O ira kece era sa tovolea ena dua na gauna mera mokuta na lago, era kila ni dua toka na ka dredre ya. Levu na gauna eda rawa ni tobo cagi ni vaka na tibi ni liva na totolo ni nodra vuka.

 Era vakadikeva na saenitisi e dua na mataqali lago e vakatokai na fruit fly (nana). Era raica ni totolo ga nona vuki me vaka na waqavuka ni vala, qai sega mada ga ni yacova e dua na sekodi. E kaya o Parofesa Michael Dickinson nira se qai sucu ga sa nodra mesamesa na vuka. E vaka ga ni kau e dua na gone sucuvou me lai vukataka na waqavuka ni vala qai kila vinaka na ka me cakava.

 Era cakava na dauvakadidike e dua na vidio ni nona vuka na nana. Era raica ni cakurobaroba vaka200 na tabana ena dua na sekodi. Ia ke cakurobaroba mada ga vakadua, e se veirauti ga na kaukaua e toka vua me dro kina ni kidava na leqa.

 Vakacava na totolo ni nona yavala ena gauna va qori? Era kaya na dauvakadidike ni vakalimasagavulutaki na totolo ni nana ni vakatauvatani kei na sauriva ni mata. E kaya o Dickinson: “E vereverea na ka e rawa ni cakacakataka na mona ni nana ena loma ga ni dua na gauna lekaleka. E kila rawa e keri na vanua e tiko kina na leqa, kei na ka me cakava me dro bula kina.”

 Era se vaqaqa tiko ga na dauvakadidike se rawa ni cakacakataka vakacava na ka vereverea, ni ka lailai toka ga nona mona.

 Cava o nanuma? E vu mai na bula vakaidewadewa na totolo kei na vakasakiti ni nona vuka na nana, se sa buli vata mai?