MAJI 23, 2022 | IROGO VOU: OKOTOVA 11, 2024
RUSIA

IROGO VOU—VEISAUTAKI NA ITOTOGI | Tokoni Ratou tu ga o Jiova

SARAVA/ROGOCA

Ena ika10 ni Okotova 2024, e vakataulewa na mataveilewai na Khabarovsk Territory Court ena kisi me baleti Sister Maya Karpushkina, Brother Stanislav Kim, Brother Nikolay Polevodov, Sister Svetlana Sedova, Brother Vitaliy Zhuk, kei na watina o Tatyana. Na vakalailaitaki mai na dua na yabaki nodratou vakatatabutaki o Maya, Svetlana kei Tatyana. E vakatatabutaki o Stanislav me vitu na yabaki, rua na vula. O Vitaliy e vakatatabutaki me vitu na yabaki, va na vula. O Nikolay e vakatatabutaki me vitu na yabaki, ono na vula. Ni tau oti ga na lewa ratou sa sere mai na tacida tagane qori.

Ena ika20 ni June 2024, e kaya na mataveilewai na Industrialniy District Court of the Khabarovsk Territory mai Rusia, ni cala o Sister Maya Karpushkina, Brother Stanislav Kim, Brother Nikolay Polevodov, Sister Svetlana Sedova, Brother Vitaliy Zhuk kei na watina o Tatyana. E vakatatabutaki me va na yabaki o Maya. O Svetlana kei Tatyana rau vakatatabutaki me lima na yabaki. Ena gauna qo ratou na sega ni biu e valeniveivesu na tacida yalewa qori. Ia o Stanislav ena vesu me walu na yabaki rua na vula, o Vitaliy ena vesu me walu na yabaki va na vula, kei Nikolay ena vesu me walu na yabaki ono na vula. Qori na itotogi levu duadua me tau vua e dua na iVakadinadina i Jiova me tekivu mai nodra vakatatabutaki ena 2017. Ni tau oti ga na lewa, ratou sa lai vesu na tacida tagane.

Veitaravi ni Gauna

Noveba 10, 2018

Era tarova na vakailesilesi na nodra pati tiko e rauta ni le 55 ena dua na valenikana. O ira kece na tiko kina era vakatarogi, tauri na mawe ni ligadra (fingerprint), era taba tale ga wili kina o ira na gone
Noveba 12, 2018

Ratou vesu qai wawa veilewai o Stanislav, Nikolay kei Vitaliy. Ratou vakatabui me ratou gole ena dua tale na vanua o Maya, Svetlana kei Tatyana
Janueri 14, 2019

Rau sere o Nikolay kei Vitaliy, qai vakatatabutaki i vale
Janueri 29, 2019

Sere o Stanislav, qai vakatatabutaki i vale
Julai 18, 2019

Kau na nodratou kisi ena mataveilewai na Industrialniy District Court of the Khabarovsk Territory
Okosita 2, 2019

Oti nona vakatatabutaki i vale o Nikolay
Seviteba 9, 2019

Rau veilewaitaki o Stanislav kei Nikolay, ena dua tale na kisi ena mataveilewai na Zheleznodorozhniy District Court of Khabarovsk
Noveba 5, 2019

E veidinadinati kei na mataveilewai o Nikolay ni na rairai ena gauna ga e kacivi kina, e sega ni rawa ni gole ena dua tale na vanua (recognizance agreement)
Janueri 18, 2020

Oti nodrau vakatatabutaki i vale o Stanislav kei Vitaliy
Feperueri 4, 2020

Tukuna na mataveilewai ni rau cala o Stanislav kei Nikolay ena ikarua ni nodrau kisi. E vakataulewataka na Zheleznodorozhniy District Court of Khabarovsk, me rube na kedrau itotogi me rua na yabaki me rau vakatatabutaki tale ga
Okosita 3, 2020

Kaya na Industrialniy District Court me kau lesu na kisi ina tabana ni dauveibeitaki. E qai kerea na dauveibeitaki me rogoci tale na kisi
Seviteba 29, 2020

Dikeva tale na Khabarovsk Regional Court na nodratou kerekere na tabana ni dauveibeitaki. E vakadonui o Stanislav kei Nikolay me rau vosa vei turaganilewa. Rau kaya ni matanitu o Rusia e okati ena nodra veidinadinati na veimatanitu veiyasa i vuravura me kua ni beci na nodra dodonu na lewenivanua. E okati kina na nodra dodonu ni sokalou
Okotova 12, 2020

Tokona na Khabarovsk Regional Court na lewa e tauca na Industrialniy District Court, qai kau lesu na kisi vei ratou na tabana ni dauveibeitaki
Tiseba 15, 2021

Kau tale na kisi ena Industrialniy District Court

Kedratou iTukutuku

Stanislav Kim

Sucu: 1968 (Khabarovsk, Yasayasa o Khabarovsk)

Me baleti koya: Ni se gone, e dau taleitaka na lagasere, qito chess kei na checkers. A cakacaka tu ena tabana ni veivaqaqai ena dua na minisitiri ni matanitu

E sotavi ira na iVakadinadina i Jiova ni oti e dua na vakacalaka levu. Nona vulica na iVolatabu e vukei koya me kua ni lomabibi. Papitaiso sara ena 2004. Rau vakamau kei Olesya ena 2008. E rua na luvedrau

Ka e Tukuna

Cava o cakava mo veivolekati tiko ga kei Jiova?

