“E dua na idabedabe vakaturaga [e] tu mai lomalagi, e dabe tiko e dua ena idabedabe vakaturaga. O koya e dabe tiko kina e vaka na vatu jasipa kei na vatu satiusa na kena irairai, qai wavokita na idabedabe vakaturaga na drodrolagi e vaka na emeralita na kena irairai.”​—Vakatakila 4:2, 3.

“E ramase wavoki o koya me vaka na ramase ni drodrolagi ena o ena siga ni uca. E va qori na ramase ni rarama e wavokiti koya. Na kena irairai e vaka na lagilagi i Jiova.”​—Isikeli 1:27, 28.

E cavuti ena raivotu rau raica na yapositolo o Joni kei na parofita o Isikeli, eso na ka me vakarawarawataka noda raitayaloyalotaka na lagilagi i Jiova na Kalou Cecere Duadua. Kena ivakaraitaki, e cavuti kina na vatutalei, na drodrolagi, kei na idabedabe vakaturaga. Eda taura rawa e keri ni vakatubuqoroqoro qai lagilagi na itikotiko i Jiova, e vakilai kina na vakacegu.

Na ka e vakamacalataki qori me baleta na Kalou e tautauvata kei na ka e vola na daunisame: “E cecere o Jiova, e dodonu ga me vakacaucautaki. E vakatubuqoroqoro vei ira kece na vo ni kalou. Na nodra kalou kece na veimatatamata era kalou tawayaga, ia o Jiova ga e bulia na lomalagi. E tu e matana na lagilagi kei na iukuuku, e tiko ena nona tikina tabu na kaukaua kei na veika totoka.”​—Same 96:4-6.

E Cecere Duadua o Jiova, ia e tu vakarau me rogoca na noda masu. (Same 65:2) E vakadinata na yapositolo o Joni ni lomani keda vakalevu na Kalou qai kauaitaki keda, oya na vuna a vola kina: “[Na] Kalou ga na loloma.”​—1 Joni 4:8.

“E vakilai dina vei [Sitiveni na tisaipeli lotu vaKarisito] na veidusimaki ni yalo tabu. E tacake i lomalagi qai raica na lagilagi ni Kalou, e raici Jisu tale ga ni tucake tu ena ligaimatau ni Kalou, e kaya: ‘Au raica ni sa tadola na lomalagi, e tucake tale tu ga na Luve ni tamata ena ligaimatau ni Kalou.’”​—Cakacaka 7:55, 56.

Ni bera ni raivotu o Sitiveni, sa vakamatei o Jisu ena nodra veivabukani na iliuliu ni lotu a vosa tiko vei ira o Sitiveni. Ia e vakadeitaki ena raivotu ni sa vakaturi o Jisu qai vakalagilagi. A vakamacalataka  qori na yapositolo o Paula ni kaya: “[O Jiova e] vakaturi [Jisu] mai na mate [qai] vakatikori koya ena ligana imatau ena itikotiko vakalomalagi, me cecere sara vei ira na matanitu kece, na lewa kece, na kaukaua kece, na turaga kece, kei na yaca kece, ena ivakarau ni bula ena gauna qo kei na gauna se bera mai.”​—Efeso 1:20, 21.

E kaya na iVolatabu ni soli vei Jisu e dua na itutu lagilagi, qai lomani keda vakalevu me vakataki Jiova. A vakabulai ira na tauvimate o Jisu ena nona cakacaka vakaitalatala e vuravura, a veivakaturi tale ga. E laurai vinaka sara na levu ni nona lomana na Kalou kei na kawatamata ena nona mate vakaisoro. (Efeso 2:4, 5) Sa wawa tu o Jisu ena ligaimatau ni Kalou me vakataulewa, mera vakalougatataki kina na kawatamata talairawarawa.

“Au [na parofita o Taniela] vakararai tiko ga sa tuva tu eso na idabedabe vakaturaga qai dabe o Koya e Dede sara na nona bula [Jiova]. . . . Era qaravi koya e udolu vakaudolu, era duri tu e matana e oba vakaoba.”​—Taniela 7:9, 10.

A sega ni raica ga o Taniela e dua na agilosi ena raivotu qori me baleti lomalagi, ia a raica e dua na ilawalawa levu. Sa wacava nona qoroqoro! Era kabula vakayalo na agilosi, e levu na ka era kila ra qai kaukaua. Dua na iwase ni agilosi era vakatokai me serafimi, dua tale kena iwase me jerupi. E cavuti vaka 250 vakacaca na agilosi ena iVolatabu.

Era sega ni bau bula e vuravura na agilosi. A se buli ira makawa sara na Kalou, qai muri na tamata. Era raica na tauyavu kei vuravura ra qai kaila vata ena vakasausau.​—Jope 38:4-7.

