Ena 2017 ratou soko mai na tacida ena baravi o Mosquito (Miskito) e Nicaragua. E vakatokai na nodratou waqa o Sturi Yamni. Qo na ka e kaya e dua vei ratou o Stephen, “Keitou via lai vakayaloqaqataki ratou na mataveitacini ratou tiko sara vakayawa qai vukei ratou ena kena vunautaki na itukutuku vinaka ni rui levu na nodratou yalava.”

 Ratou biubiu na 12 na tacida ena taoni o Pearl Lagoon, ratou qai sokota cake na uciwai na Río Grande de Matagalpa me 200 na kilomita. Na ibalebale ni yaca ni nodratou waqa ena vosa vakaMiskito na “iTukutuku Vinaka,” ia ratou sega ni kila ni na lai dina sara qori ena ka ratou na lai sotava. Ni oti e 12 na aua nodratou soko, ratou yaco sara yani ena koro o La Cruz de Río Grande. Ratou tiko e kea e ono na tacida, dua na ka na nodratou veimarautaki ena gauna ratou sota kina.

 E mani yaco e dua na leqa tubukoso ena bogi ya. E tara na vanua ya e dua na draki ca, e tau bi na uca qai yaco na waluvu. Ni oti ga e vica na aua, e kabasu na uciwai na Río Grande de Matagalpa qai tubu tiko ga na wai me rua na siga. E luvu na Vale ni Soqoni kei na levu na vale e La Cruz. Ratou lai veivuke sara na tacida ratou vulagi yani ena nodra vueti na lewenikoro mai na nodra vale. Levu vei ira qori era lai vakaruru tu ena nona vale tabarua e dua na tacida me rua na bogi.

 Ena ikatolu ni bogi, e lai sikovi ratou yani na tacida ratou veisiko tiko yani na mea kei La Cruz. E kerea na nodratou veivuke. Ni kaukaua vinaka tu na nodratou waqa na Sturi Yamni, e rawa ni sokota kina na uciwai ena draki ca. E kerei ratou gona na mea me ratou kauti ira na lewe ni timi ni vakacoko mera vukei ira na lewenivanua era vakaleqai. Ratou tu vakarau na tacida me ratou veivuke.

 Ena siga tarava, ratou biubiu sara e tolu na tacida kei na timi ni vakacoko. E kaya o Stephen, “Ena gauna qori e kui kaukaua sara tu ga kina na wai, era ciri sobu tu mai na vunikau lelevu, dua na ka na viko ni wai qai totolo na kena kui.” E dina ni vakadomobula tu va qori na ituvaki, ia ratou yaco rawa na tacida ena tolu na koro.

 Ena gauna qori ratou lai veivakacegui tale ga kina vei ira na lewenikoro. Ratou veisoliyaka tale ga e dua na ilavelave ni Yadra! ni 2017, e veiganiti sara ga na kena iulutaga, “iTataqomaki ena Gauna ni Leqa Tubukoso.”

 Dua na ka nodra marautaka na lewenikoro na nodratou veivuke vakayago, vakayalo na tacida. Qo eso na ka era kaya na lewenikoro, “Ratou tu vakarau me ratou veivuke ena gauna e sotavi sara tu ga kina na ituvaki dredre.” Era kaya tale eso, “E laurai vei ratou na loloma dina.” Nira raica na ka ratou cakava na tacida me ratou vukei ratou kina na mataveitacini e kea kei ira eso tale, e uqeti ira mera via rogoca na itukutuku veivakacegui mai na iVolatabu.