YADRA TIKO!

iSenivalu—Vica Vata na Milioni Era Dro Laivi Mai Ukraine

SARAVA/ROGOCA

Ena ika24 ni Feperueri 2022, e valuti Ukraine na matanitu o Rusia. E vakavuna me ririkotaki na nodra bula e vica vata na milioni na lewenivanua, ra qai saga mera dro ena dua tale na vanua. a

“E vakacabotetaki e levu na bomu. Na kena rerevaki au sega ni kila meu tukuna vacava. E vakarautaki e dua na sitima vei ira na via dro, keitou nanuma me keitou vodo kina. Keitou biuta tu mai na ka kece keitou taukena, qai kauta ga na neitou dui beki ni dro. E tawa ga kina eso na ivola, wainimate, wai kei na so na kakana mamada. Keitou biubiu i vale qai lai vodo ena sitima ena gauna sara ga e vakacabotetaki tiko kina na bomu.”—Nataliia, mai Kharkiv e Ukraine.

“Keimami sega sara ga ni vakabauta ni na tini ena veivaluvaluti. Au rogoca na kacabote ni bomu ena so na siti, qai yavavala na katubaleka. Au mani nanuma meu dro qai kauta ga na ka e bibi duadua. Au biubiu e noqu vale ena 8 na kaloko ena mataka, au lai vodo ena sitima e lako i Lviv, oti au qai vodo basi sara i Poladi.”—Nadija, mai Kharkiv e Ukraine.

Ena ulutaga qo

Cava e vakavuna mera dro na lewenivanua?

E yaco qori nira valuti Ukraine na mataivalu e Rusia. Ia na iVolatabu e vakamacalataka na vu dina ni leqa kece qori:

E sega ni vakarautaka na matanitu vakatamata na ka era gadreva na lewenivanua. O ira na veiliutaki era vakayagataka nodra lewa mera veivakalolomataki qai veivakasaurarataki.—Dauvunau 4:1; 8:9.
O Setani na Tevoro “na turaga ni vuravura qo,” e veivakamuai cala tiko. E kaya na iVolatabu: “E lewa tiko na Vunica na vuravura taucoko.”—Joni 14:30; 1 Joni 5:19.
Me ikuri ni leqa eda sotava tu me vica vata na drau na yabaki, e kaya na iVolatabu nida sa bula tu qo ‘ena iotioti ni veisiga, na vakilai kina e levu na ka dredre.’ (2 Timoci 3:1) Kena ikuri, ena yaco e levu na ivalu, leqa tubukoso, leqa ni kakana kei na matedewa. Qori e vakavuna mera dro eso ina dua tale na vanua.—Luke 21:10, 11.

Era na kunea i vei na inuinui?

E kaya na iVolatabu ni Dauveibuli na Kalou o Jiova, b e lomani ira qai kauaitaki ira na isenivalu, kei ira na dro ena dua tale na vanua. (Vakarua 10:18) E yalataka ni na vakaotia na nodra leqa ni vakayagataka na nona matanitu vakalomalagi, e vakatokai na Matanitu ni Kalou. Ena sosomitaka na veiliutaki vakatamata. (Taniela 2:44; Maciu 6:10) Ena vakayagataka o Jiova na nona Matanitu me vakarusai Setani na Tevoro. (Roma 16:20) Na Matanitu qori ena liutaka na vuravura taucoko, qai vakaotia nodra veisei na veimatanitu. Era na duavata na kawatamata e vuravura taucoko me vaka ga e dua na vuvale. Ena sega tale ni dua ena biuta nona vale me dro ina dua tale na vanua, ni yalataka na iVolatabu: “Era na dui dabe ena ruku ni nodra vaini kei na ruku ni nodra vunilolo, ena sega ni dua me vakarerei ira, ni tukuna na gusu i Jiova ni lewe vuqa.”—Maika 4:4.

