KA ERA TUKUNA ESO

Ke dua e via dei ena nona cakacaka, qori sara ga na ka me na vakaliuca. Eso era cakava qori, ra tini vakawalena kina nodra bula vakavuvale kei na nodra bula.

KA E KAYA NA IVOLATABU

E veiraurau na ka e tukuni ena iVolatabu me baleta na cakacaka. Era vakacaucautaki kina na gugumatua, era cudruvi na vucesa. (Vosa Vakaibalebale 6:6-11; 13:4) E sega ni uqeta na iVolatabu meda bobula tale ina cakacaka. Ia e uqeta meda marautaka eso na gauna ni vakacegu. E kaya na Dauvunau 4:6: “E vinaka me sinai e dua na liga ena vakacegu, e ca ni sinai ruarua na liga ena cakacaka kaukaua qai tautauvata kei na cemuria na cagi.” Meda kua gona ni vakaliuca na cakacaka me sa vakawaleni kina na noda vuvale se noda bula. E sega ni dodonu meda bobula ina noda cakacaka me yacova na mate!

“E sega ni dua tale na ka e vinaka vua na tamata, me kana ga, me gunu, me marautaka na nona cakacaka vakaukaua.”—Dauvunau 2:24.

KA ERA TUKUNA ESO

Ke sau vinaka, au na cakacaka. Na rai qori kei na veitemaki ni rawa ilavo totolo era tini veidabui kina eso ena veika vakabisinisi, era cakava kina eso na cakacaka e sega ni vakalawataki.

Eso tale era na cakava ga na cakacaka e dau vakamarautaki ira se ra taleitaka. Era sega ni taleitaka na cakacaka e vakavucesa se sega ni vakamuai kina na lomadra. E dau cala kina nodra rai, era sega ni solia tale ga nodra vinaka taucoko ina nodra cakacaka. De ra tu eso na cakacaka vinaka, ia era sega ni via cakava nira nanuma ni lolovira.

KA E KAYA NA IVOLATABU

E sega ni vakadonuya na iVolatabu na cakacaka e laurai kina na veidabui se vakavuna nodra leqa eso tale. (Vunau ni Soro 19:11, 13; Roma 13:10) E yaga na cakacaka vinaka, ni na ‘vinaka tiko ga kina na nona lewaeloma’ o koya e cakacaka.—1 Pita 3:16.

E vakavulica na iVolatabu ni tiko na inaki vinaka ni cakacaka—qo me rawati kina na bula, tokoni tale ga kina na vuvale, me kua ni yaga duadua ga vei koya e cakacaka. E dua na ka vinaka meda marautaka na cakacaka, ia meda kua ga ni vakaliuca ena noda bula.

Na leqa ni bula vakailavo kei na tubu ni isau ni iyaya e rawa ni lomaocaoca kina e dua ena ka me sauma, ia e veiuqeti na iVolatabu meda bula rawarawa ga. E kaya: “Ke sa tiko na kakana, na isulu, meda lomavakacegu ena veika qo.” (1 Timoci 6:8) E sega ni tukuni kina meda sa vakuai keda ena ka kece. E dodonu ga meda kila na ka e ceguva rawa na noda ilavo, se meda vakasamataka vinaka na veika eda via taukena ia e sega ni bibi.—Luke 12:15.

KA MO CAKAVA

Dau cakacaka vakaukaua qai saga mo taleitaka. Ke o nanuma mada ga ni cakacaka lolovira se sega ni ganiti iko, tovolea mo kenadau kina. Ni o dau cakacaka vagumatua o na lomavakacegu. Ke o saga tale ga mo kila vinaka na ka o cakava, o na taleitaka nomu cakacaka.

Me veiraurau nomu rai. Dau cegu vinaka. E dau marautaki sara na gauna ni vakacegu nida vakayacora vinaka noda cakacaka. Nida rawata tale ga na ka meda bula kina, eda na nuidei, era dokai keda na noda vuvale kei ira na so tale.—2 Cesalonaika 3:12.

“Meda kua gona ni lomaocaoca meda kaya, ‘Na cava meda kania?’ se, ‘Cava meda gunuva?’ se, ‘Cava meda tokara?’ . . . E kila tu na Tamamudou vakalomalagi ni bibi vei kemudou.”​—Maciu 6:31, 32.