ENA gauna vakaivolatabu, e dau soli na isau ni yalewavou ina vuvale nei yalewa ni tuvanaki tiko na vakamau. E rairai okati kina na iyau talei, na manumanu, se ilavo. Eso na gauna e saumi qori ni cakacakataki, me vaka nona cakacaka o Jekope vei tamai Raijeli me vitu na yabaki me rau qai vakamau. (Vkte. 29:17, 18, 20) Na cava na kena inaki?

E kaya e dua na dauvakadidike ni iVolatabu o Carol Meyers: “E soli na isau ni yalewa vou ina vuvale i yalewa e rairai sosomitaka na cakacaka e dau qarava, ni bibi qori ena vuvale e dau teitei.” Na isau ni yalewavou e rawa tale ga ni vaqaqacotaka nodrau veitokani na vuvale ni sa mai semati na veiwekani. Qori ena vakarawarawataka nodrau veivukei ena gauna ni leqa. Kena ikuri, na isau ni yalewavou e vakaraitaka ni sa veimusumusuki o yalewa, ena vakarau biuta tale ga na veikaroni kei na veitaqomaki i tamana me vakararavi vei watina.

Ni soli na isau ni yalewavou e sega ni kena ibalebale ni vaka e dua na iyaya e rawa ni volitaki se voli. E kaya na ivola Ancient Israel—Its Life and Institutions: “Na nodratou rai na vuvale i yalewa, na kena lavaki va qori na isau ni yalewavou se dua tale na ka, e vaka tiko na veivoli na vakamau e Isireli. Ia e sega ni [isau ni yalewa] qori, na ka ga e soli me kena isosomi.”

Nikua, eso na vanua era se solia tiko ga na isau ni yalewavou. Ke ra vinakata na itubutubu lotu vaKarisito na isau ni yalewavou, ena “kilai na [nodra] yalorawarawa vei ira na tamata kece ga” nira sega ni lavaka tu vakasivia na ka. (Fpai. 4:5; 1 Kor. 10:32, 33) Ena kilai tale ga kina nira sega ni “lomana na ilavo,” se ra dau kocokoco. (2 Tim. 3:2) Ia ke sivia tale na isau ni yalewavou era vinakata, ena rawa ni vakadaroya o tagane na vakamau me rawa ni saga me rawata na isau ni yalewavou. Se nanuma o tagane e vakarau vakawati me cegu mai na nona painia me lai cakacaka me rawata kina e dua na ilavo levu me isau ni yalewavou.

Ena so tale na vanua, e vakalawataki na isau ni yalewavou. Era na talairawarawa ena lawa qori na itubutubu lotu vaKarisito. Na vuna? E tukuni ena Vosa ni Kalou ni vinakati vei keda na lotu vaKarisito meda “talairawarawa . . . vei ira na iliuliu cecere” qai muria na lawa e sega ni veisaqasaqa kei na lawa ni Kalou.—Roma 13:1; Caka. 5:29.