Dua na siga e caka vuli iVolatabu tiko o Eliso e dua na iVakadinadina i Jiova, vua e dua na marama tataleitaki. Sega ni dede rau sa duri tu e nona katuba ni vale na marama qori, e dua na italatala kei watina. E qai kila o Eliso ni rua na macawa sa oti e tauvimate na luvedrau tagane duabau, mani mate sara.

Dua na ka nona tagilagalaga o yalewa ni duavata o Eliso kei na nona takali na luvedrau tagane. E mani kaya ena cudru na italatala: “Au sega ni taura rawa na vuna e cakava kina qo na Kalou! Rawa vakacava me kauta na luvequ duabau ga? E 28 na yabaki noqu cakava tu na ka vinaka, qo na ka e saumi au kina! Cava e vakamatei luvequ kina na Kalou?”

E kaya sara o Eliso na Kalou e sega ni vakamatei luvedrau. E vakamacalataka tale ga na ulutaga me vaka na ivoli, na veivakaturi, kei na vuna e vakatara kina na Kalou me yaco na veika ca. Rau kaya sara na veiwatini vei Eliso ni sa saumi dina na ka rau masulaka tiko.

Na macawa tarava rau tomani marama tataleitaki ena vuli iVolatabu. Rau vulica tiko o Eliso kei na marama qori na ulutaga “Na iNuinui Totoka me Baleti Ira na Wekada Era sa Takali,” ena ivola Na Cava Mada e Kaya na iVolatabu? Dua na ka nodrau vakarorogo vinaka na veiwatini ena gauna ni vuli.

Rau tiko sara ena soqo ni iVakadinadina i Jiova e Tbilisi, e Georgia. E uqeti rau dina na loloma kei na duavata era vakaraitaka na mataveitacini, qori na itovo rau via vakavulica vei ira nodrau lewenilotu, e dreve ga.