Nodra Cakacaka na Yapositolo 2:1-47
2 Ni vakacagau tiko na siga ni Soqo ni Penitiko,*+ nira tiko kece ena dua na vanua na lewe ni ivavakoso,
2 e qai rogo vakasauri mai lomalagi e dua na rorogo e vaka na cagi kaukaua, e vakasinaita na lomanivale era dabe tiko kina.+
3 Era sa qai raica na veika era vaka na yameyame ni buka ni lai toka e buradeladra yadua,
4 E sobuti ira kece na yalo tabu,+ era tekivu vosataka na veimataqali vosa me vaka ga e dusimaki ira kina na yalo tabu mera cavuta.+
5 Era tiko e Jerusalemi ena gauna ya e levu na Jiu dau rerevaka na Kalou era lako mai na veimatanitu kece e ruku i lomalagi.+
6 Ni rogo ga mai na rorogo ya era tabili yani e dua na ilala levu, era kidroa nira rogoci ira na tisaipeli nira vosataka tiko na nodra dui vosa.
7 Era kurabui dina ra qai kaya: “Raici ira mada. Era sega beka ni kai Kalili kece na vosa tiko qo?+
8 Eda qai rogoca tu vakacava na noda dui vosanisucu?
9 O keda na kai Paricia, Mitia,+ Ilama,+ Mesopotemia, Jutia, Kapatosia, Ponito, kei na yasana o Esia,*+
10 o Firijia, Pamifilia, Ijipita, kei na yasana o Lipea volekati Kirini, kei ira na vulagi mai Roma, qo era wili kina na Jiu kei ira na tavuki ina lotu vakaJiu,+
11 o ira na kai Kiriti kei ira na kai Arapea—eda rogoca nira vunautaka tiko ena noda vosa sara ga na veika vakatubuqoroqoro ni Kalou.”
12 Era kurabui kece ra lomatarotaro tale ga, era kaya: “Na cava na ibalebale ni ka qo?”
13 Ia era kaya eso ena nodra veivakalialiai: “Era mateni ena waini vou.”
14 E tucake o Pita kei ratou na le Tinikadua+ qai kaya ena domolevu: “Kemuni na kai Jutia kei kemuni kece na lewe i Jerusalemi, moni kila qo, ni rogoca vinaka tale ga na noqu vosa.
15 Era sega ni mateni o ira qo me vaka oni nanuma, ni se qai ikatolu ga ni aua.*
16 E kena veibasai ga, qo na vosa a cavuta na parofita o Joeli:
17 ‘“Ena iotioti ni veisiga,” e kaya na Kalou, “Au na sovaraka na yaloqu vei ira na tamata kece ga, era na parofisai na luvemuni tagane kei na luvemuni yalewa, era na raivotu na nomuni cauravou, era na tadra tale ga na nomuni qase.+
18 Au na sovaraka tale ga na yaloqu ena gauna ya vei ira na noqu dauveiqaravi tagane kei na yalewa, era na qai parofisai.+
19 Au na cakava eso na ka veivakurabuitaki mai lomalagi e cake kei na ivakatakilakila ena vuravura e ra—na dra, na bukawaqa, kei na kubou.
20 Ena vuki na matanisiga me butobuto kei na vula me dra, ni bera ni qai yaco mai na siga i Jiova,* e levu qai lagilagi.
21 Era na bula o ira kece era masuta na yaca i Jiova.”’*+
22 “Kemuni na Isireli, ni rogoca na vosa qo: Na Kalou e vakatakilai Jisu na kai Nasareci vei kemuni, ena nona solia vua na kaukaua me cakamana, me cakava na cakacaka veivakurabuitaki, kei na ivakatakilakila ena kemuni maliwa,+ me vaka oni kila,
23 o koya qo a soli vei kemuni me vaka e nakita qai kila e liu na Kalou,+ oni vakota ena kau, oni vakamatea ena ligadra na daucaka ca.+
24 Ia e vakaturi koya na Kalou+ ni sereka na ivau ni mate, baleta ni sega ni rawa ni vauci tiko ga kina.+
25 Ni kaya o Tevita me baleti koya: ‘Au raici Jiova* ni tu ga e mataqu, e tu ga e ligaqu imatau meu kua vakadua ni yavalati.
