iMatai ni iVola Vei Ira mai Korinia 10:1-33
10 Kemuni na taciqu, au vinakata moni kila ni a vakaruguti ira kece na tukada na o,+ era takosova kece na wasawasa,+
2 era papitaiso kece tale ga mera imuri i Mosese ena o kei na wasawasa,
3 era kana kece ena kakana vakayalo,+
4 era gunu kece tale ga mai na wai vakayalo.+ Nira dau gunu mai na vatu vakayalo, na vatu e muri ira, na vatu ya o Karisito.+
5 Ia e levu vei ira qo e sega ni vakadonui ira na Kalou, era vakamatei ena vanua talasiga.+
6 Meda vuli ena veika e yaco ya, meda kua kina ni vinakata na ka ena kauta mai na leqa, me vaka ga era vinakata.+
7 Meda kua tale ga ni ucui ira ena nodra qaravi matakau, me vaka e volai: “Era dabe na tamata mera kana ra gunu. Era qai tucake mera veilasamaki.”+
8 Meda kua tale ga ni veiyacovi tawadodonu* me vaka na nodra veiyacovi tawadodonu* eso vei ira, ra bale kina e le 23,000 ena dua ga na siga.+
9 Meda kua tale ga ni vakatovolei Jiova*+ me vaka na nodra vakatovolei koya eso, e vakamatei ira kina na gata.+
10 Meda kua tale ga ni dau vosakudrukudru+ me vaka eso vei ira, e vakarusai ira kina na dauveivakarusai.+
11 Na ka kece e yacovi ira e ka ni vuli vei keda, e volai tale ga me ivakasala vei keda+ eda bula donuya na icavacava ni veika vakavuravura.
12 O koya gona e nanuma ni sa tudei tu, me qarauna me kua ni bale.+
13 E sega ni dua na veivakatovolei e yacovi kemuni me duatani mai na kena era dau sotava na kena vo.+ Ia e dau dina na Kalou ena nona vosa, oya ni na sega ni vakalaiva moni sotava na ka ni veivakatovolei oni na sega ni taqea rawa.+ Ni oni vakatovolei, ena vakarautaka tale ga na sala moni vosota rawa kina.+
14 O koya gona kemuni na taciqu lomani, ni dro tani mai na qaravi matakau.+
15 Au vosa vei kemuni me vaka au vosa vei ira na yalomatua, oni rawa ni vakatulewa ena ka au tukuna qo.
16 Na bilo ni vakavinavinaka eda a masulaka, e vakaibalebaletaka na noda vakila na yaga ni dra i Karisito.+ Na madrai eda a tikica, e vakaibalebaletaka na noda vakila na yaga ni yago i Karisito.+
17 Baleta ni dua ga na madrai, e dina nida le levu, eda dua ga na yago,+ nida vakayagataka vata ga na madrai qori.
18 Raici ira mada na Isireli vakayago: Vakacava era vakaivotavota vata kei na icabocabonisoro o ira era kania na isoro?+
19 Na cava meu qai kaya? E ka bibi na isoro e cabo ina matakau, se bibi na matakau?
20 Sega, au kaya ni ka era cabora na veimatanitu era cabora vei ira na timoni, era sega ni cabora vua na Kalou.+ Au sega kina ni vinakata moni vakaivotavota vata kei ira na timoni.+
21 Oni sega ni gunu rawa ena bilo nei Jiova* kei na nodra bilo na timoni, oni sega ni kana rawa ena “teveli nei Jiova”*+ kei na nodra teveli na timoni.
22 Se ‘eda via vakacudrui* Jiova’?*+ Vakacava, eda kaukaua cake vua?
23 E tara na ka kece, ia e sega ni yaga na ka kece. E tara na ka kece, ia e sega ni veiuqeti na ka kece.+
24 Me kua ni dua e qara na ka e yaga ga vua, me qara tale ga na ka e yaga vei ira tale eso.+
25 Moni kania na ka kece e volitaki ena makete ni lewe ni manumanu, ni kua tale ni vakataroga e dua na ka ena vuku ni nomuni lewaeloma,
26 ni “nei Jiova* o vuravura kei na ka kece e tu kina.”+
27 Ke sureti kemuni e dua e sega ni vakabauta qai donu vei kemuni nona veisureti, kania na ka kece e vakarautaka e matamuni, ni kua tale ni vakataroga e dua na ka ena vuku ni nomuni lewaeloma.
28 Ia ke dua e kaya vei kemuni: “Na ka qo sa cabori mai,” kua ni kania ena vuku i koya e vakaraitaka na itukutuku ya, ena vuku tale ga ni lewaeloma.+
29 Qo e sega ni nomu lewaeloma, na nona ga o koya adua. Na cava me mai lewa kina na ka au cakava na nona lewaeloma e duatani tale?+
30 Keu kania na ka au sa vakavinavinakataka oti, na cava meu vosavakacacataki kina ena ka au sa vakavinavinakataka?+
31 O koya gona, se oni kana se gunu se cava ga oni cakava, moni cakava na ka kece me vakalagilagi kina na Kalou.+
32 Ni kua ni cakava e dua na ka mera tarabe kina na Jiu kei ira na kai Kirisi, kei ira tale ga na lewe ni ivavakoso ni Kalou,+
33 me vaka ga na noqu saga meu vakamarautaki ira kece na tamata ena ka kece, au sega ni qara na ka e yaga ga vei au,+ na ka ga e yaga vei ira e levu, mera vakabulai kina.+
iVakamacala e ra
^ Raica na iVakamacala ni Vosa.
^ Raica na iVakamacala ni Vosa.
^ Se “eda vakavuna me vuvu.”
