E vakaitikotiko o Bryn e North Carolina mai Merika. E lewena na Komiti ni Veitaratara kei na Valenibula, e dau raica nodra qaravi vakavuniwai na iVakadinadina i Jiova era curu e valenibula.

 Ni veitauvi tiko na COVID-19 e sega ni vakatarai na veisiko ena levu na valenibula. Ia ni via kila o Bryn na sala me vukei ira kina na tacida era curu tu e valenibula, e qirita sara na dairekita e dau vukei ira vakayalo na curu e valenibula.

 Ia e sauma mai na qiri na ivukevuke ni dairekita. Ni sega ni vakatarai na veisiko, e kerea o Bryn vua me solia nona naba ni talevoni vei ira na tacida me rawa nira veivosaki. E mani vakadonuya na ivukevuke ni dairekita nona kerekere.

 E nanuma o Bryn me vukei ira tale ga eso tale era veiqaravi tu e valenibula. E kaya sara vei ivukevuke ni dairekita ni vakavinavinakataka vakalevu nodra veiqaravi na tabana ni bula, e nuitaka tale ga nira bulabula vinaka. E kaya tale ga vua ni levu na tamata e veiyasa i vuravura era lomaocaoca ena veitauvi ni matedewa, vakabibi o ira na veiqaravi e valenibula.

 E duavata kei Bryn na ivukevuke ni dairekita, qai kaya ni vaka vu lomaocaoca vakalevu e valenibula na COVID-19.

 E kaya vua o Bryn: “Levu na ulutaga yaga e tu ena neimami website ena vukei ira na lomaocaoca. Rawa ni o gole ena jw.org qai taipataka ena kato ni vaqara na ‘lomaocaoca.’ O na raica kina eso na ulutaga ena vakayaloqaqataki ira oni cakacaka vata.”

 Gauna rau veivosaki tiko kina e tabaka sara na ivukevuke ni dairekita noda website, qai taipataka ena kato ni vaqara na vosa “lomaocaoca.” E raica kina e levu na kena ulutaga. E kaya: “Wau! Au na vakaraitaka sara ga vei dairekita. Ena yaga vakalevu vei ira au cakacaka vata kei ira eso tale. Au na tabaka qai veisoliyaka.”

 Oti e vica na macawa rau veivosaki sara o Bryn kei na dairekita. E kaya na dairekita nira sa gole ina noda website ra qai tabaka na ulutaga ni lomaocaoca kei na so tale na ulutaga. Era veisoliyaka na ulutaga qori vei ira na nasi kei na so tale era veiqaravi tu e valenibula.

 E kaya o Bryn: “E vakavinavinakataka o dairekita na cakacaka eda cakava kei na matata ni ulutaga. E yaga sara ga vakalevu.”