Na Cava na Matanitu ni Kalou?
Kena iSau Vakaivolatabu
Na Matanitu ni Kalou e dua dina na matanitu e tauyavutaka na Kalou o Jiova. Ena iVolatabu na “matanitu ni kalou” e vakatokai tale ga me “matanitu vakalomalagi,” ni veiliutaki mai lomalagi. (Marika 1:14, 15; Maciu 4:17) Ena uasivia sara na matanitu vakatamata na ivakarau ni veiliutaki.
Veiliutaki. Sa lesi Jisu Karisito na Kalou me Tui ni Matanitu qai solia vua na lewa e uasivia na veiliutaki vakatamata. (Maciu 28:18) E vakayagataka vinaka o Jisu na kaukaua e soli vua, sa vakadeitaka tale ga ni iLiuliu nuitaki qai dau yalololoma. (Maciu 4:23; Marika 1:40, 41; 6:31-34; Luke 7:11-17) Ena veidusimaki ni Kalou, sa digitaka oti o Jisu mai na veimatanitu o ira “mera lai veiliutaki vakatui, mera liutaka na vuravura” mai lomalagi.—Vakatakila 5:9, 10.
Kena Dede. E dau veiliutaki ga ena gauna lekaleka na matanitu vakatamata, ia na Matanitu ni Kalou ena sega sara ni vakarusai.—Taniela 2:44.
Lewena. O koya e cakava na loma ni Kalou ena vakarurugi ena Matanitu ni Kalou, se mani vanua cava e cavutu mai kina.—Cakacaka 10:34, 35.
Lawa. E sega ni vakatabuya wale ga na ivalavala ca na lawa (se ivakaro) ni Matanitu ni Kalou. E veisautaka sara ga nodra ivakarau ni bula na vakarurugi kina. Kena ivakaraitaki, e kaya na iVolatabu: “‘Mo lomani Jiova na nomu Kalou ena lomamu taucoko, ena nomu vinaka taucoko, kei na nomu vakasama taucoko.’ Qo na ivunau levu duadua, na kena imatai tale ga. E vaka kina na kena ikarua, ‘Mo lomana na kainomu me vaka nomu lomani iko.’” (Maciu 22:37-39) Na nodra lomana na Kalou kei na kainodra e uqeti ira kina mera dau veikauaitaki qai caka vinaka.
Vuli. E vakarautaka na Matanitu ni Kalou e dua na ivakatagedegede cecere mera muria o ira na vakarurugi kina, qai vakavulici ira ena sala mera rawata kina na ivakatagedegede qori.—Aisea 48:17, 18.
Ka ena Cakava. E sega ni vutuniyau na Matanitu ni Kalou ni vakayagataki ira na vakarurugi kina. Ena vakayacora ga na loma ni Kalou, okati kina nodra bula tawamudu ena vuravura parataisi o ira na lomani koya dina.—Aisea 35:1, 5, 6; Maciu 6:10; Vakatakila 21:1-4.
Rawa ni o Wilika Tale ga
ESSENTIAL BIBLE TEACHINGS
Na Cava na Matanitu ni Kalou?
Ena cakacaka vakaitalatala i Jisu, e dau vakabibitaka na Matanitu ni Kalou. Sa balavu nodra masulaka tiko na nona imuri me yaco mai na Matanitu qori.
NA VALE NI VAKATAWA
O Cei na Tui ni Matanitu ni Kalou?
Na Kalou e uqeti ira e levu na dauvola iVolatabu mera vola se o cei ena Tui ni Matanitu ni Kalou. E laurai ena ivolatukutuku ni kawatamata ni ganiti Jisu Karisito duadua ga na ivakamacala qori.
SAUMI NA TARO VAKAIVOLATABU
E Tiko e Lomada na Matanitu ni Kalou?
Na cava e vakaibalebaletaka na iVolatabu ni kaya, ni “tu e na lomamudou na Matanitu ni Kalou”?
SAUMI NA TARO VAKAIVOLATABU
Na Cava ena Cakava na Matanitu ni Kalou?
Dikeva na ka meda namaka ni sa veiliutaki na Matanitu ni Kalou e vuravura.
VAKAMACALATAKI NA TIKINIVOLATABU
iVakamacala ni Maciu 6:33—“Vakaliuca Tiko ga na Matanitu ni Kalou”
E vakaibalebaletaka o Jisu meda kua ni cakacakataka na ka meda bula kina?
BALETI KEIMAMI
Kerea mo Sikovi
Veivosakitaka na isau ni dua na nomu taro mai na iVolatabu, se mo vulica eso tale na ka me baleti ira na iVakadinadina i Jiova.