E sega noqu iVolatabu ena gauna au vesu kina. Au saga gona meu nanuma qai vakasamataka vakatitobu e tini na tikinivolatabu ena dua na siga. Au saga tale ga meu cakava na veika au masulaka, e okati kina noqu vakasamataka e tini na ka meu vakavinavinakataka vua na Kalou, kei na tini na ka meu masulaka vua. Au dau talaucaka sara ga na lomaqu vei Jiova.

Nikolay Polevodov

Sucu: 1970 (Khabarovsk, Yasayasa o Khabarovsk)

Me baleti koya: Susu ena vuvale e sega ni daulotu. E daunilivaliva

E sega ni vakabauta na Kalou. Ia e veisau na nona rai ni vakadinadinataka ni bula tiko na Kalou, kei na dina ni ka e tukuna na iVolatabu. Papitaiso ena 1995. Oti rau vakamau kei Tatyana, e dua na luvedrau tagane

Ka e Tukuna

Cava o leqataka ena gauna o vesu tu kina? Cava o qai cakava?

Au dau leqataka na sala meu vakayaloqaqataki luvequ ni se qai yabaki tini ena gauna qori. . . . [Keirau] dau tuvanaka vakaveiwatini e veimacawa na neitou Sokalou Vakavuvale. Au dau vakarautaka eso na kilakila mada (crossword puzzle), droini se biuta vata eso na iyaloyalo (chart). Eso na gauna au dau digia e dua na ulutaga, vola eso na kena taro me veivosakitaki. Oti au na vakauta i vale e veimacawa na veika au sa vakarautaka.

O vakadinadinataka vakacava na veitokoni i Jiova ena gauna dredre qo?

E veimataka era dau mai rai na ovisa ena neimami rumu. E gole sara mai e dua vei ira, qai solia vei au e dua na ivola. E kaya: “O vakabauta na Kalou? Wilika qo.” Oti e mani biubiu. Kila na cava! E solia vei au na iVakadewa ni Vuravura Vou! . . . Gauna kece au vesu tu kina, au wilika na vakadewa vinaka duadua ni Vosa ni Kalou.

Svetlana Sedova

Sucu: 1969 (Komsomolsk-on-Amur, Yasayasa o Khabarovsk)

Me baleti koya: Ni se yabaki 3, e mate o tamana. E qai mate o tinana ni sa yabaki 14. E dau cakacaka ena valeniculacula. Gauna qo, e dausasamaki tiko. E taleitaka na tei senikau. E mate o watina ni ratou se lalai na luvedrau, e rua na tagane, dua na yalewa. E susugi ratou duadua tu mai

Ni se itabagone, e vakabauta ni tiko e dua na dauveibuli vuku. Papitaiso sara ena 1984

Ka e Tukuna

Cava o masulaka ena gauna dredre qo?

Au masulaka vei Jiova me vakayaloqaqataki au, me cakava tale ga qori vei ira na mataveitacini era sotava tale ga na ituvaki dredre. Ena veivuke ga ni Kalou, eda rawa ni vosota na ituvaki dredre ena vuravura e lewa tu qo o Setani.

Au vakadinadinataka vakalevu na nona tokoni au o Jiova. E kaya nona Vosa: “Oni yalodina vei koya e yalodina vei kemuni.”—2 Samuela 22:26.

Tatyana Zhuk

Sucu: 1973 (Khabarovsk, Yasayasa o Khabarovsk)

Me baleti koya: E nodra qasenivuli na murivuli. Gauna qo sa dausasamaki tiko

Ni yabaki 19, e via kila e levu na ka ena iVolatabu. E saumi ena iVolatabu e levu nona lomatarotaro me baleta na bula. Papitaiso sara ena 1994. Rau vakamau kei Vitaliy ena 1994

Ka e Tukuna

O rawa vakacava ni lomavakacegu tiko ga ena gauna dredre qo?

Era vukei au na mataveitacini kei watiqu meu kua ni leqataka na veika dredre e se bera ni yaco. Meu nanuma tiko ga na vuravura vou. . . . E yaga dina qori vei au.

Dua na ka na nona vukei au o Jiova meu lomavakacegu. . . . Ni caka na vaqaqara i vale, e tarogi au e dua na ovisa: “Cava o sega ni rere kina? O sa kila tiko na neitou yaco mai?” E sega ni kila na ovisa ni vakayaloqaqataki au vakalevu na veika e taroga qori!

Eda vakadeitaka ni o Jiova ena tokoni ratou tiko ga na tacida qori, wili kina o ira na vo ni mataveitacini era “ivakadinadina era vaka na o.”—Iperiu 12:1

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU