Lako Yani 12:1-51
12 E qai tukuna o Jiova vei Mosese kei Eroni ena vanua o Ijipita:
2 “Na vula qo ena itekitekivu ni vula vei kemuni. Qo ena imatai ni vula ni yabaki vei kemuni.+
3 Vosa vei ira na isoqosoqo taucoko ni Isireli qai kaya, ‘Ena ikatini ni siga ni vula qo, mera dui taura e dua na sipi+ me baleta na vale i tamadra, me dua na sipi dua na vale.
4 Ke sa rui vuvale lailai qai sega ni vakaoti rawa na sipi, me ratou qai wasea vata kei na vuvale eratou tiko veitikivi, me vaka ga na kedratou iwiliwili. Ni cakacakataki, me kilai na levu ni sipi ena kania e dua.
5 Me ka vinaka na nomuni sipi,+ me ka tagane, qai yabaki dua. Moni digitaka mai vei ira na luvenisipi tagane se vei ira na me.
6 Moni maroroya tiko me yacova na ika14 ni siga ni vula+ qo, mera qai vakamatea qori na ivavakoso taucoko ni Isireli ni sa karobo.*+
7 Mera taura mai eso na dra, ra qai kaburaka ena duru ruarua ni katuba kei na tikina i cake ni icurucuru ni vale era na kania kina.+
8 “‘Mera kania sara na lewena ena bogi qo.+ Mera tavuna ena bukawaqa ra qai kania vata kei na madrai sega ni vakaleveni,+ kei na kakana draudrau gaga.+
9 Moni kua ni kania e dua na tikina ke droka se saqa, se vakabutari ena wai, ia me tavuni ga ena bukawaqa, na uluna vata kei na yavana, kei na kena gacagaca.
10 Moni kua ni maroroya tiko e dua na tikina me yacova na mataka, ia ke dua na ka e vo tu me yacova na mataka, moni vakama ena bukawaqa.+
11 Moni qai kania va qo, ni vakabeleti,* me vakaivava na yavamuni, me tu e ligamuni na ititoko, moni kania tale ga vakatotolo. Qo na Lakosivia i Jiova.
12 Ena bogi qo, au na lakova taucoko na vanua o Ijipita qai vakamatea na ulumatua kece ena vanua o Ijipita, mai na ulumatua ni tamata me yaco sara vei ira na manumanu era sucu mai e liu,+ au na qai vakatauca na noqu lewa vei ira na kalou kece ni Ijipita.+ O yau o Jiova.
13 Na dra ena tu me nomuni ivakatakilakila ena veivale oni tiko kina, niu raica ga na dra au na lako siviti kemuni sara, ena qai sega ni tau vei kemuni na kuita me vakarusai kemuni, ena gauna au mokuta kina na vanua o Ijipita.+
14 “‘Na siga qo me ivakananumi vei kemuni, moni dau vakayacora kina e dua na soqo vei Jiova ena nomuni itabatamata kece. Moni dau vakayacora, ni qo na lawa tudei.
15 Moni kania na madrai sega ni vakaleveni me vitu na siga.+ Io, ena imatai ni siga moni kauta laivi mai na nomuni vale na falawa wiwi sa bali tu, baleta o koya e kania na ka e vakaleveni mai na imatai ni siga me yacova na ikavitu, me muduki laivi* mai Isireli na tamata oya.
16 Ena imatai ni siga me dua nomuni soqoni tabu, me qai dua tale nomuni soqoni tabu ena ikavitu ni siga. Me kua ni vakayacori e dua na cakacaka ena siga qori.+ Na ka ga mera kania na tamata yadua, qori duadua ga e rawa ni vakarautaki ena vukumuni.
17 “‘Moni dau vakananuma na Soqo ni Madrai Sega ni Vakaleveni,+ ni qo sara ga na siga au na kauti kemuni tani kina vakaisoqosoqo* mai na vanua o Ijipita. Moni dau vakananuma na siga qo ena nomuni itabatamata kece, qo na lawa tudei.
