Ena so na gauna keimami na takoso e loma ni veikauloa se vosota na draki ca, me keimami kua ga kina ni calata na neimami soqoni vaKarisito. Era vakila tale ga e levu na ituvaki dredre na iVakadinadina i Jiova, ra qai wawale ni oti na nodra cakacaka ena dua na siga. Ia na cava ga era saga kina mera lai veimaliwai kei ira na tacidra vakayalo?

Keimami na vinaka kina. A vola o Paula me baleta na veimaliwai ena ivavakoso, ‘me keimami veinanumi.’ (Iperiu 10:24) Kena ibalebale me keimami veikilai vinaka. E uqeti keimami sara ga o Paula me keimami dauveikauaitaki. Ni keimami sa mai veikilai kei ira eso tale na vuvale iVakadinadina, keimami raica nira vosota tale ga e levu na ituvaki dredre, keimami vulica kina na ka me keimami cakava.

Dei kina neimami veitokani. Ni keimami gole ina neimami soqoni, keimami sotavi ira kina neimami itokani voleka. Keimami dau veimaliwai tale ga kei ira ena so na soqo ni marau. E yaga vakacava na gauna ni veimaliwai qori? Keimami vakamareqeti ira kina na taci keimami, qori e vaqaqacotaka na neimami veilomani. Nira dau sotava gona na ituvaki dredre, keimami vuki totolo ni vukei ira ni keimami rui veivolekati sara ga. (Vosa Vakaibalebale 17:17) Keimami vakaraitaka neimami “veikauaitaki” ena neimami veimaliwai kei ira na lewe ni ivavakoso.​—1 Korinica 12:25, 26.

Oni uqeti moni veitokani kei ira era cakava tiko na loma ni Kalou. Oni na raica qori vei ira na iVakadinadina i Jiova. Me kua ni dua na ka e tarovi iko ena nomu mai maliwai keimami.

• Na cava keimami dau veimaliwai kina ena soqoni?

• Gauna cava o nanuma mo na tiko kina ena neimami soqoni?