Nodra Cakacaka na Yapositolo 24:1-27
24 Oti e lima na siga sa qai lako sobu mai na bete levu o Ananaiasa,+ eso na qase, kei na loya o Teritulu mera mai beitaki Paula vua na kovana.+
2 Ni sa kacivi mai, sa qai beitaki Paula o Teritulu, e kaya:
“Keimami bula vakacegu ena vukumuni, e levu tale ga na veisau vinaka ena matanitu qo ena nomuni raiyawa,
3 keimami vakila qo ena veigauna kece kei na veivanua kece, keimami vakavinavinaka vakalevu vei kemuni Filikesa na Turaga Dokai.
4 Ia au na sega ni taura vakabalavu na nomuni gauna, au kerei kemuni moni yalovinaka ni rogoci keimami mada vakalekaleka.
5 Ni keitou raica na tamata qo e dauvakavuca,+ ena nona veivakauqeti era tikoyavavala+ sara ga kina na Jiu kece ena veiyasa i vuravura, e nodra iliuliu na matalotu ya mai Nasareci,+
6 a via vakadukadukalitaka tale ga na valenisoro, keimami mani vesuki koya.+
7 * ——
8 Na ka kece keimami beitaki koya kina qo oni na vakadinadinataka ke oni tarogi koya sara ga.”
9 Ni cavuta oti ya, era sega ni bera na Jiu ena nodra veitokoni, era kaya ni dina kece na itukutuku ya.
10 Ni deguvacu vei Paula na kovana me vosa, e kaya:
“Au kila vinaka ni vica vata na yabaki nomuni turaganilewa voli ena matanitu qo, e rawarawa kina vei au meu vakamacalataki au vei kemuni, meu sauma na veibeitaki.+
11 E rawa moni kila mai na nomuni itutu, ni se bera mada ga ni 12 na siga na dede ni noqu lako cake meu lai sokalou i Jerusalemi,+
12 era sega mada ga ni raici au niu veiba tiko kei na dua ena valenisoro se meu liutaka e dua na ilala mera vakacaca ena nodra valenilotu se na nodra lomanikoro.
13 E sega mada ga ni rawa nira vakadinadinataka vei kemuni ena gauna sara ga qo na ka era beitaki au kina.
14 Ia au vakatusa qo vei kemuni, niu muria dina tiko na ivakarau ni lotu era vakatoka me matalotu ribatani, meu qarava* kina na nodra Kalou na noqu qase,+ niu vakabauta kece na ka e volai tu ena Lawa kei na nodra ivola na Parofita.+
15 Au nuitaka na Kalou me vaka era nuitaka tale ga o ira qo, nira na vakaturi+ mai na yalododonu kei ira na sega ni yalododonu.+
16 Oya na vuna au dau saga kina me vinaka tiko ga noqu lewaeloma ena mata ni Kalou, vei ira tale ga na tamata.+
17 Sa oti qo e vica na yabaki au sa qai lako mai meu soli iloloma+ vei ira ena noqu vanua, meu vakacaboisoro tale ga.
18 Niu qarava tiko na itavi qo era mani raica niu sa vakasavasavataki oti ena valenisoro me vaka e vakarota na Lawa,+ e sega ga ni dua na ilala e tu e kea, sega tale ga ni dua na maue. Eso ga na Jiu mai na yasana o Esia
19 e dodonu mera mai vosa e matamuni ke dua na ka era beitaki au kina.+
20 Ke sega, mera vosa sara ga o ira na tu qo mera vakamacalataka se cava na noqu cala niu a tu ena mata ni Sanadrini,
21 vakavo ga noqu a tukuna vakadomoilevu niu a tucake tu ena kedra maliwa: ‘Au mai lewai tiko qo e matamuni ena vuku ni inuinui ni nodra vakaturi na mate!’”+
22 Ia e sega ni vulagi o Filikesa ena ka e baleti ira na muria tiko Na Sala,+ mani vakasukai ira yani qai kaya: “Gauna ena lako sobu mai kina o Laisiasa na komada ni mataivalu, au sa na qai vakatulewataka na ka e baleti kemuni.”
23 E mani vakaroti na turaganivalu me se vesu tiko ga o Paula ia me soli vua eso na galala, mera vakatarai tale ga na wekana mera solia na ka e vinakata.
24 Oti e vica na siga, e gole mai o Filikesa kei Tarusila na watina, e Jiu. Mani talatala me lako mai o Paula qai vakamacalataka vua na veika e vauca na nona vakabauti Karisito Jisu.+
25 Ni vakamacalataka o Paula na yalododonu, na lewamatau, kei na veilewai se bera mai,+ e rere sara ga o Filikesa, mani kaya: “Mo se lako mada, dua na gauna vinaka au na qai talatala tale yani.”
26 Ena gauna vata ya e nanamaki tiko o koya me soli ilavo vua o Paula. Oya na vuna e kacivi koya kina vakawasoma me rau veivosaki.
27 Ni oti e rua na yabaki, sa mai sosomitaki Filikesa o Porisiu Fesito. Se vesu tu ga o Paula ni via vakayalovinakataki ira na Jiu o Filikesa.+
