E SEGA ni lomavakacegu rawa o George. E sega ni veirauti na kakana e dau vakarautaka ina nona vuvale. Era tauvimate tale ga o ira era tiko tikivi ratou, so tale era waloloi. Ia e kila o George ni tiko volekata nona vanua e dua na matanitu vutuniyau. A vakasamataka sara: ‘Au na gole i vanuatani, vaqara e dua na cakacaka, ratou qai muri yani na noqu vuvale.’

A diva tale ga o Patricia me toki i vanuatani. E sega ni cakacaka, sega tale ga ni vuli vinaka. A mani vakatulewataka me toki i Sipeni, mani biuti Nigeria me muri i Algeria, ia a sega ni kila na ituvaki dredre ena sotava ni takosova na vanua dravuisiga na Sahara. E tukuna: “Au bukete tu ena gauna ya, au vinakata sara ga me susugi o luvequ ena dua na ivakarau ni bula e vinaka cake.”

A toki i Urope o Rachel baleta ni vakila na dredre ni bula vakailavo. A vakacegui mai na nona cakacaka ena Yatu Filipaini, ratou mani vakadeitaka vua na wekana ke toki i vanuatani ena kunea e levu na cakacaka ni veiqaravi e vale. Mani dinautaka na nona ivodovodo ni waqavuka, vakamoce vei watina kei na luvena yalewa, qai yalataka vei rau: “Sega ni dede tou na sota tale.”

Ena vicasagavulu ga na yabaki sa oti, e laurai ni sivia e 200 na milioni na tamata era toki i vanuatani me vakataki George, Patricia, kei Rachel. Eso era toki ena vuku ni ivalu, leqa tubukoso se veivakaduiduitaki, ia e levu era toki ena vuku ni veika vakailavo. Na leqa cava era sotava ena vanua era toki kina? E yaco beka na ka era namaka me vinaka na ivakarau ni nodra bula? Ena tarai ira vakacava na gone ke toki e dua vei rau na itubutubu me lai vaqara cakacaka me levu kina na ilavo? Meda raica mada na isau ni taro kece qori.

Na imatai ni ka dredre ena vakila o koya e biuvanua, oya ni na sega ni rawarawa na nona ilakolako. O George, sa cavuti oti mai, a lakova e vica vata na drau na kilomita qai sega ni kana vinaka. A nanuma lesu: “E dredre dina na ilakolako.” E levu mada ga vei ira na biuvanua era sega ni yacova na vanua era via gole kina.

A vinakata o Patricia me gole i Sipeni. A vodo ena dua na lori sega ni vakalaca qai takosova na vanua dravuisiga na Sahara. “E rauta ni dua na macawa neimami vodo mai Nigeria i Algeria, keimami veiosoosoti ena lori qori e le 25. Keimami raica e levu na yagonimate e gaunisala, e levu tale ga na tamata era lako sese tu ena vanua dravuisiga era sa voleka ni mate. E kena irairai ni so na draiva era vakasaurarataki ira na pasidia mera sobu koso.”

O Rachel e sega ni vakataki George kei Patricia, ni a sauma rawa na nona ivodovodo me vuka i Urope, mani dua sara na nona cakacaka ni veiqaravi e vale. Ia dua na ka na nona dau nanumi luvena yalewa yabaki rua. E kaya: “Au dau rarawa ena gauna au raica kina e dua na tina ni karoni luvena tiko.”

Dua na ka na nona sasaga o George me matau ena vanua e toki kina. E taura e vica vata na vula me qai vakau ilavo vei ratou na nona vuvale. E kaya: “Au tagi e veibogi niu galili qai rarawa.”

Ni oti e vica vata na vula nona takosovi Algeria tiko, sa qai yaco o Patricia ena iyalayala ni vanua o Morocco. E kaya: “Qori na vanua e sucu kina na luvequ yalewa. Au vunitaki ira na dauveivoli era dau vesuki ira na yalewa era biuvanua ra qai vakasaurarataki ira mera saqamua. Oti, au mani rawata eso na ilavo meu sauma kina na noqu ivodovodo ni waqa i Sipeni. Dua dina na soko vakadomobula ni ca na ituvaki ni waqa qai sega ni veiganiti me usana e levu na pasidia. A vinakati tale ga me keimami vakayagataka na neimami ivava me inima! Ni keimami yaco ena baravi kei Sipeni, au sega ni rawa ni taubale ni malumalumu na yagoqu.”

Koya gona, ke dua e via biuvanua e bibi me kua ni vakasamataka wale ga na veika dredre ena sotava ena nona ilakolako. E vinakati me vakasamataka tale ga na duidui ni itovo kei na vosa ena vanua e via toki kina, wili kina na isau kei na veika vakalawa e gadrevi me rawa ni lewenivanua tudei kina. O ira na sega ni vakatarai vakalawa mera lewenivanua ena dredre me dua na nodra cakacaka vinaka, vale vinaka, vuli se qaravi e valenibula. Ena rairai dredre tale ga me dua na nodra laiseni ni draiva se akaude ena baqe. Levu na gauna, o ira era sega ni vakaivolatara mera lewenivanua tudei, era dau vakacakacakataki ena rawaka vakabisinisi, kena irairai nira sega ni dau saumi vakavinaka.

