Na vosa taumada ni eli ena iVolatabu na “Seoli” kei na “Etesi.” Qori e dusia ga na ibulubulu ni kawatamata, e sega ni vanua ni veivakararawataki ena bukawaqa. Era na lako i eli na tamata vinaka kei na tamata ca. (Jope 14:13; Same 9:​17) E kaya na iVolatabu ni ibulubulu “na vale era na sota kece kina na bula.”​—⁠Jope 30:23.

 O Jisu mada ga a lako i eli ena gauna e mate kina. Ia a “sega ni tu ga e eli” ni a vakaturi koya na Kalou.​—⁠Cakacaka 2:​31, 32, The Bible in Basic English.

Vakacava ena tu ga me tawamudu o eli?

 O ira kece na lako i eli era na sega ni tu e kea me tawamudu. Ena vakaturi ira o Jisu ena kaukaua ni Kalou. (Joni 5:​28, 29; Cakacaka 24:15) Sa parofisaitaki rawa tu ena iVolatabu ni na yaco na veivakaturi qori ena gauna se bera mai. E kaya na Vakatakila 20:13: “O mate kei eli erau soli ira mai na mate tu kina.” (King James Version) Ena vakalalai o eli, ena sega gona ni tu me tawamudu. Sa na sega ni lako tale i kea e dua, ni “sa na sega tale na mate.”​—⁠Vakatakila 21:​3, 4; 20:14.

 Era na sega ni lako kece i eli o ira na mate. E tukuna na iVolatabu ni so na tamata sa vakawakana e lomadra na ca ra qai sega ni via veivutuni. (Iperiu 10:26, 27) Nira mate o ira qori, era sega ni lako i eli. Era lako ga i Qiena se ra na vakarusai tawamudu. (Maciu 5:​29, 30) Kena ivakaraitaki, e kaya o Jisu ni so na iliuliu ni lotu dauveivakaisini ena nona gauna era na lako i Qiena.​—⁠Maciu 23:27-​33.