Au sega sara ga ni namaka me mavoa vakaca o koya keirau karate vata tiko niu caqeta vakacalaka na ucuna. E ora sara ga na lomaqu, au qai vakasamataka meu karate tiko ga se kua. Au dau taleitaka na karate me vicavata na yabaki, ia e veisau kece qori ena vakacalaka au cakava. Meu talanoataka mada se tekivu vakacava na noqu karate.

 Au susu voleka na siti o Buffalo, e Niu Yoka, Merika. Ratou duru ni lotu Katolika na noqu vuvale, keitou dau mamarau. Au vuli ena koronivuli ni lotu Katolika, au lesi tale ga meu ivukevuke ni bete. Rau vinakata noqu itubutubu me keirau rawaka vakaveitacini. Ni dau suka na vuli, rau na vakadonuya meu qito se cakacaka vagauna kevaka wale ga au pasi vinaka e koronivuli. Qori e vakavulici au sara ga meu dau cakacaka vakaukaua.

 Au tekivu vulica na karate niu yabaki 17. Ena veimacawa, au dau vuli me tolu na aua ena ono na siga. Vica vata na yabaki noqu cakava tiko qori. Au dau vakayagataka tale ga e vica vata na aua ena veimacawa meu vakasamataka kina eso na iwalewale vou ni karate, qai sarava na kena vidio meu rawa ni toroya cake tiko ga kina na noqu iwalewale ni karate. Au dau taleitaka mada ga meu vakatovotovo ni ubi tu na mataqu, keu vakaiyaragi tu mada ga. Au rawa ni voroka na kau se simede e ligaqu. Au kenadau sara ga ena karate, qai qaqa ena levu na sotasota. E bibi duadua ena noqu bula na karate.

 Au nanuma sara ga ni sa koya sara ga qori na bula. Au vakoroi ena univesiti, au lai cakacaka sara ena dua na kabani kilai levu ni kompiuta. Au marautaka na ka e solia vata mai na kabani me vaka na tubu ni isau, dua noqu vale, au vakaitau tale ga. Era nanuma e levu niu marau tu, ia au lomatarotarotaka e levu na ka baleta na bula.

 Meu vaqara na isau ni noqu taro, au dau lai lotu kina vakarua ena veimacawa, au qai masu tale ga vua na Kalou. Ia e tekivu veisau na noqu bula ni oti noqu veitalanoa kei na noqu itokani. Au tarogi koya: “O bau vakasamataka tu se cava na inaki ni noda bula? Sa rui levu na leqa, e levu tale ga na veivakaduiduitaki!” E kaya vei au ni a taroga tale tu ga na taro qori, sa qai kunea ena iVolatabu na kena isau. E solia vei au na ivola na Ko na Rawa ni Bula Tawamudu ena Vuravura Parataisi. a E tukuna vei au ni a vulica na iVolatabu kei ira na iVakadinadina i Jiova. Au sega ni via wilika ena imatai ni gauna, au nanuma ni cala keu na wilika e dua tale na ivola ni lotu. Ia na levu ni noqu via kila na isau ni noqu taro, au via lai vakadinadinataka kina ke dina na ka era vakavulica na iVakadinadina i Jiova se sega.

 Au qoroya sara ga na ka e tukuna na iVolatabu. Au vulica ni nona inaki taumada na Kalou vei keda na kawatamata meda bula tawamudu ena vuravura parataisi. E sega ni veisau na nona inaki qori. (Vakatekivu 1:28) Au kidacala sara ga niu raica na yaca ni Kalou o Jiova ena noqu iVolatabu na King James. Au qai vulica tale ga ni yaca ga qori au dau cavuqaqataka tiko ena Masu ni Turaga. (Same 83:18; Maciu 6:9) Au sa qai kila tale ga na vuna e vakatara tiko kina na Kalou na rarawa. E vakaibalebale na ka kece au mai vulica! Au marau sara ga.

 Au na sega vakadua ni guilecava na imatai ni gauna au lako kina ena nodra soqoni na iVakadinadina i Jiova. Era veikauaitaki, ra qai via kila tale ga na yacaqu. Au rogoca ena vunau soqovi levu na ulutaga me baleta na masu e rogoca na Kalou. Au taleitaka sara ga na ka au rogoca qori niu se qai kerea tiko ga vua na Kalou na nona veivuke. Au tiko tale ga ena iVakananumi ni mate i Jisu. Dua na ka au qoroya me baleti ira na gone ena soqoni qori nira kila vinaka na tikinivolatabu e veivosakitaki tiko. Au sega sara tu ga ni kila na vanua era tiko kina na tikinivolatabu, ia era vukei au na iVakadinadina i Jiova qai vakavulici au tale ga.

