E dua na nomu itokani tagane* e sega ni watimu e kilai iko vinaka drau qai dau veitalanoataka na ka kece. De dua ena kasami o watimu ke rogoca na ka drau veitalanoataka, ia o tukuna, ‘Sega keirau veitokani ga.’

Kena irairai ni sa sivia tale nomudrau veivolekati qai vinakati mo cakava kina e dua na ka. Ia ena vinaka mo vakasamataka mada se a tekivu vakacava na veitokani qori.

* Na ivakavuvuli ena ulutaga qo e baleti ira na tagane kei na yalewa vakawati.

Vakacegui. Ke da tagane eda dau marau ke dua na yalewa e kauaitaki keda, e va tale ga qori vei ira na yalewa. Qori eda nanuma kina nida taleitaki. Ni oti e vica na yabaki nomu vakawati, o na rairai qara ivakasala vua e dua e sega ni watimu. Ia e dua na ka bibi mo kila tiko: E rawa ni tini ena leqa ke o vakalaiva e dua e sega ni watimu me vakacegui iko. Ke malele na yalomu vua e dua e sega ni watimu o sa na sega ni veivolekati kei watimu. E rawa ni tukuni ni o sa bureitaka tiko vei watimu na veikauaitaki e dodonu me caka ga vua.

• Tarogi iko mada, ‘Na cava eso na leqa sa walia o noqu itokani e dodonu me keirau walia ga vakaveiwatini?’

Sega ni wali na leqa. E vakamatatataki ena iVolatabu nira na “rarawa” o ira era vakawati. (1 Korinica 7:28) Kena ivakaraitaki, de dua ena so na gauna o nanuma ni o vakawaleni se sega ni kauaitaki iko o watimu, se o na cudruvaka tiko ga e dua na nomudrau veileqaleqati. O rarawataka beka ni sega ni via veivosakitaka kei iko o watimu na leqa qori, o qai via talaucaka nomu leqa vua e dua tale. Era tukuna na kenadau, na kena sega ni dauveivosakitaki na leqa ena sega ni marautaki kina na vakawati, se tini ena veisere.

• Tarogi iko mada, ‘Na cava mada e leqa ena noqu bula vakawati au lai galeleta kina e dua e sega ni watiqu?’

Kila na leqa. E kaya na iVolatabu: “Me mokota li e dua na tagane na buka waqa ki lomaserena, ka sega ni kama kina na nonai sulu?” (Vosa Vakaibalebale 6:27) Se da rawa ni kaya ke o galeleta e dua e sega ni watimu ena tini ena leqa. (Jemesa 1:14, 15) Kua ni nanuma ni na sega ni yaco na leqa. Vakasamataka na ituvaki o sa tu kina qori. Ni o galeleta e dua e sega ni watimu e dusia ni o sa bureitaka vei watimu na veikauaitaki e dodonu me caka ga vua.

Kua ni vakacalai. Ni drau sa veivolekati kei na dua e sega ni watimu o na rairai veinanuyaka se na vakacava mada ke o vakawatitaki koya. E sega ni vinaka qori baleta ni o sa vaqoroqoroi nomu itokani ni vinaka cake vei watimu! Nanuma tale ga ni marau o vakila ni o galeleti nomu itokani qori e tautauvata sara ga kei na imatai ni gauna drau se qai veivinakati kina kei watimu.—iVakavuvuli vakaivolatabu: Jeremaia 17:9.

Yalana. E levu era dau biuta na alamu ena nodra motoka se vale me kua kina ni butakoci. E via va sara ga qori na ka mo cakava mo taqomaka kina nomu vakawati. E kaya na iVolatabu, “Mo vakatawa vakavinaka sara na yalomu.” (Vosa Vakaibalebale 4:23) O na cakava vakacava qori? Qo eso na kena ivakaraitaki:

• O rawa ni biuta na itaba kei watimu ena nomu vanua ni cakacaka mo vakaraitaka kina ni o sa vakawati.—iVakavuvuli vakaivolatabu: Vakatekivu 2:24.

• Vakatulewataka sara ga qo eso na ka mo cakava kei na ka mo kua ni cakava kei na dua e sega ni watimu. Kena ivakaraitaki, ena sega ni vinaka mo drau veivosakitaka kei na nomu itokani eso na leqa ena nomu bula vakawati, se mo ciqoma eso na veisureti ni suka na cakacaka.

• Ke o kila ni drau sa veivolekati kei na dua e sega ni watimu, tagutuva na veikilai qori. Ke dredre, e vinaka mo taroga se cava na vuna e sega ni rawa kina. E vinaka cake mo yalana na veitokani qori me kua ni vakaleqa nomu vakawati.—iVakavuvuli vakaivolatabu: Vosa Vakaibalebale 5:18, 19.