Vola o Marika 11:1-33
11 Ni ratou volekati Jerusalemi yani, donui Pecifaki kei Pecani+ ena Ulunivanua ni Veiolive, e tala sara o Jisu e rua na nona tisaipeli+
2 qai kaya vei rau: “Drau lako ina koro e tu mai ya, ni drau curu yani drau na raica e dua na luveniasa ni vesu tu kina, e se sega ni bau vodoki vakadua. Drau sereka, drau kauta mai ke.
3 Ke dua e kaya vei kemudrau, ‘Na cava drau cakava?’ Drau kaya vua, ‘E vinakata na Turaga, ena qai kauta tale mai ke.’”
4 Rau gole sara rau raica ni tu ena batinisala na luveniasa qai vesu toka ena katuba ni vale, rau mani sereka.+
5 Era kaya vei rau eso na tu e kea: “Na cava drau sereka kina na luveniasa qori?”
6 Rau tukuna vei ira na ka e kaya o Jisu, era mani laivi rau me rau kauta.
7 Rau kauta mai na luveniasa+ vei Jisu, rau qai tevuka e daku ni asa na nodrau isulu e sau, mani dabe kina o Jisu.+
8 E levu tale ga era tevuka e gaunisala na nodra isulu e sau, ia eso era musu tabanikau mai lomanivanua.+
9 Era kacivaka na liu tiko vua kei ira na muri koya tiko: “Keimami masulaka me vakabulai!+ E kalougata o koya e lako mai ena yaca i Jiova!*+
10 E kalougata na Matanitu i Tevita na tamada sa roro mai!+ Keimami masuti kemuni na tiko ena vanua cecere sara, moni vakabulai koya!”
11 Ni yaco yani i Jerusalemi e lako sara ina valenisoro, e vakararai wavoki, ia ni sa karobo na vanua, e gole sara i Pecani kei ratou na le Tinikarua.+
12 Ena siga tarava, ni ratou biubiu mai Pecani, sa qai viakana o Jisu.+
13 E raica sara tu yani vakayawa e dua na vunilolo e draudrau vinaka, mani gole me lai tauca eso na vuana. Ia e sega ni raica e dua na ka, e tu ga na drauna, ni se sega ni kena gauna me vua kina.
14 Mani kaya ina vunilolo: “Me kua tale ni dua e kana lolo vei iko me tawamudu.”+ Eratou vakarorogo tu na nona tisaipeli.
15 Ni ratou yaco yani i Jerusalemi, e curu sara ina valenisoro o Jisu qai vakasavi ira na veivoli tiko e loma, e vukica nodra teveli na veisau ilavo kei na nodra idabedabe na volitaki ruve,+
16 e vakatabuya tale ga me dua e cola iyaya takoso e loma ni valenisoro.
17 E veivakavulici qai kaya vei ira: “Vakacava e sega ni volai, ‘Ena vakatokai na noqu vale me nodra vale ni masu na veimatanitu’?+ Ia dou sa vukica me nodra qara na daubutako.”+
18 Nira rogoca na iliuliu ni bete kei na vunivola na ka e yaco ya, era sa qai saga mera vakamatei koya+ nira rerevaki koya, nira kurabuitaka tale ga na veika e vakavulica.+
19 Ni sa yakavi na vanua, eratou qai biuta na koro.
20 Ia ena matakacaca ni ratou lako tiko, eratou raica sara na vunilolo ni sa malai tu, e tekivu malai sara mai wakana.+
21 E nanuma o Pita na ka e tukuna o Jisu, e kaya vua: “Rapai, ni raica, sa malai na vunilolo oni cudruva.”+
22 E kaya vei ratou o Jisu: “Dou vakabauta na Kalou.
23 Au tukuna vakadodonu vei kemudou, o koya e tukuna ina ulunivanua qo, ‘Talave, toso i wasawasa,’ qai sega ni vakatitiqa na lomana ia e vakabauta ni na toso, ena yaco dina.+
24 Oya na vuna au tukuna kina vei kemudou, ni ka kece dou masulaka se kerea, dou vakabauta ni na rawa, dou na qai rawata dina.+
25 Ni dou tucake mo dou masu, dou vosoti ira kece era cakava na ka ca vei kemudou, me rawa kina ni vosota na nomudou ivalavala ca na Tamamudou mai lomalagi.”+
26 * —
27 Eratou lesu tale i Jerusalemi. Ni veilakoyaki tiko e loma ni valenisoro, era qai lako mai na iliuliu ni bete, na vunivola, kei ira na qase
28 era qai kaya vua: “Na lewa mai vei o cakava kina na veika qo? O cei e solia vei iko na lewa qori?”+
29 E kaya vei ira o Jisu: “Au na taroga vei kemuni e dua na taro. Moni sauma mai, au na qai tukuna vei kemuni se lewa mai vei au vakayacora tiko kina na veika qo.
30 Na veipapitaisotaki i Joni+ e vu mai lomalagi se vu vakatamata? Ni sauma mai.”+
31 Era sa qai veivosaki vakataki ira, era kaya: “Ke da tukuna, ‘Mai lomalagi,’ ena qai kaya, ‘Na cava ga oni sega ni vakabauti koya kina?’
32 Ia eda sega ni rawa ni tukuna, ‘E vu vakatamata’!” Era rere ni tukuna qo nira vakabauta kece tu na lewenivanua ni parofita o Joni.+
33 Era mani kaya vei Jisu: “Keimami sega ni kila.” E qai kaya vei ira o koya: “Au na sega tale ga ni tukuna vei kemuni se lewa mai vei au cakava kina na veika qo.”
