama morobɔ dam, ntsi metsee nka dɛ murunntum nnyɛ asɛmpatserɛw edwuma no bio.

Mese, mo werɛ rimmfir dza osii dapɛn a odzi hɔ no da. Magazine ebien bi bae toatoaa do, na ɔboaa me paa. No mu kor nye June 8, 1996 Nyan! no. Nna asɛm bi wɔ mu a wɔato dzin “Coping With Panic Attacks” (“Ewɔ Hɔ Ara Na Sɛ Ebɔ Hu A, Ebɛnadze Na Ibotum Ayɛ?”) Aber a mekenkanee no, mebɛtsee siantsir a nna dɛm adze no yɛ me no ase yie. Magazine a otsia ebien no so nye May 15, 1996 Ɔweɔn-Aban no. Nna asɛm bi wɔ mu a wɔato dzin “Wonya Hɔn Ahoɔdzen Fi Hen?” Dɛm Ɔweɔn-Aban no mu no, nna fafranta bi a ne ntsaban ne fa bi asɛɛ ho mfonyin wɔ mu. Ɔweɔn-Aban no kyerɛkyerɛɛ mu dɛ, ɔmmfa ho dɛ fafranta no ne ntsaban ne fa bi asɛɛ no, ɔkɔ do ara dzidzi na otu. Ntsi hɛn so, osian ndzɛmba bɔn a woesisi wɔ hɛn asetsena mu ntsi, sɛ yɛyɛ basaa mpo a, Jehovah no sunsum krɔnkrɔn no botum aboa hɛn ma yaakɔ do ara ayɛ dza yebotum biara aboa afofor. Jehovah nam dɛm magazine ebien yi do dze dza nna mihia no maa wɔ ne ber mu pɛpɛɛpɛ, na ɔhyɛɛ me dzen. (Matt. 24:45) Mohwehwɛɛ nsɛm a ɔtsetse dɛm pii wɔ asafo nwoma ahorow mu, na moboaboaa ano dze siei. Dɛm nhwehwɛmu a meyɛe yi boaa me paa. Ntsi mber bi ekyir no, ndzɛmba bɔn a osisii a mowɔ hɔ ara a nna woebesi me tsirmu no, nkakrankakra otui yewee koraa.

Paul: Aber biara a nna yɛbɛsan akɔ Liberia no, nna hɛn enyi gye paa. Afe 2004 baa n’ewiei no, nna yɛatsena Liberia bɛyɛ mfe 20. Ewiei koraa no, ɔko no baa n’ewiei. Ahyehyɛdze no dze nhyehyɛɛ guu akwan mu mbrɛ ɔbɛyɛ a  wobotum esisi adan bi wɔ Bethel. Naaso dɛm aber no mu ara na wɔmaa hɛn dwumadzi fofor bi a yɛnnhwɛ kwan.

Nna yɛabɛpɛ enuanom no hɔn asɛm paa, na nna yɛnye hɔn tse dɛ hɛn ebusuafo. Ntsi nna yɛmmpɛ dɛ yegya hɔn hɔ koraa, naaso nna hwee nnyi hɔ a yebotum ayɛ. Nokwasɛm nye yi, nna ɔnnda famu mma hɛn koraa. Naaso yebohun dɛ aber a yegyaa hɛn ebusuafo a nna wɔda hɛn akoma do no hɔ na yɛkɔr Gilead no, Jehovah hyiraa hɛn paa. Ntsi seseiara so, ɔwɔ mu dɛ ɔsɛ dɛ yegya hɛn anyɛnkofo no hɔ kɔsom wɔ beebi fofor dze, naaso nna yenyim dɛ Jehovah rinngyaa hɛn da. Wɔkaa dɛ yɛnkɔsom wɔ Ghana; ɔyɛ ɔman bi a ɔbɛn Liberia.

Anne: Yefii Liberia no, yesui papa. Asafo mu panyin bi a wɔfrɛ no Frank a nna ne mfe akɔ enyim na n’adwen mu da hɔ no kaa asɛm bi kyerɛɛ hɛn. Asɛm a ɔkae nye dɛ: “Ɔsɛ dɛ hom werɛ fir hɛn!” Ɔdze kaa ho dɛ: “Yenyim dɛ hom werɛ rimmfir hɛn da, naaso ɔyɛ a hom mfi hom akoma mu ndɔ enuanom a wɔwɔ Ghana no so. Dwumadzi fofor a hom nsa aka yi so fi Jehovah hɔ, ntsi ɔsɛ dɛ hom hwɛ enuanom a wɔwɔ hɔ no yie paa na hom boa hɔn.” Asɛm a onua yi kaa kyerɛɛ hɛn no hyɛɛ hɛn nkuran paa, na ɔboaa hɛn ma yesiesiee hɛn adwen maa beebi a nna yɛrokɔ no. Nna enuanom kakraabi na yenyim hɔn wɔ hɔ, na nna yenntsenaa ɔman no mu so da.

