Au sucu ena 1941 e Virrat, mai Finiladi. Erau didivara tale ga na noqu itubutubu, o rau na taciqu, kei na levu na wekaqu. Keimami veivosaki ga vagalu.

 Au vuli ena koronivuli curu i bure, e rauta ni 240 na kilomita na kena yawa mai vale, qai vakatabui kina na vosa vagalu. Gauna ya, na koronivuli era vuli kina na didivara era na vakasaurarataki mera vulica na vosa, mera wilika tale ga na tebenigusu. Ke raica gona o qasenivuli ni keimami vosa vagalu, ena mokuti keimami ena rula se kau. Eso na gauna ena vuce tu na ligai keimami me vica vata na siga.

 Oti noqu vuli ena sekeneri, au lai vuli ena koronivuli ni dauteitei. Au via vulica qori baleta ni keitou vakaiteitei. Dua na siga niu lesu i vale, au raica ni tu e dela ni teveli na Watchtower kei na Awake! E kaya sara vei au o Ta ni vakamacalataki kina na veika totoka ena iVolatabu. Rau sa vulica tiko kei Na na iVolatabu vei rau na veiwatini iVakadinadina i Jiova. Erau sega ni didivara na veiwatini qori, rau dau vakayagataka gona na peni kei na pepa me ratou veivosaki kina.

 E kaya vei au o tamaqu ni Matanitu ni Kalou ena vukica na vuravura me dua na parataisi totoka, era na vakaturi tale ga na mate. Ia au vakavulici nira na gole i lomalagi o ira na mate. Au nanuma de taura cala o Ta na ka rau tukuna na veiwatini, baleta ni ratou sega ni veivosaki vagalu.

 Dua na siga ni rau gole mai na veiwatini, au tarogi rau sara ena ka e tukuna vei au o Ta. Rau mani kaya: “E dina o koya.” Rau vakaraitaka vei au na ka e tukuna o Jisu ena Joni 5:28, 29 me baleta na veivakaturi. Rau vakamacalataka tale ga na sala ena vakasavasavataka kina na Kalou na vuravura ca qo, ra qai bula tawamudu kina na lewenivanua, era na bulabula vinaka ra vakila tale ga na vakacegu.—Same 37:10, 11; Taniela 2:44; Vakatakila 21:1-4.

 Au via kila e levu tale na ka, au mani vuli iVolatabu kei Antero e iVakadinadina i Jiova, ia e sega ni didivara. E sega ni kila o koya na vosa vagalu, ni keirau dau vuli au na vola noqu isaunitaro ena dua na pepa. Oti ena wilika qai vola kina eso tale nona taro se ivakamacala. Dua na ka nona vosovoso o Antero me vakayagataka na iwalewale qori me rua na aua e veimacawa.

 Ena 1960, au gole ena dua na soqo ni iVakadinadina i Jiova e caka tale ga ena vosa vagalu. Ena yakavi ni Vakaraubuka e kacivaki ni na caka na papitaiso ena mataka ni Vakarauwai. Niu qai gole ena siga qori, au sa kauta tiko na noqu tawelu kei na isulu ni papitaiso. Au mani papitaiso sara! a Sega ni dede, rau papitaiso na noqu itubutubu kei rau na taciqu.

 Au vinakata sara ga meu wasea vei ira eso tale na didivara na ka au sa vulica. Ena veiganiti gona meu vunau vei ira ena vosa vagalu. Au tekivu vunau sara ena tauni keitou tiko kina.

 Oti au toki e Tampere, e dua na siti osooso. Au vunau e veivale meu vaqarai ira na didivara, au tarogi ira tale ga na itaukeinivale ke ra kila eso na didivara era tiko ena yalava. Qori sara ga na sala au kunei ira kina eso noqu vuli iVolatabu. Oti ga e vica na yabaki, sa sivia ni le tini na dautukutuku e Tampere.

 Ena 1965, au sotavi Maire e dua na tacida totoka. Ena yabaki tarava ga keirau vakamau. E totolo nona kila na vosa vagalu. Ena loma ni 50 na yabaki neirau qaravi Jiova vata mai, dua na ka nona dau cakacaka qai itokani yalodina.

 Oti e rua na yabaki neirau vakamau, e sucu na luvei keirau tagane o Marko, e sega ni didivara. E vulica ga i vale na vosa vakaFiniladi, kei na vosa vagalu ni Finiladi. E papitaiso ni yabaki 13.

 Toso na gauna, e levu ra sa mai lewena na iwasewase lailai vosa vagalu e Tampere. Keitou mani toki ena siti o Turku ena 1974, ni sega ni dua na tacida didivara tu e kea. Keitou vaqarai ira tale na didivara e veivale. Ena loma ni gauna qori, e le 12 noqu vuli iVolatabu era sa papitaiso.

 Ena 1987, a sureti o Marko me veiqaravi e Peceli. Sa toso sara na iwasewase lailai vosa vagalu e Turku, keirau mani tuvanaka vakaveiwatini me keirau veiqaravi ena dua tale na vanua.

