Ni tekivu nomudrau bula vakawati, ena basika na veimataqali leqa. Ena rairai vakavuna qori na duidui ni nomudrau rai, ivakarau ni yalo, duidui isususu se so tale na ituvaki ena taudaku ni bula vakawati kei na veika tawanamaki.

De dua eda na nanuma ni vinaka meda drotaka na ituvaki qori, ia e vakasalataki keda na iVolatabu meda walia noda leqa. (Maciu 5:23, 24) Na iwali vinaka duadua ni nomu leqa oya mo muria na ivakavuvuli vakaivolatabu.

NA KA E TUKUNA NA IVOLATABU: “E [tiko] na gauna ni vosa.” (Dauvunau 3:1, 7) Me tiko na gauna mo drau veitalanoataka kina na nomudrau leqa. Mo vakaraitaka vakadodonu vei watimu na nomu rai kei na lomamu me baleta nomudrau leqa. Dau “tukuna ga na ka dina” vei watimu. (Efeso 4:25) Ke mani via kaukaua vakalailai na veivosaki, qarauna ga me kua ni tini ena veiba. Na vosa e tau vakayalovinaka ena sega ni vakavuna me lai tini na veivosaki ena veileti.—Vosa Vakaibalebale 15:4; 26:20.

Ke o sega mada ga ni duavata kei watimu, mo vosa vakayalovinaka tiko ga vua, kua vakadua ni guilecava mo vakaraitaka nomu loloma kei na nomu veidokai. (Kolosa 4:6) Saga mo walia vakatotolo na leqa, kua vakadua ni drau veigaluvi.—Efeso 4:26.

NA KA O RAWA NI CAKAVA:

• Lokuca e dua na gauna veiganiti mo veivosakitaka kina na leqa

• Mo vakarorogo vinaka ni vosa tiko o watimu, qarauna mo kua ni vosa takoso. Ena qai tiko na gauna mo vosa kina

NA KA E TUKUNA NA IVOLATABU: “Ni veilomani . . . Ni dau liu ena nomuni veirokorokovi.” (Roma 12:10) Ena yaga vakalevu ke o dau vakarorogo. Saga mo kila na rai i watimu ‘ena dela ni veikauaitaki kei na yalomalumalumu.’ (1 Pita 3:8; Jemesa 1:19) Mo vakarorogo dina ni vosa tiko o watimu. Ke rawa, biuta mada na ka o cakava tiko, rogoci koya mada se kerea mo drau qai veivosakitaka e muri. Ke o raici watimu me nomu itokani, sega ni nomu meca, o na ‘sega ni cudru totolo.’—Dauvunau 7:9.

NA KA O RAWA NI CAKAVA:

• Ke o sega ni taleitaka na ka e tukuna o watimu, mo yalorawarawa tiko ga ni vakarogoci koya

• Kua ni kauaitaka wale ga na vosa e cavuta o watimu, kauaitaka na ka e via tukuna tiko. Kauaitaka tale ga na nona ivukivuki kei na rorogo ni domona

NA KA E TUKUNA NA IVOLATABU: “E yaga na cakacaka vakaukaua kece, ia na vosa wale e tini ena dravudravua.” (Vosa Vakaibalebale 14:23) Ena sega ni vinakati mo drau duavata ga kei na iwali vinaka duadua ni nomudrau leqa. Ena vinakati mo drau raica me vakayacori na ka drau sa vakatulewataka. De dua ena vinakati kina na gugumatua kei na sasaga, ia ena yaga sara qori. (Vosa Vakaibalebale 10:4) Ke drau cakacaka vata, ena “vinaka na isau” ni nomudrau sasaga.—Dauvunau 4:9.

NA KA O RAWA NI CAKAVA:

• Vakasamataka na ka vakayalomatua mo drau dui cakava me wali kina na nomudrau leqa

• Ni toso na gauna, raica lesu na ka vinaka drau sa cakava mai