Paul: Naaso, yebodur Ghana no wɔannkyɛr biara na yɛbɛpɛɛ enuanom a wɔwɔ hɔ no hɔn asɛm. Nna Adasefo pii wɔ ɔman no mu! Nna enuanom no gyedzi yɛ dzen na nna wɔdze nokwardzi rosom Jehovah ɔmmfa ho ɔhaw ahorow a nna worihyia no. Ntsi yesuaa pii fii hɔn hɔ. Yɛdze mfe 13 somee wɔ Ghana, na ɔno ekyir no, wɔmaa hɛn dwumadzi fofor bi a nna hɛn enyi nnda. Wɔkaa dɛ yɛnkɔsom wɔ East Africa Bethel a ɔwɔ Kenya no. Nna yenyim dɛ yɛbɛfe hɛn anyɛnkofo a wɔwɔ Ghana nye Liberia no nyina, naaso yebodur Kenya no, wɔannkyɛr koraa na enuanom a wɔwɔ ha no so bɛyɛɛ hɛn anyɛnkofo. Na dɛ mbrɛ nna Ghana na Liberia hɔn asaasesin no so no, dɛmara so na ɔtse wɔ Kenya ha so.

Anne: Mfe dodow a yɛdze asom yi mu no, mehyia ɔhaw ahorow bi a no mu yɛ dzen paa. Sɛ yɛfa tsebea bi a ɔyɛ hu mu a, obotum abɔ hɛn yarba anaa wɔama yaayɛ hahaaha. Jehovah mmfa anwanwa kwan bi do mmbɔ hɛnho ban mmfi ndzɛmba a ɔtsetse dɛm ho. Ndɛ na ndɛ nyina, sɛ metse dɛ wɔatow itur a, me yamu tum hye me, na metse nka dɛ me nsa ayɛ tsitsirtsii. Naaso Jehovah ama me ndzɛmba ahorow pii a ɔboa me ma me gyedzi yɛ dzen, na ɔnam hɛn nuanom Christianfo so do hyɛ me nkuran. Mebohu dɛ ɔnnsɛ dɛ yɛtoto hɛn ebusua som, asɛnka nye asafo nhyiamu adze koraa. Osiandɛ sɛ yɛkɔ do yɛ dɛm ndzɛmba yi a, Jehovah so botum aboa hɛn ma yaakɔ do ayɛ dwumadzi biara a ɔdze ahyɛ hɛn nsa no.

Paul: Bi a obi bebisa hɛn dɛ, “Hom enyi gye edwuma a hom reyɛ no ho anaa?” Ɔwɔ mu dɛ aman ahorow bi do yɛ fɛw dze, naaso ndzɛmba botum asesa prɛko pɛr ma hɔ ayɛ hu. Dɛm ntsi, ebɛnadze na ɔma hɛn enyi gye paa wɔ ɔman biara a yɛbɔkɔ do no mu? Ɔyɛ hɛn nuanom Christianfo yi ara. Yenndzi hɔnho agor koraa. Wɔda hɛn akoma do. Ɔmmfa ho dɛ ɔsor beebi a yefifi nye mbusua a yefi mu no, yɛyɛ hɛn adze kor. Nna hɛn adwen yɛ hɛn dɛ wɔdze hɛn kɔr hɔ dɛ yɛnkɛhyɛ enuanom no nkuran, naaso owiee ase no, hɔn mbom na wɔahyɛ hɛn nkuran.

Enyigyesɛm nye dɛ, beebi a yɛbɔkɔ biara hɛn nuanom wɔ hɔ. Iyi yɛ nwanwa ankasa! Asafo biara a yɛbɔkɔ mu so, yɛtse nka dɛ yɛaba fie. Yɛwɔ awerɛhyɛmu dɛ, sɛ yɛkɔ do dze hɛnho to Jehovah do a, ɔbɛhyɛ hɛn dzen, na ɔbɛma hɛn nsa so aka dza yehia.—Phil. 4:13.