Dza ɔda nyimpa pii hɔn akoma do nye dɛ nyimpa a ɔsor beebi a wofi, hɔn kasaa, na hɔn amambra no, wɔnye hɔn bedzi no yie. Naaso wonnhu no dɛm.

•   “Nyimpa mu nyiyimu resɛɛ ndwumakuw, mbusua ahorow na nyimpa n’asetsena. Osian iyi ntsi nyimpa bu noho dɛ ɔkyɛn ne nyɛnko.”​—Amanaman Nkabɔmu Kuw No Kyerɛwfo Panyin António Guterres.

 Ehwɛ a ber bi bɛba a nyimpa nyina bɛgye ato mu dɛ obiara nnkyɛn ne nyɛnko? Ebɛn asɛm na Bible no ka fa ho?

 Bible no boa hɛn ma yehu mbrɛ Nyankopɔn bu nyimpa a ɔsor beebi a wofi, hɔn kasaa, na hɔn amambra no.

•   ‘Nyankopɔn nam nyimpa kor do yɛɛ nyimpa a wɔwɔ amanaman nyina, dɛ wɔntsena asaase nyina enyi.’​—Asomafo Ndwuma 17:26.

•   “Nyankopɔn nnhwɛ nyimpa enyim: na mbom ɔman biara mu nyia osuro no na ɔyɛ ndzeyɛtsenenee no, ɔpɛ dɛ ɔgye no.”​—Asomafo Ndwuma 10:34, 35.

 Bible no ma yehu dɛ nyimpa nyina yɛ ebusua kor, na Nyankopɔn gye nyimpa a ɔsor beebi a wofi, hɔn kasaa, na hɔn amambra no nyina to mu.

 Nyankopɔn n’Ahendzi mu no, nyimpa ahorow nyina bɛgye ato mu dɛ obi nnkyɛn ne nyɛnko. Ahendzi yi yɛ aban bi a ɔwɔ sor. Dɛm aban no bɛkyerɛkyerɛ nyimpa ma woeehu kwan pa a wɔnye nyimpa ahorow nyina bedzi pɛpɛɛpɛ. Osiandɛ wɔbɛkyerɛkyerɛ hɔn ntsi, nyimpa ho adwen bɔn biara a wɔwɔ no wobeyi efi hɔn tsirmu.

•   “Wiadze mba bosua ndzeyɛtsenenee.”​—Isaiah 26:9.

•   “Na ndzeyɛtsenenee edwuma bɛyɛ asomdwee; na ndzeyɛtsenenee no nsunsuando ayɛ kommyɛ na awerɛhyɛmu daa.”​—Isaiah 32:17.

 Ndɛ, nyimpa ɔpepem pii rusua Bible no mbrɛ ɔbɛyɛ a wɔnye afofor bedzi no yie na woebu hɔn.

•   Sɛ epɛ dɛ ihu pii fa asɛm yi ho a, kenkan Awake! a wɔato dzin “Is There a Cure for Prejudice?”

•   Kenkan asɛm a wɔato dzin “Talking to Children About Racism” na ibohu mbrɛ awofo besi nye hɔn mba abɔ dɛm asɛntsir yi ho nkɔmbɔ.