E dau vakadomobula eso na nius kei na kena iyaloyalo e vakaraitaki nikua ena tivi, talevoni, ena tablet kei na kompiuta.

 Era dau sarava qori na gone.

 O na vukei ira vakacava gona na luvemu mera kua ni taqayataka na nius vakadomobula?

•  E dau tarai ira vakacava na gone na nius?

•  O na vukei ira vakacava na luvemu mera kua ni lomaleqataka na nius?

•  Vakacava ke raica o luvemu e dua na ituvaki vakadomobula?

•   Era dau rarawataka e levu na gone na veika vakadomobula era raica ena nius. Eso na gone era na sega ni tukuna na lomadra, ia ena rawa ni vakararawataki ira vakalevu na nius vakadomobula. a Ke ra qai rere tale vakalialia na itubutubu, ena qai kuria ga qori na nodra lomaleqa.

•   Era na taura cala na gone na ka era sarava ena nius. Kena ivakaraitaki, era na nanuma eso na gone ni na rawa ni vakaleqai tale ga na nodra vuvale. Era na nanuma tale ga na gone era dau sara nius vakadomobula ni ituvaki qori ena yaco tiko ga.

•   Ena dredre vei ira na gone mera kila ni vakatubutaki eso na nius. Era na rairai sega ni kila na gone nira vaqara tubu tiko na kabani ni nius, ra qai vinakata me levu me rogoci ira. Era na vakatubutaka gona na veika era kaburaka me rawa nira sarasara e levu.

•   Yalana na nodra sarava na nius vakadomobula. Sega ni kena ibalebale qori mera sa kua ni kila na ka e yaco tiko e veiyasa i vuravura. Ia ena rawa ni vakaleqai ira tale ke ra sa vuki sarava tiko ga na nius vakadomobula.

   “So na gauna eda dau veitalanoataka tu eso na nius vakadomobula, ia eda sega ni kila ni na rawa ni tarai ira na luveda era vakarogoci keda tiko.”—Maria.

   iVakavuvuli vakaivolatabu: “E icolacola bibi na lomaleqa.”—Vosa Vakaibalebale 12:25, Contemporary English Version.

•   Dau vakarorogo vinaka, qai biuti iko ena kena ituvaki ni o vosa vua. Ke dredre ni tukuna vei iko o luvemu na lomana, kerei koya me droinitaka. Ni sa cakava qori, vosa vakayalovinaka vua me rawarawa tale ga nomu ivakamacala. Ia kua ga ni o tukuna tale vua eso na ka me baleta na nius.

   “E seavu na nona lomaleqa o luvequ yalewa ni oti na neitou veitalanoa. Keirau vakarogoci koya vinaka. Ena qai kuria ga nona lomaleqa ke tukuni vua, ‘Sa na va tu ga qori na ituvaki, mo ciqoma ga.’”—Sarahi.

   iVakavuvuli vakaivolatabu: “Me berabera ni vosa, me berabera ni cudru.”—Jemesa 1:19.

•   Vukei luvemu me kua ni vakacalai totolo ena ka e sarava ena nius. Kena ivakaraitaki, ni vakatubutaki na italanoa ni nona vesu e dua, era lai nanuma kina eso ni dau yaco vakalevu qori. Vakamacalataka vei ratou na luvemu na ka o sa cakava tiko me ratou taqomaki tiko ga kina. Mo qai tukuna tale ga vua ni dau tabaki na nius na ka e dau vakavudua na kena yaco.

   “Vukei ratou na luvemu me ratou lomadei. Erau veisemati vakalevu na ka eda vakasamataka kei na ivakarau ni lomada. Ke da dau vukei ira na luveda mera vakasamataka ga na veika vinaka, era na sega ni lomaleqa.”—Lourdes.

   iVakavuvuli vakaivolatabu: “Na loma ni tamata vuku e yalomatua kina na gusuna qai kuria na veirawai ni ka e tukuna.”—Vosa Vakaibalebale 16:23.