DUA tale na gauna, e vosataki koya tale na marama qori. Cava e cakava o Toñi? E kaya: “Sega sara ga ni rawarawa na ituvaki ya. E cala tale tu ga nona veibeitaki.” Ia e kere veivosoti tale o Toñi qai tukuna ni kauaitaka dina na ituvaki e sotava tiko.

Na cava o na cakava ke o sotava qori? O na yalomalua tale ga? Se dredre mo lewai iko vakamatau? Macala ga ni sega ni dau rawarawa meda tauri keda ni yaco eso na ituvaki sa cavuti oti mai. Nida lomaocaoca se vakacudrui, e ka ni sasaga toka meda yalomalua.

E uqeti keda na lotu vaKarisito na iVolatabu meda yalomalua. Na Vosa ni Kalou mada ga e sema vata na itovo qori kei na vuku. E kaya o Jemesa: “O cei vei kemuni e vuku qai yalomatua? E dodonu me itovo vinaka qai vakaraitaka ena ka kece e cakava na yalomalua e salavata kei na vuku.” (Jeme. 3:13) Cava eda kaya kina ni noda yalomalua e vakaraitaka na vuku mai cake? Cava meda  cakava me tiko kina vei keda na itovo vakalou qori?

Ena vakamalumutaka na cudru na yalomalua. “Na vosa vakayalovinaka e vakaseavutaka na cudru, ia na vosa kaukaua e vakatubura na cudru.”​—Vkai. 15:1.

Ke da cudru, ena vakalevutaka tale na leqa, e vaka ga nida utura tiko na buka. (Vkai. 26:21) Ia ke da sauma ena yalomalua ena veivakacegui. E rawa mada ga ni vakamalumutaka nona cudru o koya e vakararawataki keda.

E vakadinadinataka sara ga qori o Toñi. E tagi na marama ya ni rogoca na nona vosa ena yalomalua. A vakamacalataka ni dua na ituvaki e sotava tiko, qai tiko tale na leqa e vale. E mani vunau sara vua o Toñi, a vulica tale ga na iVolatabu. A rawa ga qori baleta ni yalomalua o Toñi qai sega ni cudru.

Eda na marau nida yalomalua. “Era marau na yalomalua, nira na taukena na vuravura.”​—Maciu 5:5.

Na cava era marau kina na yalomalua? Eso era dau cudrucudru tu e liu, era sa tokara na yalomalua nikua ra qai mamarau. E vinaka nodra bula, era waraka tale tu ga na gauna vinaka se bera mai. (Kolo. 3:12) E nanuma lesu o Adolfo, e dua na ivakatawa ni tabacakacaka e Sipeni na nona ivakarau ni bula makawa ni bera ni kila na ka dina.

E kaya o Adolfo: “E sega ni vakainaki tu na noqu bula. Au dau sega ni lewa vinaka noqu cudru, eso mada ga na noqu itokani era rerevaka na noqu itovo voravora. Ia e veisau vakadua qori ena dua na veibuturaki. Au lausua kina vakaono qai voleka niu mate.”

Nikua sa veivakavulici tiko o Adolfo ena bibi ni yalomalua, qori ena ka e cakava kei na nona ivakaraitaki. Levu era taleitaka nona itovo vinaka kei na nona veikauaitaki. E tukuna tale ga ni marautaka na veiveisau e cakava mai. E vakavinavinaka vei Jiova ni vukei koya me bucina na yalomalua.

E marautaka o Jiova na yalomalua. “Mo vuku na luvequ mo vakamarautaka na lomaqu, me dua na vosa meu tauca vua sa beitaki au.”—Vkai. 27:11.

E beitaki Jiova tiko na kena meca na Tevoro. E tiko na vuna vinaka me cudru kina o Jiova, ia e vakamatatataka na iVolatabu ni dau “berabera ni cudru.” (Lako 34:6) Nida saga meda vakatotomuria na berabera ni cudru ni Kalou kei na nona yalomalua, eda na muria na sala e vakamarautaka na Kalou.​—Efeso 5:1.

E sega ni vinaka na ivakarau ni vuravura nikua. De dua eda na sotava eso era ‘dau tukutukuni ira, qaciqacia, dau vakauvosa, era sega ni lewa vinaka na yalodra, kei ira na voravora.’ (2 Tim. 3:2, 3) Ia e sega ni dodonu me tarova qori na noda via bucina na itovo vakalou qo. E uqeti keda na Vosa ni Kalou ni ‘vuku mai cake e dau veiyaloni, e yalorawarawa.’ (Jeme. 3:17) Nida veiyaloni qai yalorawarawa, eda sa vakaraitaka ni tiko vei keda na vuku vakalou. Ena uqeti keda meda vosa ena yalomalua nida vakacudrui, eda na toro voleka tale ga vua na iVurevure ni vuku tawamudu, o Jiova.