 Ena gauna vata qori, sa rawa na cakacaka vakavunau ena Tokalau kei Urope. Koya gona ena Janueri 1992, au gole kei na dua na tacida tagane didivara i Tallinn, e Estonia.

 Keirau veitaratara kei na dua na tacida yalewa e didivara o ganena. Dina ni sega ni kauai ena itukutuku vinaka, ia e vukei keirau ena nodra vaqarai e levu na didivara e Estonia. Ena iotioti ni neirau bogi i kea, e kauti keirau ina dua na nodra bose na vosa vagalu (Estonian Association of the Deaf), e Tallinn. Keirau yaco totolo yani, keirau tuvana sara ina teveli na mekesini kei na ivola vakaivolatabu ena vosa vakaEstonia, kei na vosa vakaRusia. Keirau solia e rauta ni 100 na ivola, 200 na mekesini, e soli tale ga mai vei keirau e rauta ni 70 na yaca ni itikotiko (address). Na bose tale ga ya e tauyavu kina na vunau ena vosa vagalu e Estonia!

 Sega ni dede, sa wasoma neirau dau lai vunau kei Maire e Estonia. Keirau vakalailaitaka neirau gauna ni cakacaka, keirau painia tudei sara. Ena 1995, keirau toki voleka i Helsinki me rawarawa neirau vodo waqa i Tallinn. Keirau sega sara ga ni tadra ni na vuavuaivinaka na cakacaka vakavunau e Estonia!

 Dua na ka na levu ni neirau vuli iVolatabu. E le 16 era toso ra lai papitaiso sara, wili kina e rua na veitacini rau mataboko qai didivara. Ni keitou dau vuli, au na vakadewa vei rau ena vosa vagalu niu vakayagataka na ligadrau.

 E sega ni rawarawa na caka vuli iVolatabu vei ira na didivara. Ni gauna ya, se sega kina na ivola vakaivolatabu ena vosa vagalu. Au sa qai dau maroroya tu ena dua na ivola e levu na itaba mai na noda ivola me rawa niu vakayagataka.

 E kerei au na valenivolavola ni tabana e Finiladi meu gole e Latvia kei Lithuania, meu lai raica na sala e rawa nira vukei kina na vosa vagalu ena veivanua ena Baltic. Keirau sikova wasoma vakaveiwatini na veivanua qori, qai vukei ira na tacida ena nodra vaqarai na didivara. E voleka ni veivanua kece qori sa tu nodra vosa vagalu. Au mani vulica na vosa vagalu vakaEstonia, vakaLatvia, kei na vakaLithuania. Au kila tale ga vakalailai na vosa vagalu vakaRusia nira dau vakayagataka na kai Rusia era didivara era tiko ena veivanua qori.

 Ka ni rarawa ni oti e walu na yabaki neirau veiqaravi e Estonia kei na veivanua ena Baltic, keirau cegu ni sa tauvi Maire na mate ni nave na Parkinson.

 Ena 1997, e tauyavu na vakadewa ni vosa vagalu ena valenivolavola ni tabana e Finiladi. Me vaka ni keirau toka voleka kina, keirau mani veivuke ena vakarautaki ni ivola vakaivolatabu ena vosa vagalu, au se cakava tiko ga qori me yacova mai qo. Keitou sa mai cakacaka vata kei na luvei keirau o Marko. Toso na gauna e veivuke tale ga o Marko kei na watina o Kirsi ena nodra vakavulici na timi ni vakadewa ena vosa vagalu ena so tale na vanua.

 E tuvanaka tale ga na valenivolavola ni tabana eso na vuli vosa vagalu me baleti ira na tacida era sega ni didivara. E yaga dina na vuli qori, ni levu era mai lewena kina na ivavakoso kei na iwasewase lailai vosa vagalu. Era tokona na cakacaka vakavunau, na soqoni, ra vakaitavi tale ga ena ivavakoso.

 Ena 2004, keirau veivuke kei Maire ena kena tauyavu na imatai ni ivavakoso vosa vagalu vakaFiniladi, e Helsinki. Ena loma ni tolu na yabaki, e toso na ivavakoso qori qai dua na ka nodra gugumatua na painia.

 Oti keirau tuvanaka tale me keirau veiqaravi ena vanua e vinakati vakalevu kina na veivuke. Ena 2008, keirau toki voleka i Tampere, qai lai veitomani tale ina iwasewase lailai vosa vagalu keirau a lewena tu ena 34 na yabaki sa oti. Oti ga e dua na yabaki, na iwasewase lailai qori sa ikarua ni ivavakoso vosa vagalu e Finiladi.

 Toso na gauna, vaka sa qai ca tiko ga na mate e tauvi Maire. Au qaravi koya toka mai me yacova nona takali ena 2016. Au nanumi koya vakalevu, au rai vakanamata tu niu na raici koya tale ena vuravura vou ena sega kina na tauvimate.—Aisea 33:24; Vakatakila 21:4.

 Ia au se gumatua tiko ni wasea na itukutuku vinaka vei ira na didivara era tu ena yalava. Qori na cakacaka au vakayagataka mai kina noqu bula ena 60 na yabaki sa oti. Au se vinakata tiko ga meu cakava qori!