18 Ena imatai ni vula, ena ika14 ni siga ni vula, ni sa yakavi, moni kania na madrai sega ni vakaleveni me yacova sara na yakavi ni ika21 ni siga ni vula.+
19 Me vitu na siga me kua ni laurai ena nomuni vale na falawa wiwi sa bali tu, baleta ke dua e kania na ka e vakaleveni, se mani vulagi se itaukei ena vanua,+ me muduki laivi* na tamata oya mai na isoqosoqo ni Isireli.+
20 Moni kua ni kania e dua na ka e vakaleveni. Moni kania ga na madrai e sega ni vakaleveni ena nomuni vale kece.’”
21 E kacivi ira sara na qase ni Isireli+ o Mosese qai kaya vei ira: “Lako, ni lai digia na manumanu gone* me baleta na nomuni vuvale yadua, moni qai vakamatea na isoro ni Lakosivia.
22 Moni qai tonia e dua na ivutu isopi* ena dra e tu ena beseni, qai samuta na tikina i cake ni icurucuru ni vale kei na duru ruarua ni katuba ena dra, me kua ni dua vei kemuni me curu i tuba mai na icurucuru ni nona vale me yacova na mataka.
23 Ni na tasivi o Jiova me kuitataki ira na Ijipita, qai raica na dra ena tikina i cake ni icurucuru ni vale kei na duru ruarua ni katuba, ena lakosivita sara na icurucuru o Jiova, ena qai sega ni vakalaiva o koya me curuma na nomuni vale na kuita e veivakamatei.*+
24 “Moni vakananuma na soqo qo me ivakaro tudei vei kemuni kei ira na luvemuni.+
25 Moni dau vakananuma na ka qo+ ni oni sa curuma na vanua ena solia vei kemuni o Jiova, me vaka ga na nona vosa.
26 Ke ra mani tarogi kemuni na luvemuni, ‘Na cava na ibalebale ni ivakananumi qo vei kemuni?’+
27 Moni kaya, ‘Qo na isoro ni Lakosivia vei Jiova, o koya e lakosivia na nodra vale na Isireli e Ijipita ena gauna a kuitataki ira kina na kai Ijipita, ia e vakabula na neimami vale.’”
Era qai cuva na tamata era davo vakatoboicu.
28 Era mani lako yani na Isireli ra qai cakava na ka e vakarota o Jiova vei Mosese kei Eroni.+ Era cakava sara ga na ka e tukuni vei ira.
29 Ena bogilevu tutu, sa qai vakamatei ira kece na ulumatua ena vanua o Ijipita o Jiova,+ tekivu vua na ulumatua i Fero, o koya e dabe tiko ena nona idabedabe vakatui, yaco sara vua na ulumatua i koya na bobula e tu e valeniveivesu,* kei na manumanu kece era sucu mai e liu.+
30 E duri mai ena bogi oya o Fero kei ira kece na nona dauveiqaravi, kei ira kece na vo ni kai Ijipita, qai dua na veitagicaki levu e Ijipita, baleta e sega ni dua na vale e sega ni mate kina e dua.+
31 E kacivi Mosese sara kei Eroni+ ena bogi oya qai kaya: “Tucake, lako tani mai na kedra maliwa na noqu tamata, o kemudrau kei ira na vo ni Isireli. Ni lako ni lai qaravi Jiova, me vaka ga oni a tukuna.+
32 Kauta tale ga na nomuni qelenisipi kei na nomuni qelenibulumakau, ni lako, me vaka ga oni a tukuna.+ Ia moni vosa vakalougatataki au tale ga.”
33 Era uqeti ira sara na Isireli na kai Ijipita mera biubiu totolo+ mai na vanua “baleta,” me vaka era kaya, “keimami sa vaka kece ga na mate!”+
34 Era mani kauta na tamata na kedra falawa bali se bera ni vakaleveni, ra qai colata e tabadra na nodra boulu ni balibali e ologi tu ena nodra isulu.
