E Kaya na iVolatabu ni Rabaraba na Vuravura?

SARAVA/ROGOCA

Kena isau vakaivolatabu

E sega ni kaya na iVolatabu ni rabaraba na vuravura, a e sega tale ga ni ivola vakasaenisi. Ia e volai tu kina na veika qai vakadinadinataki vakasaenisi. Na ka e kaya na iVolatabu e “nuitaki tu ga, ena gauna qo qai tawamudu.”—Same 111:8.

Na cava e vakaibalebaletaka na iVolatabu ni kaya “ena tutu i vuravura vava”?

Na matavosa “ena tutu i vuravura vava” kei na “iyalayala kei vuravura” e tukuni ena iVolatabu meda kua ni taura vakadodonu na kena ibalebale, se tukuni tiko ni sukuea na vuravura se tiko na kena iyala. (Aisea 11:12; Jope 37:3) Qori e vosa vakaibalebale tiko ga me baleta na vuravura taucoko. E vaka ga na kena vakayagataki ena iVolatabu na va na liga ni kabasi.—Luke 13:29.

Na vosa vakaIperiu “tutu” se “iyalayala,” e vosa vakaibalebale qai yavutaki mai na vosa “tabana.” E kaya na ivola The International Standard Bible Encyclopedia, “nira dau vakayagataka na tabadra na manumanuvuka mera ovici ira kina na luvedra, [na vosa vakaIperiu gona qo] e tiko kina na vakasama ni dua na ka e tevuki qai tiko na kena iyala.” Na ivola vata ga qori e tukuna ni “ibalebale ni vosa qori” ena Jope 37:3 kei na Aisea 11:12, “na iyalayala, veiyala se raba ni vanua e vuravura.” b

Vakacava na nona temaki Jisu na Tevoro?

Me temaki Jisu “e kauti koya tale na Tevoro ina dua na ulunivanua cecere sara, qai vakaraitaka vua na matanitu kece e vuravura kei na kedra lagilagi.” (Maciu 4:8) Era kaya eso ni vakavulici ena tikinivolatabu qori ni rabaraba noda vuravura. Ia na “ulunivanua cecere” e cavuti kina e sega ni dusia tiko e dua na vanua dina. Dikeva mada qo e vica na tikina e vakadinadinataki kina qori.

E sega ni dua na ulunivanua e rawa ni laurai kina na veimatanitu kece e vuravura.
E sega ni vakaraitaka ga na Tevoro vei Jisu na matanitu kece, ia na “kedra lagilagi” tale ga. Na veika qori e sega ni rawa ni laurai mai na dua na vanua yawa, kena irairai ni vakayagataka na Tevoro eso na mataqali raivotu me vakaraitaka kina vei Jisu na veika qori. E via vaka ga na nona sarava e dua na itaba se iyaloyalo mai na veiyasa i vuravura.
E tautauvata na tikinivolatabu qori kei na Luke 4:5 ni vakaraitaka na Tevoro vei Jisu “ena dua ga na gauna na matanitu kece e vuravura.” E matata kina ni vakayagataka na Tevoro na raivotu me raica kina o Jisu na veika qori.

a E tukuni ena iVolatabu ni “tiko mai cake” na Kalou “e toka e ra na vuravura mokimokiti.” (Aisea 40:22) Ena so na vakadidike e tukuni kina ni vosa “mokimokiti” e rawa ni kena ibalebale na ka e “moqili.” Ia era sega ni duavata kece kina e levu na vuku. Se mani cava e dikevi, e sega ga ni tokona na iVolatabu na kena tukuni ni rabaraba na vuravura.

b Revised Edition, Volume 2, tabana e 4.