Dua tale na ka me vakasamataki na ilavo. Vakacava meda nuitaka vakatabakidua na ilavo? E tukuna na iVolatabu na ivakasala vuku qo: “Mo vuku qai kua ni vakaocai iko mo vutuniyau. Ena rawa ni yali ga vakasauri na nomu ilavo, e vaka ga ni tubu na tabana  qai vuka vakayawa sara me vaka na ikeli.” (Vosa Vakaibalebale 23:4, 5, Good News Translation) Mo nanuma tale ga, ni tiko eso na ka e bibi cake mai na ilavo—me vaka na loloma, lomavakacegu, kei na duavata vakavuvale. E ka ni rarawa nira vakalaiva eso na itubutubu me bibi cake vei ira na ilavo mai na nodra veilomani vakaveiwatini, se na nodra ‘lomani’ luvedra!—2 Timoci 3:1-3.

Eda buli tale ga na tamata meda kila nida gadreva na Kalou. (Maciu 5:3) Era na saga gona ena nodra vinaka taucoko na itubutubu vinaka mera vakayacora na nodra ilesilesi vakalou, oya mera vakavulici luvedra mera kila na Kalou, nona inaki, kei na nona ivakatagedegede.—Efeso 6:4.

De dua ena duidui na kedra italanoa na biuvanua, ia e levu vei ira qori e tautauvata na ka era sotava, me vaka eda raica ena nodratou ivakaraitaki o George, Rachel, kei Patricia sa cavuti mai ena ulutaga sa oti. Ni biuvanua e dua na itubutubu se biubiu e dua vei rau na veiwatini na kena isa me gole i vanuatani, eratou na vakila na leqa na lewenivuvale, qai rairai taura e vica vata na yabaki meratou na veisotari tale. Na vuvale mada ga i George, eratou qai veisotari tale ni oti e va na yabaki.

A lai kauti luvena yalewa mai na Yatu Filipaini o Rachel, sa voleka ni lima na yabaki na nodrau sega ni sota tu. Rau yaco i Sipeni o Patricia kei na luvena yalewa dramidrami. A kaya: “Na wekaqu duadua ga e bau tiko e yasaqu na luvequ yalewa, au na saga meu karoni koya vinaka.”

E levu vei ira na biuvanua era saga mera tiko dei ena vanua era sa toki kina, dina ga nira galili, era vakila na leqa vakailavo, se ra sega ni sota tu kei ira na nodra vuvale ena dua na gauna balavu. Era vakayagataka kina e levu na nodra gauna, nodra kaukaua kei na nodra ilavo, ia ni sega ni yaco na ka era namaka, e vica wale sara era bolea mera lesu i vale dina ga nira na vakalialiai ra qai vakamaduataki.

Dua vei ira qori o Allan mai na Yatu Filipaini. A kunea e dua na cakacaka vinaka i Sipeni, ia ni oti ga e dua veimama na yabaki a lesu tale i vale. A tukuna: “Dua na ka na noqu dau nanumi watiqu kei luvequ goneyalewa. Au mani vakatulewataka niu na sega tale ni biuvanua meu lai qara cakacaka, vaka vo ke keitou gole kece vakavuvale. Qori sara ga na ka keitou qai cakava. E bibi cake na vuvale mai na ilavo.”

A raica rawa o Patricia ni tiko e dua na ka e bibi cake mai na ilavo. Ni gole i Sipeni a kauta tiko e dua na ilavelave ni “Veiyalayalati Vou” se na iVolatabu vaKirisi vaKarisito. A kaya: “Au nanuma ni na kauta mai vei au na ivola qo na kalougata. Au qai sotava e dua na marama e iVakadinadina i Jiova. Au sega ni dau via vosa vei ira e liu. Ia au mani taroga vua e levu na taro meu vakacala kina na nona vakabauta. A seva na noqu inaki ni a vakamacalataka na nona vakabauta qai vakayagataka na iVolatabu me sauma kina na noqu taro kece.”

E vulica o Patricia ni na rawati ga na marau dina kei na inuinui e dei nida kila vinaka na Kalou kei na nona inaki, sega ni vanua eda toki kina se ilavo eda rawata. (Joni 17:3) E vulica tale ga o Patricia, ni yaca ni Kalou dina o Jiova. (Same 83:18) E wilika tale ga ena iVolatabu ni sa vakarau vakaotia na Kalou na bula dravudravua kece ni vakayagataka na nona Matanitu, e kena tui o Jisu Karisito. (Taniela 7:13, 14) E kaya na Same 72:12, 14: “Ni na vakabula [o Jisu] na dravudravua ni sa tagi; Kei koya sa vakararawataki ka sa sega e dua me vukei koya. Ena vakabula na yalodra mai na lawaki kei nai valavala kaukauwa.”

Vakacava mo vakatikitikitaka nomu gauna mo vulica na iVolatabu? Na ivola uqeti vakalou qo ena vukei iko mo kila na veika e bibi cake ena nomu bula, mo vakatulewa vakayalomatua, mo marau tale ga qai dei na nomu inuinui ni o vosota tiko na ituvaki dredre.—Vosa Vakaibalebale 2:6-9, 20, 21