 Au sa qai taleitaka tiko ga vakalevu na veika era vakavulica na iVakadinadina i Jiova niu soqoni wasoma. E dau vakayaloqaqataki qai levu na ka au vulica. Sa qai sureti au e dua meu vulica na iVolatabu.

 E duidui sara ga na ka au raica vei ira na iVakadinadina i Jiova ni vakatauvatani kei na noqu lotu. Au raica na duavata, qai vu mai lomadra nodra via vakamarautaka na Kalou. Au vakadinadinataka nira o ira duadua ga era vakaraitaka na veilomani dina na kedra ivakatakilakila na lotu vaKarisito.—Joni 13:35.

 Na levu ga ni noqu vulica na iVolatabu, na levu tale ga ni veiveisau au cakava me salavata kei na ivakatagedegede vakaivolatabu. Ia au nanuma niu na sega ni rawa ni biuta na karate. Au dau taleitaka na tereni kei na veisisivi. Niu tukuna qori vua na iVakadinadina i Jiova e vakavulici au tiko ena iVolatabu, e tukuna ga vei au vakayalovinaka, “Vuli tiko ga, au kila ni na donu na nomu vakatulewa.” E vakayaloqaqataki au sara ga na vosa qori. Na levu ga ni noqu vuli, na levu tale ga ni noqu via vakamarautaka na Kalou o Jiova.

 Ia a yaco e dua na ituvaki e vakavuna kina meu biuta na karate. Qori noqu caqeta vakacalaka na ucui koya keirau karate vata tiko, me vaka au sa vakamacalataka oti mai. E vakavuna sara ga meu vakasama vakabibi. Au vakasamataka: ‘Vakacava au na rawa ni dua na imuri i Karisito meu uqeta na veiyaloni keu karate tiko ga.’ Au vulica na ka sa parofisaitaki tu ena Aisea 2:3, 4 nira na sega ni “vulica tale na ivalu” o ira na talairawarawa ena ivakaro i Jiova. E vakavulica tale ga o Jisu me kua na ivalavala voravora, ke vakaduiduitaka mada ga e dua. (Maciu 26:52) Qori na ka e vakavuna meu biuta tani kina na qito au dau taleitaka tu.

 Oti qori, au muria tale ga na ka e tukuna na iVolatabu oya meu ‘vakarautaki au vinaka meu qarava na Kalou ena yalodina.’ (1Timoci 4:7) Na gauna au dau vakayagataka tu ena karate, au sa vakayagataka ena noqu qaravi Jiova meu toro voleka kina vua. E cata o noqu itau na veika au sa mai vulica ena iVolatabu, keirau mani veitalatala. Ena ika24 ni Janueri, 1987 au papitaiso meu dua na iVakadinadina i Jiova. Oti qori, au veiqaravi sara vakatabakidua, qori meu vakayagataka e levu na noqu gauna meu vakavulica kina na ka dina vei ira eso tale. Me yacova mai nikua, au se veiqaravi tiko ga vakatabakidua. Au bau lai veiqaravi tale tu ga ena itikotiko liu ni iVakadinadina i Jiova e Niu Yoka, Merika ena dua na gauna.

 Niu sa mai kila qo na ka dina me baleta na Kalou, au sa qai kila qo na sala meu marau kina. Au vakila na lomavakacegu. Sa qai vakainaki na noqu bula, sa tiko na noqu inuinui, au vakila tale ga na marau dina. Au se dau taleitaka tiko ga na vakaukauayago, ia au sa sega ni dau vakabibitaka sara vakalevu. Sa bibi duadua ga vei au na noqu qaravi Jiova.

 Niu se dau karate, au dau yadrava na ituvaki ena rawa niu vakaleqai kina, niu nanuma ni dua ena rawa ni vacuki au. Ia qo au se yadrayadravaki tiko ga, niu kauaitaki ira na lewenivanua qai tu vakarau ni vukei ira. E vukei au na iVolatabu meu dausolika, meu dua na tagane vakawati vinaka vua na noqu daulomani o Brenda.

 Au dau taleitaka tu na karate. Ia au sa sosomitaka qori ena dua na ka e uasivi sara. E kaya na iVolatabu: “Ni yaga vakalailai ga na vakaukaua yago, ia na noda qarava na Kalou e yaga ena ka kece, ni na vakalougatataki kina noda bula ena gauna qo kei na noda bula ena gauna mai muri.”—1 Timoci 4:8.