E iVakadinadina i Jiova o Virginia, qai tauvi koya tiko e dua na mate (locked-in syndrome) e vakavuna me paralasi kece na yagona. Ia e rawa ni rai, rogo, yavalata na matana se yavalata vakalailai na uluna. E sega ga ni rawa ni vosa se kana. Dua na gauna e bulabula vinaka tu qai kaukaua. Ia ena dua na mataka lailai ni 1997, e mosi kaukaua na uluna. E kauti koya e valenibula o watina, ena siga tiko ga ya sa sega ni vakilai koya. Oti e rua na macawa sa qai yadra mai, qo sa tu ena vanua era qaravi kina na tauvimate bibi. Sa paralasi qai coba tu vua na misini ni cegu. Oti e vica na siga e sega ni nanuma rawa e dua na ka, se na ka e baleti koya.

 Qo na ka e kaya, “Au sa qai vakilai yaloqu tale. Au masu vagumatua, niu sega ni vinakata meu mate me qai biu tu mai o luvequ tagane lailai. Me rawa niu yaloqaqa, au saga meu vakasamataka e levu na tikinivolatabu.

 “Ratou kaya sara na vuniwai meu tokitaki mai na vanua au qaravi tu kina. Oti e ono na vula niu curu tu ena vica na valenibula kei na vanua era qaravi kina na paralasi, au sa lesu i vale. Au se paralasi tu, qai vinakati meu vukei ena ka kece. Dua na ka noqu yalolailai! Au nanuma ni sega na kequ yaga vei ira eso tale, vaka kina vei Jiova. Au lomaleqataki luvequ tale ga.

 “Au sa qai wilika na kedra italanoa eso na tacida era sotava tale ga na ituvaki va qo. Au kurabuitaka na ka era rawata ena nodra qaravi Jiova. Au saga tiko ga me donu noqu rai qai kua ni vakasamataka na veika au sega ni rawata. Ni bera niu tauvimate e sega ni levu na gauna au vakayagataka ena noqu veika vakayalo. Ia qo au sa rawa ni cakava qori e veisiga. Au vorata na noqu yalolailai, au vakabibitaka tale ga na noqu qaravi Jiova.

 “Au vulica meu vakayagataka na kompiuta. Au vakayagataka e dua na porokaramu meu taipa kina ena gauna au yavalata kina na uluqu. E veivakaocai toka, ia au vulica rawa kina na iVolatabu qai vunautaka na itukutuku vinaka vei ira eso tale ena imeli se vola ivola. Me rawa niu veivosaki kei ira eso tale, au na vakayagataka e dua na kad e tabaki tu kina na matanivola. O koya keirau veivosaki tiko ena dusia yadua na matanivola, ke cala au na dolava vakalevu na mataqu, ke donu au na bobo. Keirau na cakava tiko qori me yacova ni sa kila na ka au via tukuna tiko. Era sa matai sara kina eso na tacida yalewa era dau vukei au vakalevu. E totolo nodra kila na veika au via tukuna tiko. Eso na gauna ke cala na vosa, keimami na veidredrevaki ga.

 “Au taleitaka na vakaitavi ena veika e tuvanaki ena ivavakoso. Au dau sema ena soqoni niu vakayagataka na Internet. Au na taipataka noqu saunitaro, ena qai wilika e dua ena gauna e tarogi kina. Au dau sema tale ga ina dua na iwasewase lailai me keimami sarava vata JW Broadcasting e veivula. a

 “Qo sa 23 na yabaki noqu sa paralasi tu. Au dau yalolailai ena so na gauna. Ia au vosota rawa qori ena noqu dau masu, veimaliwai kei ira na mataveitacini, kei na noqu saga meu kaukaua tiko ga vakayalo. Nodra veivuke tale ga na ivavakoso au painia veivuke rawa kina me sivia e ono na yabaki. Au dau saga meu vakaraitaki vinaka tiko ga vei luvequ o Alessandro, sa vakawati e qase tale ga ni ivavakoso. Rau painia tudei tiko vakaveiwatini.

 “Au dau raitayaloyalotaka na veika au na cakava ena vuravura parataisi. Na imatai ni ka au na cakava, oya meu talanoataka na veika me baleti Jiova. Au na via taubale ena yasa ni uciwai ena lomanivanua, qai marautaka na totoka ni veibuca. Sa oti qo e 20 na yabaki noqu vakani tu ena tube. Au sa waraka tu ga qo na gauna meu na betia kina na apolo qai kania. Me vaka niu kai Itali, au na via kania na kequ kakana taleitaki vakaItali wili kina na pizza!

 “E vukei au ‘na inuinui ni bula’ me donu tiko ga na noqu rai. (1 Cesalonaika 5:8) Noqu raitayaloyalotaka na vuravura vou, qori e vakamarautaki au vakalevu. Au nuidei tale ga niu sa vakarau vakabulai. Au rai vakanamata tu meu na marautaka na ‘bula dina,’ e yalataka o Jiova ni vakayagataka na nona Matanitu.”—1 Timoci 6:19; Maciu 6:9, 10.