DUA NA ka mosimosi ni tawayalodina na isa ni vakawati. Eso era rawa ni vosoti ira na kedra isa nira veivutuni dina, ra qai vaqaqacotaka tale nodra ivau ni vakawati. a Ia se mani cava e yaco ena bula vakawati, ni dua e tawayalodina ena rarawa vakalevu o kena isa. Ia era na vosota vakacava nodra rarawa?

E levu era dau yalodina ena nodra bula vakawati, ia ni tawayalodina o kedra isa dua na ka nodra rarawa. Na iVolatabu ga e dau vakacegui ira. Era kila ni lomani ira na Kalou, e raica tale tiko ga nodra rarawa.—Malakai 2:13-16.

“Ni bikai au na nuiqawaqawa, oni vakacegui au qai vakayaloqaqataki au.”​—Same 94:19.

E nanuma lesu o Bill: “Niu wilika na tikinivolatabu qori, au dau raitayaloyalotaki Jiova me vaka e dua na tama dauloloma e vakaotia noqu rarawa.”

“Oni na yalodina vei koya e yalodina.”​—Same 18:25.

E kaya o Carmen e tawayalodina o kena isa me vica na vula: “E tawayalodina o watiqu. Ia au nuidei ni sega ni biuti au o Jiova, ena sega vakadua ni vakararawataki au.”

“Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere . . . ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece.”​—Filipai 4:6, 7.

E kaya o Sasha: “Au dau wilika wasoma na tikinivolatabu qori. E vakacegui au sara ga na levu ni noqu dau masu vua na Kalou.”

Eso na gauna era dau via soro koso o ira na tukuni toka qori mai cake. Ia e vakayaloqaqataki ira nodra dau nuitaki Jiova, kei na nodra wilika nona Vosa. E kaya o Bill: “Au dau via soro koso ena so na gauna, ia e vukei au noqu vakabauta meu kila ni vakainaki na noqu bula. Keu lakova na ‘buca butobuto loaloa,’ ena tiko vata kei au na Kalou.”—Same 23:4.