Era vakaitavi tiko ena gauna qo na agilosi ena cakacaka bibi duadua me bau vakayacori e vuravura, oya na cakacaka vakavunau. Qori e dua na sala era qarava kina na Kalou. (Maciu 24:14) A raivotutaka na yapositolo o Joni na nodra ogaoga voli na agilosi ena cakacaka qori, qai vola: “Au qai raica e dua tale na agilosi ni vuka voli e macawa, e kacivaka tiko na itukutuku vinaka tawamudu vei ira na tiko e vuravura, vei ira na veimatanitu, na veiyavusa, na duivosavosa, kei na tamata kece.” (Vakatakila 14:6) Era sa sega ni vosa ena gauna qo na agilosi vei keda e vuravura me vaka ena veigauna sa oti. Ia  era veidusimaki tiko ena nodra sikovi o ira era via rogoca na itukutuku vinaka.

“E qai tubu na ivalu mai lomalagi: o Maikeli [Jisu Karisito] kei ira na nona agilosi era vala kei na gata levu, e vala tale ga na gata levu kei ira na nona agilosi ia era sega ni qaqa, e sega tale ga ni kune mai lomalagi e dua na nodra tikina. Sa qai kolotaki sobu na gata levu, na gata makawa, e vakatokai na Tevoro se o Setani, o koya e vakacala tiko na vuravura taucoko, e kolotaki sobu i vuravura, e kolotaki sobu vata kei ira na nona agilosi.”​—Vakatakila 12:7-9.

A vakilai voli mai lomalagi na vakacegu me yacova na itekivu ni bula ni kawatamata. A saqati Jiova e dua na agilosi ni vinakata me sokaloutaki. Na agilosi qori a qai vuki me o Setani, kena ibalebale na “Dauveivorati.” Era vakatokai me timoni na agilosi era tomani Setani ena nona talaidredre. Era dau vakavu ca na timoni, era saqati Jiova ra qai dau veivakacalai me beci na nona veidusimaki vakayalololoma.

E torosobu qai veivakalolomataki na veika e dau cakava o Setani kei ira na timoni. Era sega ni lomana na tamata, ra qai vakavuna e levu na veika rarawa e yaco tu e vuravura. Kena ivakaraitaki, a vakavuna o Setani na mate ni manumanu i Jope kei na nona dauveiqaravi. A vakavuna tale ga nodratou mate na tini na luvei Jope ni kasura na vale ratou tiko kina ena “dua na batinicagi kaukaua.” Oti e qai vakavuna o Setani me tauvi Jope na “bo mosimosi, mai na qeteqeteniyavana yaco sara i buradelana.”​—Jope 1:7-19; 2:7.

Ia sa voleka ni vakarusai o Setani. Gauna ga e kolotaki mai kina i vuravura, sa kila tu o Setani “ni sa lekaleka nona gauna.” (Vakatakila 12:12) Sa dua dina na ka vinaka ni sa vakarau yali vakadua o Setani!

“Oni [Jisu] voli ira . . . na tamata me nona na Kalou mai na yavusa kece, na vosa kece, na matatamata kece, kei na matanitu kece, oni lesi ira tale ga mera dua na matanitu, ra qai bete vua na noda Kalou, mera veiliutaki vakatui, mera liutaka na vuravura.”​—Vakatakila 5:9, 10.

Eso tale era na vakaturi ina bula vakalomalagi me vakataki Jisu. A kaya o Jisu vei ratou na nona yapositolo yalodina: “Au sa lako tiko qo meu lai vakarautaka e dua na tikina me nomudou. . . . Au na lesu tale mai meu kauti kemudou, mo dou tiko tale ga ena vanua au tiko kina.”​—Joni 14:2, 3.

 E tiko na nodra itavi o ira na lai bula i lomalagi. Era na veiliutaki kei Jisu ena Matanitu ena liutaka na vuravura taucoko, qai vakalougatataki kina na kawatamata. Qori na Matanitu a kaya o Jisu me ratou masuta na nona imuri: “Tamai keimami mai lomalagi, me vakarokorokotaki na yacamuni. Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.”​—Maciu 6:9, 10.

“Au [na yapositolo o Joni] rogoca sara e dua na domolevu mai na idabedabe vakaturaga ni kaya: ‘Raica! E sa tiko vei ira na tamata na vale ni Kalou, . . . ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.’”​—Vakatakila 21:3, 4.

Na ka e parofisaitaki ena raivotu qori e dusia na gauna sa na muduka kina na veiliutaki i Setani na Matanitu ni Kalou qai vukica na vuravura me Parataisi. Era na vukei Jisu ena itavi qori o ira na vakaturi mai vuravura mera lai bula i lomalagi. Sa na oti na mosi kei na rarawa eda vakila tu ena gauna qo, wili kina na mate.

Ia vakacava o ira na vica vata na bilioni era sa mate qai sega ni nodra inuinui na bula vakalomalagi? Era na vakaturi tale ga ena dua na gauna mai muri, mera bula tawamudu ena Parataisi e vuravura.​—Luke 23:43.