“Ni sa kaya vakaoqo ko Jiova, . . . ko koya ka bulia na vuravura, . . . a sa sega ni cakava me lala, sa bulia ga me tawa.”—Aisea 45:18.

KA ERA TUKUNA ESO

Era kaya e levu ni sega ni buli na vuravura. So na lotu era kaya ni vanua ga ni tiko vakawawa me vakatovolei keda kina na Kalou, me raica ke ganiti keda na bula i lomalagi se kama ena bukawaqa i eli.

KA E KAYA NA IVOLATABU

E kaya na iVolatabu ni “bulia na lomalagi kei vuravura na Kalou.” (Vakatekivu 1:1) E kaya vei rau na imatai ni veiwatini: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka; ka lewa na . . . ka bula kecega sa qasi voli e dela i vuravura.” (Vakatekivu 1:28) E qai cavuti ga o mate ni yaco na talaidredre. (Vakatekivu 2:17) A nona inaki gona na Kalou meda bula tawamudu e vuravura. Era na tawana ga o ira era talairawarawa, era qarava vinaka ra qai bula kina me tawamudu.

“Sa vakataudeitaki vuravura ko koya e na kena yavu, me kakua ni yavala rawa ka sega ni mudu.”—Same 104:5.

KA ERA TUKUNA ESO

Era kaya na saenitisi ni so na ka e rawa ni vakavuna me rusa na vuravura se me lala. Dau vakatokai tu ena so na gauna me gauna ni bula ririko, okati kina na leqa tubukoso—me vaka na lutu ni vatu vakaitamera mai na maliwalala kei na kalokalo vakabuina, waicala na matanisiga, se katakata sivia na draki—wili tale ga kina na leqa eda dau vakavuna—me vaka na ivalu vakaniukilia kei na iyaragi ni veivakamatei.

KA E KAYA NA IVOLATABU

Se sega ni veisau na inaki ni Kalou me baleti vuravura. E vakamatatataka na Vosa ni Kalou: “Ko vuravura sa tu ga ka sega ni mudu.” (Dauvunau 1:4) Ena tawani tu ga: “Era na taukena na vanua ko ira na yalododonu, ka tiko kina ka sega ni mudu.”—Same 37:29.

VUNA MO KAUAI KINA

Nira vakabauta eso ni na vakarusai o vuravura, era vakasabusabutaka kina na kena iyaubula. Sa sega kina nodra inuinui eso me baleta na veigauna se bera mai, era via bula ga me baleta na gauna qo. Ena sega ni vakainaki kina na bula. Ia ke da vakabauta nida na rawa ni bula tawamudu e vuravura, na noda vakatulewa ena yaga vei keda kei ira na lewe ni noda vuvale—me baleta mada ga na veigauna se bera mai.

“Na lomalagi io na lomalagi sa nei Jiova: ia sa solia na vuravura ko koya me nodra na luve ni tamata.”—Same 115:16.

KA ERA TUKUNA ESO

Levu era vakabauta nira na lako kece i lomalagi na tamata vinaka.

KA E KAYA NA IVOLATABU

Na lomalagi e nei Jiova, ia e buli na vuravura meda tiko kina. E tukuni ena iVolatabu e dua na “vuravura e se bera mai.” (Iperiu 2:5) O Jisu e imatai ni ka bula vakayago me lako i lomalagi, qai tukuni ena iVolatabu ni digitaka eso mera lako tale ga i lomalagi ena dua na inaki. Era na lai “tui, mera liutaka na vuravura” vata kei Jisu.—Vakatakila 5:9, 10; Luke 12:32; Joni 3:13.

VUNA MO KAUAI KINA

Sega ni salavata kei na ka e vakavuvulitaka dina na iVolatabu na vakabauta nira na lako i lomalagi o ira na tamata vinaka. Ke kauti ira kece na tamata vinaka i lomalagi na Kalou, sa na sega kina ni vakayacora na nona inaki taumada me baleta na vuravura, sega tale ga ni dina na nona yalayala me baleta na bula tawamudu e vuravura. Ia e yalataka na Vosa ni Kalou: “Waraki Jiova, ka muria na nona sala, ena qai laveti iko cake mo taukena na vanua.”—Same 37:34.