Na Vale ni Soqoni e vanua sara ga e veivosakitaki kina na usutu ni iVolatabu, na Matanitu ni Kalou. Qori sara ga na ka e dau vunautaka o Jisu.​—Luke 8:1.

E vanua ni sokalou dina. E dau tuvanaki ena Vale ni Soqoni na vunautaki ni itukutuku vinaka ni Matanitu ni Kalou. (Maciu 24:14) E duidui na kena levu kei na kena itaratara, ia e caka ga me rakorako. E rawa nira vakayagataka e vica na ivavakoso. Ni tubu totolo na iwiliwili ni ivavakoso, e tara kina ena vica na yabaki sa oti e tini vakacaca na udolu na Vale ni Soqoni (e tautauvata ni tara e lima na Vale ni Soqoni ena dua na siga). E rawa vakacava qori?​—Maciu 19:26.

E vakayagataki na cau e baleta sara ga na tara ni Vale ni Soqoni. Na cau qori e dau vakau ina valenivolavola ni tabana. Ni vinakata e dua na ivavakoso me tara se vakavinakataki na nona Vale ni Soqoni, sa tiko na ilavo e rawa ni vakayagataki kina.

Era tara o ira na bolecakacaka mai na duidui vanua, ra qai sega ni saumi. Ena levu na vanua, sa ra tiko kina na Timi ni Tara Vale ni Soqoni. So na timi ni taravale kei ira na bolecakacaka era toki mai na dua na ivavakoso ina dua tale, ena vanua yawa mada ga mera vukei ira na taci keimami ena tara ni nodra Vale ni Soqoni. Ena so tale na vanua, era lesi na taci keimami era kenadau ena taravale mera liutaka na tara ni Vale ni Soqoni kei na kena vakavinakataki ena vanua era veiqaravi kina. Levu na kenadau ena vanua qori era na bole mera veivuke, ia e levu ga vei ira na lewe ni ivavakoso era na bolecakacaka. Na yalo tabu i Jiova kei na nodra veiqaravi mai vu ni lomadra na nona tamata e rawa kina ni vakayacori kece qori.​—Same 127:1; Kolosa 3:23.

• Na cava e dau veivosakitaki ena Vale ni Soqoni?

• E tara vakacava na Vale ni Soqoni e veiyasa i vuravura?