Nyimpa pii nye binom mpo a wɔka dɛ wɔyɛ Christianfo no tse nka dɛ, dza Bible no ka fa nda mu nkitahodzi nye awar ho no etwa mu. Osian mbrɛ wiadze rotow kɔ ntsi, nsɔr ahorow bi asesa hɔn nkyerɛkyerɛ a ɔfa abrabɔ a ɔyɛ papa nye dza ɔyɛ bɔn ho. Ntsi ehwɛ a, ɔsɛ dɛ yɛdze dza Nyankopɔn ka fa papa na bɔn ho no bɔ hɛn bra? Nyew. Nkyerɛkyerɛmu a odzi do yi bɔboa hɛn ma yeehu siantsir a ɔtse dɛm.

 Mbrɛ wosii bɔɔ nyimpa no ma yehu dɛ, mbrɛ ɔtse biara yebehia akwankyerɛ efi Ɔbɔadze no hɔ. Bible no ka dɛ: “Onnyi ɔdasanyi a ɔnam ne nsamu mbrɛ obodua etutu n’anamɔn.” (Jeremiah 10:23) Ɔwɔ mu dɛ Jehovah a Nyankopɔn bɔɔ hɛn wɔ kwan bi do a ɔma hɛnankasa tum sisi gyinae, naaso ɔamma hɛn tum dɛ hɛnankasa yɛnkyerɛ dza ɔyɛ papa anaa bɔn. Ne dɛm ntsi ɔpɛ dɛ yɛdze hɛn werɛ hyɛ no mu na yɛma ɔkyerɛ hɛn dza ɔyɛ papa na bɔn.​—Mbɛbusɛm 3:5.

 Nyankopɔn ama hɛn akwankyerɛ a ɔfa abrabɔ a ɔyɛ papa na dza ɔyɛ bɔn ho wɔ Bible mu. Ma yɛnhwɛ siantsir ebien bi ntsi a dɛm akwankyerɛ yi ho hia.

•   Nyankopɔn na ɔbɔɔ hɛn. (Ndwom 100:3) Jehovah Nyankopɔn na ɔbɔɔ hɛn, ntsi onyim adze pɔtsee a yehia a ɔbɛma yeenya apɔwmudzen na hɛn enyi agye. Afei so, sɛ yɛammfa dza ɔka fa papa na bɔn ho no annyɛ edwuma a, onyim dza obefi mu aba. (Galatiafo 6:7) Bio so, Jehovah pɛ dɛ osi hɛn yie wɔ abrabɔ mu. Iyi ntsi, Bible no ka Nyankopɔn ho asɛm dɛ, Ɔno na “ɔkyerɛkyerɛ wo ma wo mfaso, na ogya wo wɔ ɔkwan a ewɔ dɛ efa do no mu.”​—Isaiah 48:17.

•   Hɛn akoma botum adaadaa hɛn. Nyimpa pii susu dɛ sɛ wodzi hɔn akɔndɔ, mbrɛ wɔtse nka, nye dza hɔn akoma pɛ ekyir a, obotum aboa hɔn ma hɔnankasa ehu dza ɔyɛ papa na dza ɔyɛ bɔn. Naaso, Bible ka dɛ ‘akoma yɛ ɔdaadaafo kyɛn adze nyina, na no ho yɛ ahomtsew.’ (Jeremiah 17:9) Sɛ yɛamma Nyankopɔn n’Asɛm no annkyerɛ hɛn kwan na yedzi hɛn akɔndɔ ekyir a, ɔbɛma yɛayɛ ndzɛmba bi a ekyir yi yebonu hɛnho.​—Mbɛbusɛm 28:26; Ɔsɛnkafo 10:2.

 Oho! Bible no ma yehu nokwasɛm a ɔfa Nyankopɔn ho nye mbrɛ ɔpɛ dɛ yɛbɔ hɛn bra. (1 Corinthfo 6:9-11; Galatiafo 5:19-23) Nyankopɔn pɛ dɛ obiara hu dɛm nokwasɛm yi. (1 Timothy 2:3, 4) Ntsi ɔsɛ dɛ Christianfo dze dza Bible no ka no kyerɛkyerɛ nkorɔfo.​—Titus 1:7-9.

 Osiandɛ nyimpa pii mmpɛ dɛ wɔdze dza Bible no ka no bɔ hɔn bra ntsi, wodzi nyamesom akandzifo a wɔka nsɛm a wɔpɛ dɛ wɔtse kyerɛ hɔn no ekyir. (2 Timothy 4:3) Naaso, Bible no bɔ kɔkɔ dɛ: “Wondue, hɔn a wɔfrɛ bɔn dɛ papa, na papa dɛ bɔn.” (Isaiah 5:20) Iyi ma yehu dɛ nyamesom akandzifo a wɔmmfa dza Bible no ka fa papa na bɔn ho no nnkyerɛkyerɛ nkorɔfo no, Nyankopɔn bɔtwe hɔn aso.

 Oho. Hɔn a wɔpɛ dɛ wɔyɛ Nyankopɔn n’apɛdze no, wosuasua Jesus Christ na wɔdze ne nkyerɛkyerɛ bɔ hɔn bra. Ɔkyerɛkyerɛɛ n’ekyirdzifo dɛ mma wommbu nkorɔfo atsɛn na mbom wombu nyimpa nyina na wɔndɔ hɔn so.​—Matthew 5:43, 44; 7:1.

 Jesus kyerɛkyerɛɛ n’ekyirdzifo dɛ ɔwɔ dɛ wɔdze dza Nyankopɔn ka fa papa na bɔn ho no bɔ hɔn bra. Naaso, nna ɔwɔ dɛ wɔtse ase dɛ obiara wɔ hokwan dɛ osi mbrɛ obesi abɔ ne bra ho gyinae. (Matthew 10:14) Jesus annhyɛ n’ekyirdzifo dɛ wɔmfa amanyɛsɛm anaa ɔkwan fofor biara do nhyɛ nkorɔfo ma wɔmfa Nyankopɔn n’Asɛm mbɔ hɔn bra.​—John 17:14, 16; 18:36.

 Hɔn a wɔbɔ mbɔdzen dze dza Nyankopɔn ka fa papa na bɔn ho no bɔ hɔn bra no benya mfaso ndɛ na daakye. (Ndwom 19:8, 11) Mfaso no bi nye dɛ:

•   Hɔn enyi bɛgye.​—Mbɛbusɛm 29:6.

•   Wɔbɛyɛ Nyankopɔn n’anyɛnkofo.​—Mbɛbusɛm 3:32.

•   Nyankopɔn bɔboa hɔn wɔ mber a no mu yɛ dzen mu.​—Mbɛbusɛm 11:8.

•   Wɔwɔ enyidado dɛ wobenya daa nkwa wɔ asaase do.​—Ndwom 37:29.