Dua na gauna balavu nodra qoroya na saenitisi na weli e dau kaburaka na boila. Cava na vuna? Vei ira kece na veika bula, na weli ni boila e “ka malumu duadua qai wadrega.”

 Vakasamataka mada: Na boila e vaka na irairai ni duna, qai bula tu ena botonisauloa. Ke dua na ika e via kani koya, ena kaburaka mai na ka weliwelia. Na ka e kaburaka qori e tu kina na protein e vaka na luka qai vicavata tu na udolu na wa balabalavu. Ni veiwaki vata qori kei na waitui, ena vakavuna me weliwelia na vanua e qalova tiko na boila. Na ka weliwelia qori ena tao tu ena se ni ika, ena vakavuna me luaraka tani na boila qai dro.

 E vakasakiti na ka e tiko ena weli ni boila. Na vuna? Na somidi ni wa balabalavu e tiko ena nona weli e via vakaduanadrautaki me qai rauta na drauniuluda, ia e kaukaua cake sara mai na wa ni culacula. Ni kaburaki e waitui na wa balabalavu qori ena waki vata kei na luka, me bulia kina e dua na ka e vaka tu na vulo. Na levu ni wai e rawa ni maroroya na vulo qori e vaka26,000 taki mai na kena bi. Kena ibalebale, e dua na iwase levu ni weli ni boila e tu kina na wai!

 Era sega ni rawa vakadua ni vakatotomuria voleka na saenitisi na weli ni boila. E kaya e dua na daunivakadidike: “Sa rui vereverea dina na kena ibulibuli.” Ia era via bulia na saenitisi na wa e tiko ena weli ni boila nira vakayagataka na manumanu somidi na bacteria. Era vinakata mera bulia kina e dua na iyaya e mamada, e sega ni rawa ni kabasu, e wadrega, qai vuca rawarawa. E rawa ni vakayagataki qori me buli kina e dua na mataqali isulu wadrega kei na veiqaravi vakavuniwai. E levu sara na sala ena rawa ni yaga kina na weli era bulia na tamata.

 Cava o nanuma? E bula vakaidewadewa na weli ni boila se buli?