Na Matanitu ni Kalou duadua ga ena vakarautaka na inuinui vei ira na isenivalu. O Jiova ena vakayagataka nona Matanitu me vakaotia na ka e vakavuna nodra dro na lewenivanua. Dikeva mada qo eso kena vakaraitaki:

iValu. “[O Jiova] ena mai vakaotia . . . na ivalu.” (Same 46:9) Mo kila na sala ena vakaotia kina na Kalou na veicati, wilika na ulutaga “Ena Sautu Vakacava na Vuravura?”
Veivakasaurarataki kei na itovo kaukaua. “[O Jiova] ena vakabulai ira mai na veivakasaurarataki kei na ivalavala kaukaua.” (Same 72:14) Mo kila na sala era veisautaka kina eso na rai cala e tu vei ira, wilika na ulutaga “Sala ena Oti Kina na Veicati.”
Dravudravua. “[O Jiova] na vakabula . . . na dravudravua e tagi ni kere veivuke.” (Same 72:12) Mo kila na sala ena vakaotia kina na Kalou na ka e vakavuna na dravudravua, wilika na ulutaga “Ena Oti na Veivakaduiduitaki ena Veika Vakailavo?”
Leqa ni kakana. “Ena levu na covuata e vuravura.” (Same 72:16) Mo kila na sala ena vakarautaka kina na Kalou e levu na kakana, wilika na ulutaga vakavalagi “A World Without Hunger?”

Vakacava ena rawa ni vakacegui ira na iVolatabu?

Io. Na iVolatabu e yalataka vei ira na isenivalu na inuinui totoka e se bera mai, ena vukei ira tale ga mera vosota na veika dredre era sotava tiko qo.

iVakavuvuli vakaivolatabu: “Na tamata yalowai e vakabauta na vosa kece, ia o koya e yalomatua e vakasamataka na nona ilakolako kece.”—Vosa Vakaibalebale 14:15.

Kena ibalebale: Vakasamataka na veika rerevaki e rawa ni yaco, kei na ka mo cakava mo taqomaki iko kina. Qarauni ira na daubasulawa ena vanua o dro kina. Era na rawa ni vakasaurarataki iko nira kila ni o vulagi, o na sega ni rawa tale ga ni taqomaki iko.

iVakavuvuli vakaivolatabu: “Ke sa tiko na kakana, na isulu, meda lomavakacegu ena veika qo.”—1 Timoci 6:8.

Kena ibalebale: Kua ni vakasamataka vakalevu na iyau. O na marau ke o lomavakacegu ena ka sa tiko rawa vei iko.

iVakavuvuli vakaivolatabu: “Na ka kece dou vinakata mera cakava vei kemudou na tamata, dou cakava tale ga vei ira.”—Maciu 7:12.

Kena ibalebale: Mo yalovosovoso qai dauveinanumi. Na itovo qori ena vakarawarawataka mo ciqomi qai dokai ena vanua vou o tiko kina.

iVakavuvuli vakaivolatabu: “Kua ni sauma na ca e caka vei kemuni.”—Roma 12:17.

Kena ibalebale: Ke o vakalolomataki, kua ni vakalaiva nomu cudru mo sauma kina na ca. Qori ena vakalevutaka ga na leqa.

iVakavuvuli vakaivolatabu: “Au rawata na ka kece ena vuku i koya e vakaukauataki au.”—Filipai 4:13.

Kena ibalebale: Me bibi duadua vei iko nomu qarava na Kalou, mo masuti koya tale ga. Ena rawa ni vakaukauataki iko mo vosota.

iVakavuvuli vakaivolatabu: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka, ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece.”—Filipai 4:6, 7.

Kena ibalebale: Se mani ituvaki cava o sotava, kerea vua na Kalou me vakaceguya na lomamu kei na nomu vakasama. Raica na ulutaga, “Filipai 4:6,7—‘Moni Kua ni Lomaocaocataka e Dua na Ka.’”

a Oti e dua na siga na kena yaco qori, e vakamacalataka na isoqosoqo e dau raici ira na isenivalu na United Nations High Commissioner for Refugees (UNHCR), ni qo e dua na ituvaki vakadomobula me bau yaco. Ena loma ga ni 12 na siga e sivia na rua na milioni na lewenivanua e Ukraine era dro ina veimatanitu voleka. Qai rauta ni dua na milioni era tokitaki ena veivanua e Ukraine.

b Na yaca ni Kalou o Jiova. (Same 83:18) Raica na ulutaga, “O Cei o Jiova?”