26 Ena vuku ni ka qo e reki kina na lomaqu, e marau vakalevu na yamequ. Au na vakacegui tale ga ena inuinui,
27 ni oni na sega ni biuti au ena iBulubulu,* oni na sega tale ga ni vakatara me vuca na yagona na nomuni tamata yalodina.+
28 Oni vakatakila vei au na sala meu bula kina, oni na vakasinaiti au ena marau levu e matamuni.’+
29 “Raveitacini, meu se tukuna vakadodonu mada na ka e baleti koya na ulunivuvale o Tevita, ni a mate, e bulu,+ se tu ga vei keda na nona ibulubulu me yacova mai na siga qo.
30 Ni a parofita o koya, e kila tale ga ni a bubuluitaka vua na Kalou ni na dabe ena nona idabedabe vakatui e dua na nona kawa,+
31 e sa raica rawa tu yani o koya na nona vakaturi na Karisito, e dau tukuna tale ga ni na sega ni biu tu mai na iBulubulu,* se me vuca na yagona.+
32 O Jisu sara ga qo a vakaturi koya na Kalou, keimami a vakadinadinataka kece sara ga.+
33 O koya gona, a vakacerecerei ina ligaimatau ni Kalou+ qai soli vua na yalo tabu a yalataka o Tamana,+ qo sara ga na ka e sovaraka mai me vaka dou raica, dou rogoca tale ga.
34 Ia e sega ni lako cake i lomalagi o Tevita, e tukuna ga, ‘E kaya o Jiova* vua na noqu Turaga: “Dabe ena ligaqu imatau
35 meu vakamalumalumutaki ira mada na kemu meca mera itutu ni yavamu.”’+
36 O koya gona, me kila na vuvale taucoko e Isireli ni o Jisu oni vakamatea ena kau+ e lesi koya na Kalou me Turaga,+ me Karisito tale ga.”
37 Nira rogoca ya, e coka sara ga na lomadra, era qai kaya vei Pita kei ira na vo ni yapositolo: “Raveitacini, na cava me keimami cakava?”
38 E qai kaya vei ira o Pita: “Ni veivutuni,+ ni papitaiso kece+ ena yaca i Jisu Karisito me vosoti kina nomuni valavala ca,+ ena qai soli vei kemuni na iloloma soli wale, na yalo tabu.
39 Ni a tau na vosa ni yalayala+ vei kemuni, vei ira na luvemuni, kei ira kece era tu vakayawa, o ira kece ena kacivi ira o Jiova* na noda Kalou.”+
40 Levu tale na vosa e tauca ena nona vakamacala sara ga vakavinaka vei ira kei na nona vakauqeti ira ni kaya: “Moni vakabulai mai na itabatamata takelo qo.”+
41 Era mani papitaiso+ ena siga ya e rauta ni 3,000 nira ciqoma ena marau na nona vosa.+
42 Era muria tiko ga na nodra ivakavuvuli na yapositolo, era dau soqoni vata,* era kana vata,+ era masu vata tale ga.+
43 Era rere kece na tu e kea nira raica na levu ni nodratou cakacaka veivakurabuitaki kei na nodratou cakamana na yapositolo.+
44 Era soqoni vata o ira kece na sa mai vakabauta ena nodra wasea na ka e tu vei ira,
45 era volitaka nodra iyau+ kei na ka era taukena, ra qai wasea na ka era rawata vei ira era leqa tu.+
46 Era dau tiko ena valenisoro ena veisiga, ni duavata nodra inaki, era veivakani ena nodra vale ena reki kei na lomavinaka,
47 era vakacaucautaka na Kalou, o ira tale ga na lewenivanua kece era taleitaki ira. Ena gauna vata ya e vakatubura tiko ga o Jiova* e veisiga na kedra iwiliwili na vakabulai.+
iVakamacala e ra
^ Penitiko ena vosa vaKirisi, e kena ibalebale “iKalimasagavulu.” Na solevu qo e dau vakayacori ena ika50 ni siga me tekivu wiliki mai na 16 ni Naisani.
^ Na matavosa “yasana o Esia” ena iVolatabu vaKirisi vaKarisito e vakaibalebaletaka na yasana vakaRoma e toka ena muaira kei Esia Lailai, e sega ni vakaibalebaletaka na iwase levu ni vuravura o Esia.
^ Oya rauta na 9 na kaloko ena mataka.
^ Se “Etesi,” oya na ibulubulu ni kawatamata. Raica na iVakamacala ni Vosa.
^ Se “Etesi,” oya na ibulubulu ni kawatamata. Raica na iVakamacala ni Vosa.
^ Se “era wasea na ka kece era taukena.”
