Eso era nanuma ni sa veisau na vosa ni Kalou. E kaya na yapositolo o Pita ni vosa ni Kalou “ena tu ga me tawamudu.” (1 Pita 1:25) Eda vakadeitaka vakacava ni donu vinaka na ka e yalataka na Kalou ena nona vosa?

E tu vua na Kalou na kaukaua me maroroya nona vosa, me kua tale ga ni vakatanitaki. Ni lavetaki na iVolatabu ena gauna makawa, era qarauna me kua ni vakuri, veisautaki se lutu e dua na vosa. Ia nida ivalavala ca, era lavetaka cala kina eso na iVolatabu.

E vica vata na udolu na ilavelave ni ivolavivigi makawa ni iVolatabu. Ke duidui mada ga vakalailai e dua na ilavelave, ena vakatauvatani kei na so tale na ilavelave me kilai kina na kena dina. Mo kila e levu tale na ka, raica ena jw.org na ulutaga, “Vakacava sa Veisau na iVolatabu?”

Kena ivakaraitaki, ena 1947 e kunea e dua na yavusa e Arapea eso na ivolavivigi makawa ena dua na qara volekata na Waitui Mate. E vakatokai me iVolavivigi ni Waitui Mate. E tu kina eso na tikinivolatabu e volai sara ena sivia na 2000 na yabaki sa oti. Era sa qai vakatauvatana qori na kenadau kei na iVolatabu sa tu nikua. Na cava era raica kina?

Era raica na dauvakadidike ni tautauvata vinaka na ka e tu ena iVolatabu nikua kei na kena e volai taumada. * Ni dikevi vinaka na ivolavivigi makawa, e vakadeitaki kina ni ka eda wilika ena iVolatabu e nona itukutuku dina ga na Kalou. Eda nuidei gona ni maroroya vinaka tu na Kalou vei keda nikua na nona itukutuku ena iVolatabu.

Eda rawa ni nuitaka gona vakatabakidua na ka eda wilika ena Vosa ni Kalou ni donu vinaka. Meda dikeva sara mada qo na ka eda vulica me baleta na Kalou vei ira na parofita.