35 Era cakava sara na Isireli na ka e kaya vei ira o Mosese, era lai kerea vei ira na kai Ijipita na iyaya siliva, na iyaya koula, kei na isulu.+
36 E vakavuna o Jiova mera nanumi na nona tamata e matadra na kai Ijipita, era mani solia vei ira na ka ga era kerea, ra qai yauta na nodra iyau na kai Ijipita.+
37 Era biubiu mai Ramisese+ na Isireli mera lako i Sukoci,+ e rauta ni 600,000 na tagane era taubale voli, sega ni wili kina na gone.+
38 E tomani ira tale ga e dua na ilawalawa levu era duikaikai,*+ na qelenisipi kei na qelenibulumakau, e dua na iwiliwili vakaitamera ni manumanu.
39 Era tekivu vavia na ka sa bali era kauta mai Ijipita me madrai rauni e sega ni vakaleveni. A sega ni vakaleveni baleta nira vakasavi tani vakatotolo mai Ijipita, era sega ni vakarautaka kina e dua na kedra ivaqa.+
40 Na nodra tiko voli na Isireli era vakaitikotiko e Ijipita,+ e 430 na yabaki.+
41 Ena icavacava ni 430 na yabaki, ena siga sara ga qo, era biuta kina na vanua o Ijipita na isoqosoqo* kece i Jiova.
42 Qo na bogi era na dau nanuma kina na nona kauti ira tani o Jiova mai na vanua o Ijipita. Qo na bogi mera dau vakananuma ena vuku i Jiova o ira na tamata kece ni Isireli, ena nodra veitabatamata.+
43 E qai kaya o Jiova vei Mosese kei Eroni, “Qo na lawa ni Lakosivia: Me kua ni kania na kaitani na kakana ni lakosivia.+
44 Ia ke tiko na nona tagane bobula e volia ena ilavo, mo cilivi koya.+ Sa na qai rawa ni kania.
45 Ena sega ni kania na kaitani sa mai tiko kei na tamata cakacaka saumi.
46 Me laukana ena dua ga na vale. Mo kua ni kauta e dua na lewena ina tautuba ni vale, moni kua tale ga ni musuka e dua na suina.+
47 Mera vakananuma qori na isoqosoqo kece ni Isireli.
48 Ke dua e tiko vulagi kei kemuni qai via vakananuma tale ga na Lakosivia vei Jiova, mera cilivi na nona tagane kece. Oti me qai toro voleka mai o koya me mai vakananuma, ena qai vaka ga e dua na itaukei ena vanua o koya. Ia me kua ni kania o koya e sega ni cili.+
49 Ena dua ga na lawa vei koya e itaukei kei koya e tiko vulagi ena kemuni maliwa.”+
50 Era sa qai cakava kece na Isireli na ka e vakarota o Jiova vei Mosese kei Eroni. Era cakava sara ga na ka e tukuni vei ira.
51 Ena siga sara ga qo, e kauti ira tani mai na Isireli kei na nodra isoqosoqo* o Jiova mai na vanua o Ijipita.
iVakamacala e ra
^ Ipe., “maliwa ni rua na yakavi.”
^ Ipe., “ni vauca na tolomuni.”
^ Se “vakamatei.”
^ Ipe., “vakamataivalu.”
^ Se “vakamatei.”
^ Oya na lami se me gone.
^ Na isopi e rawa ni dusia e dua se vica vata na mataqali kau, ia e sega ni matata vinaka se kau vakacava.
^ Ipe., “vakacaca.”
^ Ipe., “tu ena vale ni ikeliniwai.”
^ Oya e dua na ilawalawa duikaikai era sega ni Isireli, okati kina o ira na kai Ijipita.
^ Ipe., “vakamataivalu.”
^ Ipe., “vakamataivalu.”
