Na matavosa “Kai Samaria Dauloloma” e vakaibalebaletaki vua e dua e tu vakarau ni vukei ira na vinakata na veivuke. Na vosa qori e kau mai ena dua na italanoa se vosa vakatautauvata e tukuna o Jisu. E vakavulici keda meda tu vakarau ni vukei ira eso tale se mani vanua cava era cavutu mai kina, se isususu.

Ena ulutaga qo

•  Cava na vosa vakatautauvata ni “Kai Samaria Dauloloma”?

•  Cava e tukuna kina o Jisu na vosa vakatautauvata qori?

•  Cava eda vulica kina?

•  O cei o ira na kai Samaria?

•  A yaco dina na italanoa ni “Kai Samaria Dauloloma”?

Qo e dua na ivakamacala lekaleka me baleta na italanoa qori: E biuti Jerusalemi e dua na tagane e Jiu me gole i Jeriko. E qai sotavi ira na daubutako era mokulaki koya qai voleka sara ga ni mate.

E gole sara mai e dua na Jiu e bete, qai tarava mai e dua na iliuliu ni lotu Jiu. Ia ni rau raici koya, rau vakatikitiki rau gole sara. Dina ni rau Jiu, ia rau sega ni via vukei koya na wekadrau sa mavoa tu.

Mani gole sara mai e dua na kai Samaria, e sega ni Jiu. (Luke 10:33; 17:16-18) E tubu sara ga nona loloma ni raica ni sa mavoa tu na tagane qo. E vakasavasavataka nona mavoa, vadretitaka qai kauti koya sara ina dua na bure ni vulagi me lai qaravi kina. Na siga tarava e saumi koya sara na itaukei ni bure ni vulagi me qaravi koya. E tu vakarau tale ga me solia eso tale na ilavo me qaravi kina na tagane qo.—Luke 10:30-35.

A vosa tiko o Jisu vua e dua na turaga e nanuma nira kainona ga o ira na wekana, se o ira era lotu vata. E vakavulici koya gona o Jisu ena dua na lesoni bibi, ya me kua ni qiqo nona rai. Ia me okati ira eso tale mera kainona, sega ni o ira ga na Jiu. (Luke 10:36, 37) E volai ena iVolatabu na italanoa qo me yaga vei ira kece na via vakamarautaka na Kalou.—2 Timoci 3:16, 17.

Ena vakaraitaka e dua na loloma ena ka vinaka e cakava vei ira eso tale. Ena tu vakarau me vukea e dua e sotava na leqa, se mani vanua cava e cavutu mai kina, isususu se matatamata e lewena. Ena cakava vei ira eso tale na ka ga e vinakata me caka vua.—Maciu 7:12.

Era vakaitikotiko ena vualiku kei Jutia. Era kawa mai vei ira na Jiu, ra qai vakawati kei ira eso tale na matatamata.

Era tauyavutaka ga e dua nodra isoqosoqo lotu ena imatai ni senitiuri  G.V. Era vakabauta ga na imatai ni lima na ivola ena iVolatabu vakaIperiu, sega ni iVolatabu kece.

Levu na Jiu era bula ena gauna i Jisu era cati ira na kai Samaria, ra qai sega ni via veimaliwai kei ira. (Joni 4:9) Eso na Jiu era vakayagataka na vosa “kai Samaria” mera veivakacudrui kina.—Joni 8:48.

E sega ni tukuni ena iVolatabu ni yaco dina se sega na italanoa qori. Ia e dau vakayagataka qori o Jisu me vakavulica eso na itovo se yaca ni vanua era kila e levu. Me rawa ni vakamatatataka vei ira na lesoni e via vakabibitaka.

E donu vinaka na vanua e cavuti ena italanoa qo, kei na ka e tukuni kina. Kena ivakaraitaki:

• Na gaunisala mai Jerusalemi i Jeriko e rauta ni 12 na maile na kena balavu, qai sirova sobu e dua na baba e sivia e veimama na maile. E donu gona ni tukuni ena iVolatabu ni o ira na biubiu mai Jerusalemi era gole sobu i Jeriko.—Luke 10:30.

• O ira na Bete kei na Livai era tiko e Jeriko era dau muria wasoma na gaunisala qori mera gole i Jerusalemi.

• Dau lala tu na gaunisala qori ra qai vuni tu kina na daubutako, era dau waraki ira na gole duadua tu mera butakoci ira.